ಅರಳೀಕಟ್ಟೆ ಬಳಿ ಕರಡಿ ದಿಢೀರ್‌ ಪ್ರತ್ಯಕ್ಷ : ಹೌಹಾರಿದ ಜನ

ಕಡೂರು : ಪಟ್ಟಣದ ಬೆಂಕಿ ಕಾಲೊನಿ ಬಡಾವಣೆಯ ಅರಳೀಕಟ್ಟೆ ಬಳಿ ಭಾನುವಾರ ತಡರಾತ್ರಿ ಕರಡಿಯೊಂದು ದಿಢೀರ್‌ ಪ್ರತ್ಯಕ್ಷ ವಾಗಿ ನಾಗರಿಕರನ್ನು ಕೆಲ ಕಾಲ ದಂಗುಬಡಿಸಿತು.

ರಾತ್ರಿ ಸುಮಾರು 11.30ರಲ್ಲಿ ಪಟ್ಟಣಕ್ಕೆ 2 ಕಿ.ಮೀ. ದೂರವಿರುವ ತುರುವನಹಳ್ಳಿ ಕಡೆಯಿಂದ ಬೆಂಕಿ ಕಾಲೊನಿಗೆ ಬಂದು ಸೇರುವ ಕಿರು ರಸ್ತೆಯಲ್ಲಿ ಕರಡಿ ನಡೆದುಕೊಂಡು ಬಂದಿದೆ. ಅರಳೀಕಟ್ಟೆ ಬಳಿ ಇದ್ದ ಅಜರುದ್ದೀನ್‌, ರಿಯಾಜ್‌, ತನ್ವೀರ್‌ ಮತ್ತಿತರ ಸ್ನೇಹಿತರು ನೋಡಿ ಕರಡಿ ಕರಡಿ ಎಂದು ಕೂಗಿದ್ದು, ಜನರು ಹೊರಬಂದು ನೋಡಿ ಹೌಹಾರಿದ ಜನ ತಮ್ಮ ಮನೆಬಾಗಿಲು ಹಾಕಿಕೊಂಡಿದ್ದಾರæ.

ಜನರ ಗದ್ದಲಕ್ಕೆ ಹೆದರಿ ಕರಡಿ ತಕ್ಷ ಣವೇ ಬೆಂಕಿ ಕಾಲೊನಿ ಮಗ್ಗುಲಲ್ಲಿ ನಿರ್ಮಾಣ ಹಂತದಲ್ಲಿರುವ ವಿಜಯಲಕ್ಷ್ಮಿ ಬಡಾವಣೆಯೊಳಗೆ ಓಡಿ ಮರೆಯಾಗಿದೆ.

ಬೆಂಕಿ ಕಾಲೊನಿಗೆ ಅನತಿ ದೂರದಲ್ಲಿ ತುರುವನಹಳ್ಳಿ ಗುಡ್ಡ ಇದೆ. ಇಲ್ಲಿ ಕರಡಿ ಚಿರತೆ ಈಗಲೂ ಓಡಾಡುತ್ತವೆ ಎಂಬುದನ್ನು ನೋಡಿದ ಜನ ಹೇಳುತ್ತಾರೆ.