ಡಿ ದರ್ಜೆ ನೌಕರರ ವಜಾ ವಿರುದ್ಧ ಆಕ್ರೋಶ

ಚಿಕ್ಕಮಗಳೂರು : ನಗರದ ಮಲ್ಲೇಗೌಡ ಸರಕಾರಿ ಜಿಲ್ಲಾ ಆಸ್ಪತ್ರೆಯ ಡಿ ದರ್ಜೆ ನೌಕರರು ಮತ್ತು ಸ್ವಚ್ಚತಾ ಸಿಬ್ಬಂದಿಯನ್ನು ಕೆಲಸದಿಂದ ವಜಾ ಮಾಡಿದ ರಾಜ್ಯ ಸರಕಾರದ ಕ್ರಮ ಖಂಡಿಸಿ ಕರವೇ ನೇತೃತ್ವದಲ್ಲಿ ನೌಕರರು ವಿಧಾನಪರಿಷತ್‌ ಸದಸ್ಯ ಎಸ್‌.ಎಲ್‌.ಭೋಜೇಗೌಡ ಅವರಿಗೆ ಮನವಿ ಸಲ್ಲಿಸಿ ನ್ಯಾಯಕ್ಕಾಗಿ ಮೊರೆ ಹೋದರು.

ಕರವೇ ಯುವಸೇನೆಯ ಜಿಲ್ಲಾಧ್ಯಕ್ಷ ನೂರುಲ್ಲಾಖಾನ್‌ ನೇತೃತ್ವದಲ್ಲಿ ಮನವಿ ಸಲ್ಲಿಸಿದ ನೌಕರರು, ನಗರದ ಜಿಲ್ಲಾಸ್ಪತ್ರೆಯಲ್ಲಿ ಹೊರಗುತ್ತಿಗೆಯಡಿ ಡಿ.ದರ್ಜೆ 37 ನೌಕರರು, 28 ಮಂದಿ ಸ್ವಚ್ಚತಾ ಸಿಬ್ಬಂದಿಗಳಿಗೆ ಕಳೆದ 3 ತಿಂಗಳಿಂದ ವೇತನವನ್ನೂ ನೀಡದೆ ಕೆಲಸದಿಂದ ತೆಗೆದು ಹಾಕಲಾಗಿದೆ. ಆಸ್ಪತ್ರೆಯ ಕೆಲಸವನ್ನೆ ನೆಚ್ಚಿಕೊಂಡು ಜೀವನ ಸಾಗಿಸುತ್ತಿದ್ದ ನಮಗೆ ಯಾವುದೆ ಮುನ್ಸೂಚನೆ ನೀಡದೆ ಕೆಲಸದಿಂದ ತೆಗೆದಿರುವುದು ದಿಕ್ಕು ತೋಚದಂತಾಗಿದೆ. ತಕ್ಷ ಣವೆ ಎಲ್ಲ ಕೆಲಸಗಾರರಿಗೆ ನೌಕರಿ ನೀಡಿ ಬಾಕಿ ಇರುವ ಸಂಬಳವನ್ನು ನೀಡಬೇಕು ಎಂದು ಮನವಿ ಮಾಡಿದರು.

ವಿಧಾನ ಪರಿಷತ್‌ ಸದಸ್ಯಎಸ್‌.ಎಲ್‌.ಭೋಜೇಗೌಡ ಅವರು ಮನವಿ ಸ್ವೀಕರಿಸಿ ಸಂಬಂಧಿಸಿದ ಅಧಿಕಾರಿಗಳೊಂದಿಗೆ ದೂರವಾಣಿ ಸಂಪರ್ಕ ಮಾಡಿದರು. ನಂತರ ತಕ್ಷ ಣ ಎಲ್ಲ ಸಿಬ್ಬಂದಿಯನ್ನು ಕೆಲಸಕ್ಕೆ ಇಂದಿನಿಂದಲೇ ತೆರಳುವಂತೆ ತಿಳಿಸಿದರು.

ಕರವೇ ಮುಖಂಡರಾದ ಮಂಜುನಾಥ್‌, ದಾನೇಶ್‌, ಸಿಪಿಐ ಮುಖಂಡರಾದ ರಾಧಸುಂದರೇಶ್‌, ಡಿಎಸ್‌ಎಸ್‌ ಮುಖಂಡ ಕುಮಾರ್‌, ನೌಕರರಾದ ಜಯಣ್ಣ, ನಾಗಲಕ್ಷ್ಮೀ, ರಾಧ, ನಾಗಮ್ಮ, ಬಾಲಕೃಷ್ಣ, ಯುವರಾಜ್‌, ಮತ್ತಿತರರು ಹಾಜರಿದ್ದರು.