ನಿಲಗುಳಿ ಪದ್ಮನಾಭ್‌ಗೆ 6 ತಿಂಗಳ ಸಜೆ

ಚಿಕ್ಕಮಗಳೂರು: ನಕ್ಸಲ್‌ ಚಟುವಟಿಕೆಯಿಂದ ಪ್ರಜಾತಾಂತ್ರಿಕ ಮುಖ್ಯವಾಹಿನಿಗೆ ಮರಳಿರುವ ನಿಲಗುಳಿ ಪದ್ಮನಾಭ್‌ ನಿಯಮಿತವಾಗಿ ವಿಚಾರಣೆಗೆ ಹಾಜರಾಗದ ಕಾರಣ 6 ತಿಂಗಳ ಸಜೆ, 2 ಸಾವಿರ ರೂ. ದಂಡ ವಿಧಿಸಿ ನ್ಯಾಯಾಲಯ ಆದೇಶಿಸಿದೆ.

ತನ್ನ ಮೇಲೆ ದಾಖಲಾಗಿದ್ದ ಪ್ರಕರಣಗಳ ವಿಚಾರಣೆಗೆ ನಿಯಮಿತವಾಗಿ ಹಾಜರಾಗದ ಕಾರಣ ನ್ಯಾಯಾಲಯ ಹೊರಡಿಸಿದ್ದ ಪ್ರೊಕ್ಲಮೇಷನ್‌ಗೆ ಸಂಬಂಧಿಸಿದಂತೆ ಪದ್ಮನಾಭ್‌ ವಿರುದ್ಧ ಶೃಂಗೇರಿ ಪೊಲೀಸ್‌ ಠಾಣೆಯಲ್ಲಿ ಭಾರತೀಯ ದಂಡಸಂಹಿತೆ ಕಲಂ 174 (ಎ) ನಡಿ ಪ್ರಕರಣ ದಾಖಲಾಗಿತ್ತು.

ವಿಚಾರಣೆ ನಡೆಸಿದ ನ್ಯಾಯಾಲಯ ನಿಲಗುಳಿ ಪದ್ಮನಾಭ್‌ಗೆ 6 ತಿಂಗಳ ಸಜೆ ಮತ್ತು 2ಸಾವಿರ ರೂ. ದಂಡ ವಿಧಿಸಿ ಶನಿವಾರ ತೀರ್ಪು ನೀಡಿದೆ. ಶಿಕ್ಷೆಯನ್ನು ವಜಾಗೊಳಿಸುವಂತೆ ಮೇಲ್ಮನವಿ ಸಲ್ಲಿಸಲು ಆರೋಪಿಗೆ ಅವಕಾಶವಿದೆ.