ಕಡೂರು ಪುರಸಭೆ ಆಡಳಿತ ಬಿಜೆಪಿಗೆ: ಬೆಳ್ಳಿಪ್ರಕಾಶ

ಕಡೂರು : ಪುರಸಭೆಗೆ ಇದೇ 29ರಂದು ನಡೆಯುವ ಚುನಾವಣೆಯಲ್ಲಿ ಬಿಜೆಪಿ ಅಧಿಕಾರ ಹಿಡಿಯಲಿದೆ ಎಂದು ಶಾಸಕ ಬೆಳ್ಳಿಪ್ರಕಾಶ್‌ ಹೇಳಿದರು.

ಅವರು ತಮ್ಮ ಕಚೇರಿಯಲ್ಲಿ ಶುಕ್ರವಾರ ಪುರಸಭೆ ಚುನಾವಣೆಗೆ ಪಕ್ಷ ದ 6 ಅಂಶಗಳ ಕಾರ್ಯಕ್ರಮದ ಪ್ರಣಾಳಿಕೆ ಬಿಡುಗಡೆ ಮಾಡಿ, ನಂತರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಪುರಸಭೆಯ ಚುನಾವಣೆಗೆ ಅಭಿವೃದ್ಧಿಯೇ ನಮ್ಮ ಗುರಿ. ಸಹಕಾರವೇ ನಮ್ಮ ಶಕ್ತಿ ಯಾಗಿದೆ. ಕಡೂರು ಬಿಜೆಪಿ ನಗರ ಘಟಕವು 6 ಅಂಶಗಳನ್ನು ಮುಂದಿಟ್ಟುಕೊಂಡು ಮತದಾರರ ಮುಂದೆ ಹೋಗಲಿದ್ದೇವೆ. ಅವುಗಳಲ್ಲಿ ಪಾರದರ್ಶಕ ಮತ್ತು ಭ್ರಷ್ಟಾಚಾರ ಮುಕ್ತ ಆಡಳಿತ, ಕುಡಿಯುವ ನೀರು, ರಸ್ತೆ, ಒಳಚರಂಡಿ, ಬೀದಿದೀಪ, ಸ್ವಚ್ಛತೆಗೆ ಆದ್ಯತೆ, ನಿವಾಸಿಗಳ ಪುರಸಭೆ ಕೆಲಸಕಾರ್ಯಗಳಿಗೆ ತ್ವರಿತಕ್ರಮ, ವಸತಿಹೀನ ಬಡಕುಟುಂಬಗಳ ವಸತಿಗೆ ವಿಶೇಷ ಆದ್ಯತೆ, ಬಡವರ ಅಲ್ಪಸಂಖ್ಯಾತರ ಆಸ್ತಿಗಳ ರಕ್ಷ ಣೆ, ಹಸಿರು ನಗರದ ಉದ್ದೇಶಗಳಿರುವ 6 ಅಂಶಗಳ ಪ್ರಣಾಳಿಕೆಯನ್ನು ಮುಂದಿಟ್ಟುಕೊಂಡು ಮತಯಾಚಿಸಲಿದ್ದೇವೆ ಎಂದರು.

ಇರುವ 23 ವಾರ್ಡ್‌ಗಳಲ್ಲಿ 18 ವಾರ್ಡ್‌ಗಳಲ್ಲಿ ಬಿಜೆಪಿ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿದ್ದು, ಮತದಾರರು ಈ ಬಾರಿ ಬಿಜೆಪಿಯನ್ನು ಗೆಲ್ಲಿಸಲಿದ್ದಾರೆ. ಕೇಂದ್ರದಲ್ಲಿ ಬಿಜೆಪಿ ಸರಕಾರ ಮತ್ತೊಮ್ಮೆ ಗೆಲ್ಲುವುದರ ಮೂಲಕ ಐತಿಹಾಸಿಕ ಸಾಧನೆ ಮಾಡಿದ್ದು ಇದು ಸಹ ನಮಗೆ ವರದಾನವಾಗಲಿದೆ ಎಂದರು.

ಜಿ.ಪಂ. ಸದಸ್ಯ ಕೆ.ಆರ್‌.ಮಹೇಶ್‌ ಒಡೆಯರ್‌, ತಾ.ಪಂ. ಸದಸ್ಯ ಜಿಗಣೆಹಳ್ಳಿ ಮಂಜು, ಲಕ್ಕಪ್ಪ, ಚಂದ್ರಶೇಖರ್‌ ಅಡಕೆ, ರಾಜನಾಯ್ಕ, ಶಾಮಿಯಾನ ಚಂದ್ರು, ಚಿನ್ನರಾಜು ಮತ್ತು ಮಚ್ಚೇರಿ ಓಂಕಾರಪ್ಪ ಇದ್ದರು.