ಶಾರ್ಟ್‌ ಸಕ್ರ್ಯೂಟ್‌: ಗೃಹೋಪಯೋಗಿ ವಸ್ತುಗಳು ಭಸ್ಮ

ಚಿಕ್ಕಮಗಳೂರು : ವಿದ್ಯುತ್‌ ಮಾರ್ಗದಲ್ಲಿ ಸಂಪರ್ಕ ಕಲ್ಪಿಸುವ ವೇಳೆ ಶಾರ್ಟ್‌ ಸಕ್ರ್ಯೂಟ್‌ನಿಂದ ನಗರದ ವಿವಿಧ ಬಡಾವಣೆಗಳ ಮನೆಗಳಲ್ಲಿ ದುಬಾರಿ ಬೆಲೆಯ ವಸ್ತುಗಳು ಸುಟ್ಟು ಹೋಗಿರುವ ಘಟನೆ ಭಾನುವಾರ ನಡೆದಿದೆ.

ವಾರದ ರಜೆಯ ಮೂಡಿನಲ್ಲಿದ್ದ ಜನರಿಗೆ ಕರೆಂಟ್‌ ಶಾಕ್‌ ದಿಗಿಲು ಮೂಡಿಸಿದೆ. ನಗರದ ಬಸವನಹಳ್ಳಿ ಅಡ್ಡರಸ್ತೆಯಲ್ಲಿರುವ ಅಂಚೆ ಲಿಂಗಣ್ಣನ ಬೀದಿ, ಕುಂಬಾರ ಬೀದಿ, ಬ್ರಹ್ಮಕುಮಾರೀಸ್‌ ವಿಶ್ವವಿದ್ಯಾಲಯ ಆಸುಪಾಸಿನ ಬಡಾವಣೆಗಳ ಮನೆಗಳಲ್ಲಿ ಬೆಲೆ ಬಾಳುವ ಎಲೆಕ್ಟ್ರಾನಿಕ್‌ ವಸ್ತುಗಳು ಸುಟ್ಟು ಹೋಗಿವೆ. ಕೆಲವರ ಮನೆಯಲ್ಲಿ ಟಿವಿ, ಗ್ರೈಂಡರ್‌, ಮಿಕ್ಸಿ, ಸ್ವಿಚ್‌ ಬಾಕ್ಸ್‌, ಫ್ರಿಡ್ಜ್‌ , ವಿದ್ಯುತ್‌ ದೀಪಗಳು ಸುಟ್ಟುಹೋಗಿದ್ದರಿಂದ ಕ್ಷಣ ಕಾಲ ಈ ಭಾಗದ ಜನ ಗಾಬರಿಯಾಗಿ ಹೊರಗಡೆ ಓಡಿ ಬಂದಿದ್ದಾರೆ. ಕೇಬಲ್‌ ಆಪರೇಟರ್‌ ಸತೀಶ್‌ ಎಂಬಾತ ಆಂಪ್ಲಿಪ್ಲೇಯರ್‌ ರಿಪೇರಿ ಮಾಡುತ್ತಿದ್ದಾಗ ಅವಘಡ ಉಂಟಾಗಿದ್ದು, ಕೆಳಗೆ ಬಿದ್ದು ಜಿಲ್ಲಾಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಮನೆಗೆ ಬಂದಿದ್ದಾರೆ.

ದುರ್ಘಟನೆ ನಡೆದರೂ ಮೆಸ್ಕಾಂ ಅಧಿಕಾರಿ, ಸಿಬ್ಬಂದಿಗಳು ಸ್ಥಳಕ್ಕೆ ಬರಲಿಲ್ಲ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿದರು. ವಿದ್ಯುತ್‌ ಹಿಮ್ಮುಖವಾಗಿ ಹರಿದ ಪರಿಣಾಮ ಈ ಅವಘಡ ಸಂಭವಿಸಿದೆ ಎಂದು ಮೆಸ್ಕಾಂ ಸಿಬ್ಬಂದಿ ಒಬ್ಬರು ಹೇಳಿದ್ದಾರೆ. ಹಲವಾರು ಮನೆಗಳಲ್ಲಿ ದುಬಾರಿ ಬೆಲೆಯ ವಿದ್ಯುತ್‌ ಎಲೆಕ್ಟ್ರಾನಿಕ್ಸ್‌ ಉಪಕರಣಗಳು ಸುಟ್ಟು ಹೋಗಿದ್ದು ಆಗಿರುವ ನಷ್ಟವನ್ನು ಮೆಸ್ಕಾಂ ಭರಿಸಬೇಕು. ಇಲ್ಲದಿದ್ದರೆ ಸೋಮವಾರ ಪ್ರತಿಭಟನೆ ನಡೆಸುವುದಾಗಿ ಸ್ಥಳೀಯರು ಎಚ್ಚರಿಸಿದ್ದಾರೆ.