ಕಲಾಪದಿಂದ ದೂರ ಉಳಿದು ವಕೀಲರ ಪ್ರತಿಭಟನೆ

ತರೀಕೆರೆ : ಮೋಟಾರು ವಾಹನ ಕಾಯಿದೆ ತಿದ್ದುಪಡಿ ಮಾಡಿದ ಕೇಂದ್ರ ಸರಕಾರದ ಧೋರಣೆ ಖಂಡಿಸಿ ಗುರುವಾರ ಪಟ್ಟಣದ ವಕೀಲರು ಪ್ರತಿಭಟನೆ ನಡೆಸಿ ನ್ಯಾಯಾಲಯ ಕಲಾಪಗಳಿಂದ ದೂರ ಉಳಿದರು.

ಸಭೆಯಲ್ಲಿಮಾತನಾಡಿದ ಹಿರಿಯ ವಕೀಲ ಕೆ.ಲಿಂಗರಾಜು, ಇದು ಸಾರ್ವಜನಿಕರ ಮೇಲೇ ಸರಕಾರ ನಡೆಸಿದ ದೌರ್ಜನ್ಯ. ಯಾವುದೇ ಸಂಘ ಸಂಸ್ಥೆ, ಸಾರ್ವಜನಿಕ ಸಂಸ್ಥೆಗಳೂಂದಿಗೆ ಚರ್ಚೆ ನಡೆಸದೆ ಏಕಾಏಕಿ ಕೇಂದ್ರ ಸರಕಾರ ತೆಗೆದುಕೊಂಡ ನಿರ್ಣಯ ಖಂಡನೀಯ ಎಂದು ಹೇಳಿದರು.

ವಕೀಲರ ಸಂಘದ ಅಧ್ಯಕ್ಷ ಟಿ.ಎನ್‌.ಮಹದೇವಸ್ವಾಮಿ ಮಾತನಾಡಿ, ಬೆಂಗಳೂರು ವಕೀಲರ ಸಂಘ ಕರೆ ನೀಡಿದೆ ಎಂದು ಪ್ರತಿಭಟಿಸುತ್ತಿಲ್ಲ, ರಾಜ್ಯ ಎಲ್ಲವಕೀಲರ ಸಂಘಗಳು ಪ್ರತಿಭಟನೆ ಮಾಡುತ್ತಿದ್ದು, ಕೇಂದ್ರ ಸರಕಾರ ವಿಧಿಸುತ್ತಿರುವ ದಂಡ ಕೂಡ ಅವೈಜ್ಞಾನಿಕವಾಗಿದೆ. ಸರಿ ಇಲ್ಲದ ಕಾರಣ ಸರಕಾರದ ಕಣ್ಣು ತೆರೆಸಲು ಈ ಪ್ರತಿಭಟನೆ ಎಂದು ಹೇಳಿದರು.

ವಕೀಲ ಎಸ್‌.ಎನ್‌.ಮಲ್ಲೇಗೌಡ ಮಾತನಾಡಿ,ದಿನ ನಿತ್ಯ ತೆಗೆದಕೊಳ್ಳುವ ಕೂಲಿ 100 ರೂ ಆದರೆ ಇದರ ಹತ್ತು ಪಟ್ಟು ದಂಡ ವಿಧಿಸುವುದು ಯಾವ ನ್ಯಾಯ, ಮೊದಲು ಸರಕಾರ ಉತ್ತಮ ರಸ್ತೆಗಳನ್ನು ರೂಪಿಸಲು ಎಂದು ಹೇಳಿದರು.

ವಕೀಲ ಕೆ.ಸಿ.ಚಂದ್ರಪ್ಪ ಮಾತನಾಡಿ, ಕೇಂದ್ರ ಸರಕಾರದ ನೀತಿ ಹಗಲು ದರೋಡೆ, ಕೂಡಲೆ ಹೆಚ್ಚಿಸಿರುವ ದಂಡ ಕಡಿಮೆ ಮಾಡಬೇಕು ಎಂದು ಆಗ್ರಹಿಸಿದರು.

ವಕೀಲ ಬಿ.ಎಸ್‌.ನಿರಂಜನಮೂರ್ತಿ ಮಾತನಾಡಿ, ಇದುವರೆಗೂ ರಾಜ್ಯ ಬಾರ್‌ ಕೌನ್ಸಿಲ್‌ ಆಗಲಿ, ಕೇಂದ್ರ ಬಾರ್‌ ಕೌನ್ಸಿಲ್‌ ಆಗಲಿ ಪ್ರತಿಭಟನೆಗೆ ಕರೆ ನೀಡಿಲ್ಲ. ಇದುವರೆಗೂ ರಾಜ್ಯ ವಕೀಲರ ಸಂಘ ನಮ್ಮ ಯಾವುದೇ ಸಮಸ್ಯೆಗಳಿಗೆ ಸ್ಪಂದಿಸಿಲ್ಲ, ಆದರೆ ಬೆಂಗಳೂರಿಗೆ ಸೀಮಿತವಾಗಿರುವ ಬೆಂಗಳೂರು ವಕೀಲರ ಸಂಘ ನೀಡಿರುವ ಕರೆಗೆ ನಾವು ಪ್ರತಿಭಟನೆ ಮಾಡುವುದು ಸರಿಯಲ್ಲಎಂದು ಹೇಳಿದರು. ಬಿ.ಪಿ.ವಿಕಾಸ್‌, ಎಂ.ಕೆ.ತೇಜಮೂರ್ತಿ,ಜಿ.ಎನ್‌.ಚಂದ್ರಶೇಖರ್‌, ಕೆ.ಸಿ.ಜ್ಞಾನಮೂರ್ತಿ, ಎಚ್‌.ಸಿ.ಸತೀಶ್‌ ಇನ್ನಿತರರು ಮಾತನಾಡಿದರು.