ಆರೋಗ್ಯ ಸಿಬ್ಬಂದಿಗೆ ಯೋಜನೆ ಮಾಹಿತಿ

ನರಸಿಂಹರಾಜಪುರ : ತಾಲೂಕಿನಲ್ಲಿ 5 ಪ್ರಾಥಮಿಕ ಆರೋಗ್ಯ ಕೇಂದ್ರ ಹಾಗೂ 27 ಉಪ ಕೇಂದ್ರಗಳಿವೆ ಎಂದು ಕ್ಷೇತ್ರ ಆರೋಗ್ಯ ಶಿಕ್ಷ ಣಾಧಿಕಾರಿ ಪಿ.ಪಿ.ಬೇಬಿ ಹೇಳಿದರು.

ಪಟ್ಟಣ ತಾಲೂಕು ಪಂಚಾಯಿತಿಯ ಸಾಮಾರ್ಥ್ಯಸೌಧದಲ್ಲಿ ತಾಲೂಕು ಪಂಚಾಯಿತಿ ಸದಸ್ಯರು,ವಿವಿಧ ಇಲಾಖೆಯ ಅಧಿಕಾರಿಗಳು ಹಾಗೂ ಪಿಡಿಒ ಗಳಿಗೆ ಆರೋಗ್ಯ ಇಲಾಖೆಯಿಂದ ಸಿಗುವ ಸೇವಾ ಸೌಲಭ್ಯಗಳ ಮಾಹಿತಿ ಕಾರ್ಯಕ್ರಮದಲ್ಲಿ ಸ್ಲೈಡ್‌ ಶೋ ಮೂಲಕ ಅವರು ಮಾಹಿತಿ ನೀಡಿದರು.ತಾಲೂಕು ಕೇಂದ್ರದಲ್ಲಿ ಎಲ್ಲ ವಿಧದ ಸೌಲಭ್ಯವಿರುವ ಸರಕಾರಿ ಆಸ್ಪತ್ರೆ ಇದ್ದು,100 ಹಾಸಿಗೆ ಸೌಲಭ್ಯವಿದೆ.5 ಲಕ್ಷ ರೂ. ಅನುದಾನ ಬರುತ್ತಿದೆ.ತಾಯಿಮಕ್ಕಳು, ವಯೋವೃದ್ಧರಿಗೆ ಬೇರೆ,ಬೇರೆ ಸೌಲಭ್ಯ ನೀಡುತ್ತೇವೆ.ಗರ್ಭಿಣಿಯರಿಗೆ ಕಾರ್ಡ್‌ ನೀಡುತ್ತೇವೆ.ಅದರಲ್ಲಿ ಎಲ್ಲ ದಾಖಲೆಗಳಿವೆ.ಜನನಿ ಶಿಶು ಸುರಕ್ಷಾ ಯೋಜನೆ ಇದೆ.ತುರ್ತು ಸಂದರ್ಭ ಬಡವರಿಗಾಗಿ ಉಪಯೋಗಿಸಲು 108 ವಾಹನದ ಸೌಲಭ್ಯವಿದೆ ಎಂದರು.

ನಗು-ಮಗು ವಾಹನದ ಸೌಲಭ್ಯ ಇದೆ.ಈಗ 108 ಹಾಗೂ ನಗು ಮಗು ವಾಹನವು ಒಟ್ಟಾಗಿ ಕಾರ್ಯನಿರ್ವಹಿಸುತ್ತಿದೆ.ಪ್ರತಿ ತಿಂಗಳ 9 ರಂದು ಪ್ರಧಾನ ಮಂತ್ರಿ ಸುರಕ್ಷಿತ ಮಾತೃಶ್ರೀ ಅಭಿಯಾನ ಯೋಜನೆ ಇದೆ. ಶಾಲಾ ಮಕ್ಕಳಿಗಾಗಿ ರಾಷ್ಟ್ರೀಯ ಬಾಲ ಸ್ವಾಸ್ಥ್ಯ ಕಾರ್ಯಕ್ರಮ ಹಮ್ಮಿಕೊಂಡಿದ್ದೇವೆ.ಎರಡು ತಂಡಗಳು ಇದರಲ್ಲಿ ಕೆಲಸ ಮಾಡುತ್ತದೆ ಎಂದರು.

ತಾಲೂಕು ಪಂಚಾಯಿತಿ ಅಧ್ಯಕ್ಷೆ ಜಯಶ್ರೀ ಮೋಹನ್‌, ಉಪಾಧ್ಯಕ್ಷ ಮಂಜು, ಸ್ಥಾಯಿ ಸಮಿತಿ ಅಧ್ಯಕ್ಷ ಎಂ.ಎನ್‌.ನಾಗೇಶ್‌, ತಾಲೂಕು ಪಂಚಾಯಿತಿ ಕಾರ್ಯನಿರ್ವಹಣಾಧಿಕಾರಿ ಎಸ್‌ ನಯನ,ತಾಲೂಕು ಮಟ್ಟದ ಅಧಿಕಾರಿಗಳು,ತಾಲೂಕು ಪಂಚಾಯಿತಿ ಸದಸ್ಯರು, ಪಿಡಿಓ ಹಾಗೂ ಗ್ರಾಮ ಪಂಚಾಯಿತಿ ಅಧ್ಯಕ್ಷ ರು ಇದ್ದರು.