ಶೃಂಗೇರಿ ವ್ಯಾಪ್ತಿ ಸಾಮಾನ್ಯ ಮಳೆ

ಶೃಂಗೇರಿ : ಮೃಗಶಿರ ಮಳೆ ತಾಲೂಕಾದ್ಯಂತ ಬುಧವಾರ ಸುರಿದಿದ್ದು, ಆಗಾಗ್ಗೆ ಸುಳಿ ಗಾಳಿಯೊಂದಿಗೆ ಸಾಮಾನ್ಯ ಮಳೆಯಾಗಿದೆ.

ಮಳೆಗಾಲದ ವಾತಾವರಣಕ್ಕೆ ಪೂರಕವಾಗಿ, ಬೆಳಗ್ಗೆಯಿಂದಲೇ ಮಳೆ ಸುರಿಯಿತು. ಕಾರ್ಮಿಕರು ಕೆಲಸಕ್ಕೆ ಹೊರಡುವ ಸಂದರ್ಭದಲ್ಲಿ ಜಡಿ ಮಳೆಯಾಗಿದ್ದರಿಂದ ಬಹುತೇಕ ಕಾರ್ಮಿಕರು ಕೆಲಸಕ್ಕೆ ತೆರಳದೇ ಮನೆಯಲ್ಲಿಯೇ ಉಳಿದರು. ಮಳೆ ಆರಂಭವಾಗಿದ್ದರೂ, ಮುಖ್ಯ ರಸ್ತೆಯ ಚರಂಡಿಯನ್ನು ದುರಸ್ತಿಗೊಳಿಸದ ಕಾರಣ ಅನೇಕ ಕಡೆ ರಸ್ತೆಯಲ್ಲಿ ಕೆಸರು ಮಣ್ಣು ಕಂಡು ಬಂದಿದೆ. ತಡವಾಗಿ ಆರಂಭವಾಗಿರುವ ಮಳೆ ಇನ್ನಷ್ಟೆ ಚುರುಕಾಗಬೇಕಾಗಿದೆ. ಕಳೆದ ವರ್ಷ ಜೂ.12ರ ವೇಳೆಗೆ ತುಂಗಾ ನದಿ ತುಂಬಿ ಹರಿಯುತ್ತಿತ್ತು. ಮಳೆ ಮುಂದುವರಿದಲ್ಲಿ ಕೃಷಿ ಚಟುವಟಿಕೆ ಚುರುಕುಗೊಳ್ಳಲಿದೆ. ಕಿಗ್ಗಾದಲ್ಲಿ 21.8, ಕೆರೆಕಟ್ಟೆ 70.4 ಹಾಗೂ ಶೃಂಗೇರಿಯಲ್ಲಿ 22.8 ಮಿಮೀ ಮಳೆ ದಾಖಲಾಗಿದೆ.