ಟ್ಯಾಂಕರ್‌ ಲಾರಿ ಅವಘಡ: ಶೀಘ್ರ ಪರಿಹಾರಕ್ಕೆ ಆಗ್ರಹ

ಕಡೂರು: ಗಿರಿಯಾಪುರ ಗ್ರಾಮದಲ್ಲಿ ಇತ್ತೀಚೆಗೆ ಸಂಭವಿಸಿದ ಟ್ಯಾಂಕರ್‌ ಲಾರಿ ಬೆಂಕಿ ಅವಘಡದಲ್ಲಿ ಆಸ್ತಿ ಕಳೆದುಕೊಂಡ ಸಾರ್ವಜನಿಕರಿಗೆ ಜಿಲ್ಲಾಧಿಕಾರಿಗಳು ಪರಿಹಾರ ಕೊಡಿಸುವಲ್ಲಿ ಶ್ರಮಿಸಲಿ ಎಂದು ಬಿಜೆಪಿ ಹಿಂದುಳಿದ ವರ್ಗಗಳ ಭಾಗದ ಮುಖಂಡ ಮತಿಘಟ್ಟ ಎಂ.ಪಿ. ನಾರಾಯಣಸ್ವಾಮಿ ಒತ್ತಾಯಿಸಿದ್ದಾರೆ.

ಅವರು ಬುಧವಾರ ಮಾಧ್ಯಮಗಳೊಂದಿಗೆ ಮಾತನಾಡಿ, ಬೆಂಕಿ ಅವಘಡ ಸಂಭವಿಸಿದ ಸನಿಹದಲ್ಲೇ ಇರುವ ನಾಲ್ಕೈದು ಮನೆಗಳಿಗೆ ಹಾನಿಯಾಗಿದ್ದು, ಗ್ರಾಮ ಪಂಚಾಯಿತಿಯ ಆಸ್ತಿಯೂ ನಾಶವಾಗಿದೆ. ಇದಕ್ಕೆ ಸರಕಾರದಿಂದ ಪರಿಹಾರ ಕೊಡಿಸುವಲ್ಲಿ ಜಿಲ್ಲಾಧಿಕಾರಿಗಳು ತಕ್ಷ ಣವೇ ಕಾರ್ಯಪ್ರವೃತ್ತರಾಗಬೇಕು. ಪೆಟ್ರೋಲ್‌ ಮತ್ತಿತರ ಇಂಧನವನ್ನು ಸಾಗಿಸುವ ಲಾರಿಗಳನ್ನು ಜನನಿಬಿಡ ಮಾರ್ಗಗಳಿಂದ ಹೊರತಾಗಿ ಪ್ರತ್ಯೇಕ ಮಾರ್ಗದಲ್ಲಿ ಸಂಚರಿಸಲು ಅನುವು ಮಾಡಿಕೊಡಬೇಕು. ಪೆಟ್ರೋಲಿಯಂ ಕಾಪೋರ್‍ರೇಷನ್‌ ಇಲಾಖೆ ಜತೆ ಜಿಲ್ಲಾಧಿಕಾರಿಗಳು ಈ ಸಂಬಂಧ ಚರ್ಚಿಸಿ ಅಂತಹ ಲಾರಿಗಳಿಗೆ ಮಾರ್ಗ ನಿಗಧಿಪಡಿಸಲು ಒತ್ತಾಯಿಸಿದ್ದಾರೆ.

ಸಾರಿಗೆಯೇತರ ಮತ್ತು ಸರಕು ಸಾಗಾಣಿಕೆಯ ವಾಹನಗಳಿಗೆ ವೇಗ ನಿಯಂತ್ರಕ ಅಳವಡಿಸಬೇಕು. ಈ ಲಾರಿಗಳು ಸಂಚರಿಸುವ ಮಾರ್ಗದಲ್ಲಿ ಅಪಾಯಕಾರಿ ತಿರುವುಗಳಿದ್ದರೆ ಅಲ್ಲಿ ಸೂಚನಾಫಲಕಗಳನ್ನು ಹಾಕಬೇಕು. ಇದರಿಂದ ಅಪಘಾತ ಮತ್ತಿತರ ದುರಂತಗಳನ್ನು ತಡೆಯಬಹುದು ಎಂದಿದ್ದಾರೆ.

ಗಿರಿಯಾಪುರ ಗ್ರಾಮದಲ್ಲಿ ಲಾರಿ ಅಪಘಾತವಾದ ಸ್ಥಳದಲ್ಲಿ ಜಡ್‌ ಆಕಾರದಲ್ಲಿ ತಿರುವು ಇದೆ. ಲೋಕೋಪಯೋಗಿ ಇಲಾಖೆಯು ಈ ತಿರುವನ್ನು ನೇರ ರಸ್ತೆಯನ್ನಾಗಿ ಮಾಡಲು ಅವಕಾಶವಿದೆ. ಆ ನಿಟ್ಟಿನಲ್ಲಿ ಸ್ಥಳ ಪರಿಶೀಲನೆ ನಡೆಸಿ ಇಲಾಖೆ ಕೂಡಲೇ ರಸ್ತೆಯನ್ನು ನೇರ ಮಾಡಿದರೆ ಭವಿಷ್ಯದಲ್ಲಿ ನಡೆಯಬಹುದಾದ ಇನ್ನಷ್ಟು ಅನಾಹುತಗಳನ್ನು ತಡೆಯಬಹುದು ಎಂದು ಹೇಳಿದ್ದಾರೆ.