ಮಳೆಗೆ ಪ್ರಾರ್ಥಿಸಿ ವಿಶೇಷ ಪೂಜೆ

ಸಖರಾಯಪಟ್ಟಣ : ಗ್ರಾಮದಲ್ಲಿ ಮಳೆಗೆ ಪ್ರಾರ್ಥಿಸಿ ಬೇಟೆ ದೇವರನ್ನು ಎರಡನೇ ಬೇಟೆಗೆ ಪ್ರಮುಖ ಬೀದಿಗಳಲ್ಲಿ ಉತ್ಸವದ ಮೂಲಕ ಕೊಂಡೊಯ್ದು ಬಸ್‌ ನಿಲ್ದಾಣ ಆವರಣದಲ್ಲಿರುವ ಕಮ್ಮಾರು ಗಲ್ಲಿಗೆ 1001 ಕೊಡಗಳ ನೀರನ್ನು ಹಾಕುವುದರೊಂದಿಗೆ ಪೂಜೆ ನೆರವೇರಿಸಲಾಯಿತು.

ನಂತರ ಉತ್ಸವ ಮೂರ್ತಿಯನ್ನು ಪಟ್ಟಣ ಸಮೀಪದ ಗವಿರಂಗಸ್ವಾಮಿ ಗುಡ್ಡಕ್ಕೆ ಉತ್ಸವದ ಮೂಲಕ ಕರೆದೊಯ್ದು 101 ಎಡೆಗಳನ್ನು ಪ್ರತಿಷ್ಠಾಪಿಸಿ ಬೇಟೆ ದೇವರಿಗೆ ಪೂಜೆ ಸಲ್ಲಿಸಲಾಯಿತು.

ನಂತರ ಗುಡ್ಡದ ಮೇಲಿರುವ ಆಂಜನೇಯ ಸ್ವಾಮಿಗೆ ಪೂಜೆ ಸಲ್ಲಿಸಿ ಉತ್ಸವದ ಮೂಲಕ ಬೇಟೆ ದೇವರನ್ನು ರಂಗನಾಥಸ್ವಾಮಿ ದೇವಾಲಯಕ್ಕೆ ಕರೆತರಲಾಯಿತು. ಮೊದಲನೇ ಬೇಟೆಯನ್ನು ಈ ಹಿಂದೆ ಶನಿವಾರ ಹೊರಡಿಸಲಾಗಿತ್ತು. ಬರುವ ಶನಿವಾರ ಇದೇ ಉತ್ಸವವನ್ನು ಮುಂದುವರಿಸಿ ಮೂರನೇ ಬೇಟೆಯನ್ನು ಮಾಡಲಾಗುವುದು ಎಂದು ನೇತೃತ್ವ ವಹಿಸಿದ್ದ ಲೋಕೇಶ್‌ ತಿಳಿಸಿದರು. ಬೇಟೆ ದೇವರನ್ನು ಹೊರಡಿಸಿದರೆ ಮಳೆ ಬರುತ್ತದೆ ಎಂಬ ಪ್ರತೀತಿ ಇದೆ.