ರಾಮಾಯಣ, ಮಹಾಭಾರತ ವಿಶ್ವಕ್ಕೆ ಮಾರ್ಗದರ್ಶಿ

ಚಿಕ್ಕಮಗಳೂರು : ಭರತ ಖಂಡದ ಆಧ್ಯಾತ್ಮಿಕ ಗ್ರಂಥಗಳು ವಿಶ್ವಕ್ಕೇ ಮಾರ್ಗದರ್ಶಕಗಳಾಗಿವೆ. ಅದರಲ್ಲಿಯೂ ರಾಮಾಯಣ, ಮಹಾಭಾರತ ಮಹಾಕಾವ್ಯಗಳು ಪ್ರಪಂಚದ ಎಲ್ಲ ಜನಾಂಗದವರೂ ಅನುಸರಿಸುವ ಮಹೋನ್ನತ ಮಾನವೀಯ ಮೌಲ್ಯಹೊಂದಿವೆ ಎಂದು ಗಮಕಿ ರಾಮಸುಬ್ರಾಯ ಶೇಟ್‌ ಹೇಳಿದರು.

ಬೆಂಗಳೂರಿನ ರಾಜಾಜಿನಗರದ ಮಹಾಲಕ್ಷ್ಮಿ ಬಡಾವಣೆಯ ಶರಣ ಸೇವಾ ಸದನದ ಮಹಾಮನೆ ಕಲ್ಯಾಣ ಮಂಟಪದಲ್ಲಿ ಇತ್ತೀಚೆಗೆ ಏರ್ಪಡಿಸಿದ್ದ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ರಾಮಾಯಣ, ಮಹಾಭಾರತದ ಮೌಲ್ಯದ ಪರಿಕಲ್ಪನೆ ಮತ್ತು ಗಮಕ ಉಪನ್ಯಾಸ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ಜಗತ್ತಿನ ಎಲ್ಲ ಸಮಸ್ಯೆಗಳಿಗೂ ಈ 2 ಮಹಾ ಗ್ರಂಥಗಳಲ್ಲಿ ಪರಿಹಾರ ಕಂಡುಕೊಳ್ಳಬಹುದಾಗಿದೆ ಎಂದ ಅವರು, ರಾಮಾಯಣದಲ್ಲಿನ ಸತ್ಯ ಸಂಧತೆ, ಭ್ರಾತೃಪ್ರೇಮ, ಪಿತೃವಾಕ್ಯ ಪರಿಪಾಲನೆ, ರಾಜ ಧರ್ಮ, ರಾಮರಾಜ್ಯದ ಆದರ್ಶಗಳನ್ನು ವಿವರಿಸಿದರು.

ರಾಮ್‌ಸುಬ್ರಾಯ ಶೇಟ್‌ ಅವರು ಭಾಮಿನಿ ಷಟ್ಪದಿಯಲ್ಲಿ ರಚಿಸಿರುವ 'ಗಮಕ ನೂರೆಂಟು' ಕೃತಿಯ 'ದುರಾಸೆಯಿಂದ ನಾಶ ಹೊಂದಿದ ನಹುಷ' ಭಾಗವನ್ನು ಗಮಕಿ ಶೋಭಾ ಶಶಿಧರ್‌ ಸುಶ್ರಾವ್ಯವಾಗಿ ಗಾಯನ ಮಾಡಿದರು. ಅದಕ್ಕೆ ಶೇಟ್‌ ಅವರು ಅರ್ಥಪೂರ್ಣ ವ್ಯಾಖ್ಯಾನ ನೀಡಿದರು.

ದೊರಕಿದ ಅಧಿಕಾರವನ್ನು ದುರಾಸೆಯಿಂದ, ಸ್ವಾರ್ಥದಿಂದ ದುರುಪಯೋಗಪಡಿಸಿಕೊಳ್ಳದೆ ಪರೋಪಕಾರಿಗಳಾಗಿ ಸೇವೆ ಮಾಡಬೇಕು ಎಂದರು. ಶೇಟ್‌ ಅವರ ಮತ್ತೊಂದು ಕೃತಿ 'ಪಾರ್ಥನ ಸಾರ್ಥಕ ಬದುಕು' ಲೋಕಾರ್ಪಣೆ ಮಾಡಲಾಯಿತು. ರವಿಭಟ್ಟ ಸ್ವಾಗತಿಸಿ, ರಾಘವೇಂದ್ರ ವಂದಿಸಿದರು.