ಮುಂದುವರಿದ ರೇವಣ್ಣ ಟೆಂಪಲ್ ರನ್: ಶೃಂಗೇರಿ ಶಾರದಾಂಬೆಗೆ ತೆರಳಿ ಬೆಳ್ಳಂಬೆಳಗ್ಗೆ ವಿಶೇಷ ಪೂಜೆ

ಚಿಕ್ಕಮಗಳೂರು: ನಾಳೆ ಸರಕಾರದ ಅಳಿವು-ಉಳಿವಿನ ಹಿನ್ನೆಲೆ ರೇವಣ್ಣನ ಟೆಂಪಲ್ ರನ್ ಮುಂದುವರೆದಿದೆ. ಬರಿಗಾಲಲ್ಲಿ ದೇವಾಲಯಗಳನ್ನ ಸುತ್ತುತ್ತಿರೋ ರೇವಣ್ಣ ಭಾನುವಾರ (ಜುಲೈ 21, 2019) ಮತ್ತೆ ಶೃಂಗೇರಿ ಶಾರದಾಂಬೆಗೆ ವಿಶೇಷ ಪೂಜೆ ಸಲ್ಲಿಸಿದ್ದಾರೆ.

ಬೆಳಗಿನ ಜಾವ 5.30ಕ್ಕೆ ಚಿಕ್ಕಮಗಳೂರು ಜಿಲ್ಲೆಯ ಶೃಂಗೇರಿಗೆ ಬಂದ ರೇವಣ್ಣ ಶಾರದಾಂಬೆ ಹಾಗೂ ತೋರಣ ಗಣಪತಿಯಲ್ಲಿ ವಿಶೇಷ ಪೂಜೆ ಸಲ್ಲಿಸಿದ್ದಾರೆ. ಪೂಜೆ ಸಲ್ಲಿಸಿದ ಬಳಿಕ ಬೆಳಗ್ಗೆ 7.30ಕ್ಕೆ ರೇವಣ್ಣ ಹಿಂದಿರುಗಿದ್ದಾರೆ.

ಜುಲೈ 9 ರಂದಷ್ಟೇ ರೇವಣ್ಣ ಶೃಂಗೇರಿಗೆ ಬಂದಿದ್ದರು. ಒಟ್ಟಾರೆ ಜುಲೈ ತಿಂಗಳಲ್ಲೇ ಮೂರು ಬಾರಿ ರೇವಣ್ಣ ಶೃಂಗೇರಿಗೆ ಭೇಟಿ ನೀಡಿದ್ದಾರೆ. ಅಧಿಕಾರ ಹಾಗೂ ಅದರ ಉಳಿವಿಗಾಗಿ ಹಲವು ಬಾರಿ ಶೃಂಗೇರಿ ಶಾರದಾಂಬೆಗೆ ರೇವಣ್ಣ ಪೂಜೆ ಸಲ್ಲಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ.

ಇನ್ನು, ಕಳೆದ ಒಂದೂವರೆ ವರ್ಷದಲ್ಲಿ ದೇವೇಗೌಡರ ಕುಟುಂಬ ಚಿಕ್ಕಮಗಳೂರು ಜಿಲ್ಲೆ ಶೃಂಗೇರಿ ಶಾರದಾಂಬೆಯಲ್ಲಿ ಹಲವು ಯಾಗ-ಯಜ್ಞಗಳನ್ನು ನಡೆಸಿದೆ.