ಮೂರು ತಿಂಗಳಿಗೆ ಚುನಾವಣೆ ಬೇಕಿತ್ತಾ ? ರವಿ ಪ್ರಶ್ನೆ

ಚಿಕ್ಕಮಗಳೂರು : ಕೇವಲ ಮೂರು ತಿಂಗಳಿಗಾಗಿ ಲೋಕಸಭೆ ಉಪಚುನಾವಣೆ ಬೇಕಿತ್ತಾ ಎಂಬ ಪ್ರಶ್ನೆ ನನ್ನಲ್ಲಿ ಮೂಡಿದೆ ಎಂದು ಬಿಜೆಪಿ ರಾಜ್ಯ ಪ್ರಧಾನ ಕಾರ್ಯದರ್ಶಿ, ಶಾಸಕ ಸಿ.ಟಿ.ರವಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಅವರು ಸೋಮವಾರ ನಗರದಲ್ಲಿ ಸುದ್ಧಿಗಾರರೊಂದಿಗೆ ಮಾತನಾಡಿ, ವಿಧಾನಸಭೆ ಚುನಾವಣೆಗೆ 4ವರ್ಷ 7 ತಿಂಗಳು ಇರುವುದರಿಂದ ಉಪಚುನಾವಣೆ ಅವಶ್ಯಕ. ಆದರೆ, ಲೋಕಸಭೆಗೆ ನಡೆಯುವ ಉಪಚುನಾವಣೆಯ ಫಲಿತಾಂಶ ನವಂಬರ್‌ಗೆ ಬರಲಿದೆ. ಕೇವಲ ಮೂರುವರೆ ತಿಂಗಳ ಕಾಲ ಸಂಸದರಾಗಿ ಕಾರ್ಯ ನಿರ್ವಹಿಸಬೇಕಿದೆ. ಹಾಗಾಗಿ ಮೂರುವರೆ ತಿಂಗಳಿಗೆ ಚುನಾವಣೆ ಬೇಕಿತ್ತಾ ಎಂಬ ಪ್ರಶ್ನೆ ಹಲವರಲ್ಲಿ ಮೂಡಿದಂತೆ ನನ್ನಲ್ಲೂ ಮೂಡಿದೆ ಎಂದರು.

ಯಾವ ಪಕ್ಷಕ್ಕೂ ಒಳಗೆ ಚುನಾವಣೆ ಬೇಡ. ಆದರೆ ಹೊರಗೆ ಪ್ರತಿಷ್ಠೆ ಇದೆ. ನಮ್ಮ ಪಕ್ಷ ರಾಜಕೀಯ ಐಡಿಯಾಲಾಜಿ ಮೇಲೆ ಬೆಳೆದಿರುವ ಪಕ್ಷ. ಯಾವುದೇ ಚುನಾವಣೆಯನ್ನೂ ಎದುರಿಸಲು ಸದಾ ಸಿದ್ಧವಿದೆ. ಅಭ್ಯರ್ಥಿ ಆಯ್ಕೆ ಸಂಬಂಧ ಸ್ಥಳೀಯರ ಅಭಿಪ್ರಾಯ ಪಡೆದು ಅದನ್ನು ಕೇಂದ್ರ ಪಾರ್ಲಿಮೆಂಟರಿ ಬೋರ್ಡ್‌ಗೆ ಕಳುಹಿಸುತ್ತೇವೆ. ಅಲ್ಲಿ ಅಭ್ಯರ್ಥಿ ಯಾರು ಎಂದು ನಿಗದಿಯಾಗಲಿದೆ ಎಂದು ಹೇಳಿದರು.

ಬಿಜೆಪಿ ಪಾರ್ಟಿ ಯಾವ ಚುನಾವಣೆಯನ್ನೂ ಹಗುರವಾಗಿ ಪರಿಗಣಿಸುವುದಿಲ್ಲ. ಕಾಂಗ್ರೆಸ್‌ ಮತ್ತು ಜೆಡಿಎಸ್‌ ಪಕ್ಷಗಳ ಮೇಲೆ ಮೈತ್ರಿ ಮಾಡಿಕೊಂಡಿರಬಹುದು. ಆದರೆ, ಅವರ ಒಳಗಿರುವ ಅಸಮಾಧಾನ ಮತ್ತು ಸಂಘರ್ಷದ ಲಾಭ ಪಡೆಯಲು ನಾವು ಪ್ರಯತ್ನಿಸುತ್ತೇವೆ. ಏನೆಲ್ಲಾ ತಂತ್ರ ಮಾಡಬೇಕು ಎಲ್ಲವನ್ನೂ ಮಾಡುತ್ತೇವೆ. ಐದೂ ಕ್ಷೇತ್ರಗಳಲ್ಲೂ ನಾವೇ ಗೆಲ್ಲುತ್ತೇವೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.