ಮಲೆನಾಡು ಭಾಗದಲ್ಲಿ ಕೊರೊನಾ ನಡುವೆ ಇಲಿಜ್ವರದ ಭೀತಿ

ಚಿಕ್ಕಮಗಳೂರು: ಜಿಲ್ಲೆಯ ಮಲೆನಾಡು ಭಾಗದಲ್ಲಿ ಕೊರೊನಾ ನಡುವೆ ಇಲಿಜ್ವರದ ಭೀತಿಯೂ ಶುರುವಾಗಿದೆ. ನರಸಿಂಹರಾಜಪುರ ತಾಲೂಕಿನಲ್ಲಿ ಇಲಿಜ್ವರದಿಂದ ಒಬ್ಬರು ಮೃತಪಟ್ಟಿದ್ದು, ಮತ್ತೊಬ್ಬರಿಗೂ ಇಲಿಜ್ವರ ಇರುವುದು ದೃಢಪಟ್ಟಿದೆ.

ನರಸಿಂಹರಾಜಪುರ ತಾಲೂಕಿನ ಕಸಬಾ ಹೋಬಳಿ ವ್ಯಾಪ್ತಿಯಲ್ಲಿ ಇದುವರೆಗೆ ಎರಡು ಇಲಿ ಜ್ವರ ಪ್ರಕರಣಗಳು ಪತ್ತೆಯಾಗಿದೆ. 54 ವರ್ಷದ ವ್ಯಕ್ತಿಯೊಬ್ಬರು ಶಿವಮೊಗ್ಗದ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫಲಿಸದೆ ಮೃತಪಟ್ಟಿದ್ದು, ವೈದ್ಯಕೀಯ ವರದಿಯಲ್ಲಿ ಇಲಿಜ್ವರ ಇರುವುದು ದೃಢಪಟ್ಟಿದೆ.

ತಾಲೂಕಿನ 30 ವರ್ಷದ ಯುವಕನೊಬ್ಬ ಇಲಿಜ್ವರಕ್ಕೆ ಮಣಿಪಾಲ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಮಲೆನಾಡಿನ ಹಲವು ಹಳ್ಳಿಗಳಲ್ಲೂ ಕೊರೊನಾ ಪಾಸಿಟಿವ್‌ ಕಾಣಿಸಿಕೊಂಡು ಜನ ಆತಂಕದಲ್ಲಿರುವಾಗಲೇ ಇಲಿಜ್ವರದ ಭೀತಿ ಎದುರಾಗಿದೆ.