ಸಹಜ ಸ್ಥಿತಿಯತ್ತ ಶೃಂಗೇರಿ

ಶೃಂಗೇರಿ: ಚಿಕ್ಕಮಗಳೂರು ಜಿಲ್ಲಾ16ನೇ ಕನ್ನಡ ಸಾಹಿತ್ಯ ಪರಿಷತ್‌ ಸಮ್ಮೇಳನ ಎರಡನೇ ದಿನದ ಕಾರ್ಯಕ್ರಮ ರದ್ದಾಗಿದ್ದು ಸಾಹಿತ್ಯಭಿಮಾನಿಗಳಲ್ಲಿನಿರಾಸೆ ಉಂಟುಮಾಡಿತು. ಪೊಲೀಸ್‌ ಇಲಾಖೆಯ ಸೂಚನೆ ಮೇರೆಗೆ ರದ್ದುಪಡಿಸಿದ್ದು, ಕಸಾಪ ಉಳಿಸಿ ವೇದಿಕೆಗೆ ಅಲ್ಪ ಸಮಾಧಾನ ತಂದಿದೆ. ಮುಂಜಾಗ್ರತಾ ಕ್ರಮವಾಗಿ ಸಮುದಾಯ ಭವನದ ಎದುರು ಪೊಲೀಸ್‌ ರಕ್ಷಣೆ ಮುಂದುವರಿದಿದೆ.

ಎರಡನೇ ದಿನಕ್ಕಾಗಿ ಅಡುಗೆ ಸಹಿತ ವ್ಯವಸ್ಥೆ ಎಲ್ಲವೂ ಆಗಿತ್ತು. ಆದರೆ ದಿಢೀರ್‌ ಕಾರ್ಯಕ್ರಮ ರದ್ದಾಗಿರುವುದರಿಂದ ಹಾಲು, ಮೊಸರು, ತರಕಾರಿ ಉಪಯೋಗಕ್ಕೆ ಬರದಂತಾಯಿತು. ಉಪಯೋಗಿಸದ ದಿನಸಿ ವಸ್ತುಗಳನ್ನು ದೇಣಿಗೆ ನೀಡಿದವರಿಗೆ ಹಿಂದಿರುಗಿಸಲಾಗುತ್ತಿದೆ. ಕಾರ್ಯಕ್ರಮ ರದ್ದಾದ ನಂತರ ನಿರ್ಮಿಸಿದ್ದ ಪೆಂಡಾಲ್‌ನ್ನು ತೆಗೆಯುವ ಕೆಲಸ ಬೆಳಗ್ಗೆಯಿಂದ ಆರಂಭಗೊಂಡಿದ್ದು, ಖುರ್ಚಿಗಳನ್ನು ತೆರವು ಮಾಡಲಾಗಿದೆ. ಸಮುದಾಯ ಭವನದ ಸುತ್ತ ಸ್ವಚ್ಛತೆ ಮಾಡಲಾಗಿದೆ. ಸಮಿತಿ ಕಾರ್ಯಕರ್ತರು ಬೆಳಗ್ಗೆಯಿಂದ ಹಾಜರಿದ್ದು, ಪೆಂಡಾಲ್‌ ತೆಗೆಯವುದು ಸೇರಿದಂತೆ ಸ್ವಚ್ಛತೆ ಕಾರ್ಯದ ನಿಗಾ ವಹಿಸಿದ್ದರು.
ಶುಕ್ರವಾರದ ಬಂದ್‌ ನಂತರ ಸಹಜ ಸ್ಥಿತಿಯತ್ತ ಮರಳಿದೆ. ಪಟ್ಟಣದಲ್ಲಿವ್ಯಾಪಾರ, ವಹಿವಾಟು ಎಂದಿನಂತೆ ನಡೆದಿದೆ.