ಖಾತೆ ಮಾಡಿಕೊಡದಿದ್ದರೆ ಪ್ರತಿಭಟನೆ: ಬಿಎಸ್ಪಿ

ತಾಲೂಕಿನಾದ್ಯಂತ ಹಕ್ಕುಪತ್ರ ಇರುವ ರೈತರ ಒತ್ತುವರಿ ಭೂಮಿಗೆ ಖಾತೆ ಮಾಡಿಕೊಡದಿದ್ದರೆ ತಾಲೂಕು ಕಚೇರಿ ಎದುರು ಪ್ರತಿಭಟನೆ ಆಯೋಜಿಸುವುದಾಗಿ ಬಿಎಸ್ಪಿ ಜಿಲ್ಲಾ ಕಾರ್ಯದರ್ಶಿ ಆನಂದ್‌ ಹೇಳಿದರು.

ಅವರು ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ತಾಲೂಕಿನ ನೂರಾರು ರೈತರಿಗೆ ಈಗಾಗಲೆ ಅರ್ಜಿ ಸಂಖ್ಯೆ 50 ಮತ್ತು 53ರಲ್ಲಿ ಭೂಮಿ ಹಕ್ಕುಪತ್ರ ನೀಡಲಾಗಿದೆ. ಆದರೆ ಸರಕಾರ ಅದರ ಕಿಮ್ಮತ್ತು ನಿಗದಿಪಡಿಸಿಲ್ಲ. ಆದ್ದರಿಂದ ತಾಲೂಕು ಕಚೇರಿಯಲ್ಲಿ ಅದಕ್ಕೆ ಖಾತೆ ಆಗುತ್ತಿಲ್ಲ. ಪರಿಣಾಮವಾಗಿ ರೈತಾಪಿ ಸಮೂಹ ಸರಕಾರದ ಹಲವು ಸೌಲಭ್ಯದಿಂದ ವಂಚಿತರಾಗುತ್ತಿದ್ದಾರೆ. ಇದನ್ನು ಪ್ರಶ್ನಿಸಿದಾಗ ಕೆಲಸದ ಒತ್ತಡದಿಂದ ವಿಳಂಬವಾಗಿರುವುದಾಗಿ ತಹಸೀಲ್ದಾರ್‌ ಎರ್ರಿಸ್ವಾಮಿ ತಿಳಿಸಿದ್ದಾರೆ. ರೈತರ ಹಕ್ಕುಪತ್ರದ ವಿವರ ನೀಡಿದಲ್ಲಿ 15 ದಿನದೊಳಗೆ ಕಿಮ್ಮತ್ತು ಪ್ರಕಟಿಸುವುದಾಗಿ ಅವರು ಹೇಳಿದ್ದಾರೆ. ಅದರಂತೆ ದಾಖಲೆ ನೀಡಲಾಗುವುದು. ಆದರೆ ಮತ್ತೊಮ್ಮೆ ವಿಳಂಬವಾದಲ್ಲಿ ತಾಲೂಕು ಕಚೇರಿ ಎದುರು ಪ್ರತಿಭಟನೆ ಹಮ್ಮಿಕೊಳ್ಳಲಾಗುವುದು ಎಂದರು.

ಮುಖಂಡರಾದ ಪ್ರಭಾಕರ, ಕಿರಣ್‌, ಶಿವರಾಮ ಶೆಟ್ಟಿ, ನಾಗೇಶ್‌ ಮತ್ತಿತರರು ಹಾಜರಿದ್ದರು.