ಜಾರಿ ಬಿದ್ದು ಕಾಡುಕೋಣ ಸಾವು

ಕಳಸ : ಇಡಕಿಣಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಗದ್ದೆಮನೆ ಸಮೀಪ ಕಾಡುಕೋಣವೊಂದು ಆಕಸ್ಮಿಕವಾಗಿ ಕಾಲು ಜಾರಿ ಬಿದ್ದು ಮೃತ ಪಟ್ಟ ಘಟನೆ ನಡೆದಿದೆ.

ಸುಮಾರು ಏಳು ವರ್ಷ ವಯಸ್ಸಿನ ಕಾಡುಕೋಣ ಶನಿವಾರದ ರಾತ್ರಿ ವೇಳೆಯಲ್ಲಿ ತೋಟದಿಂದ ರಸ್ತೆಗೆ ಇಳಿಯುವ ಸಂದರ್ಭ¨ ಕಾಲು ಜಾರಿ ರಸ್ತೆ ಬದಿಯ ಚರಂಡಿಗೆ ಬಿದ್ದಿದೆ.ಪರಿಣಾಮ ಕಾಡುಕೋಣವು ಸ್ಥಳದಲ್ಲಿಯೇ ಮೃತಪಟ್ಟಿದೆ. ಸ್ಥಳಿಯರು ಕಳಸ ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದ್ದಾರೆ. ಸ್ಥಳಕ್ಕೆ ಅರಣ್ಯ ಸಿಬ್ಬಂದಿಗಳು ಭೇಟಿ ನೀಡಿ ಪರಿಶೀಲನೆ ಮಾಡಿದ್ದಾರೆ.

ಕಾಡು ಕೋಣದ ಮೃತದೇಹದ ಮರಣೋತ್ತರ ಪರೀಕ್ಷೆಗೆ ಅರಣ್ಯ ಇಲಾಖೆ ಹರಸಹಾಸ ಪಡುವಂತಾಯಿತು.ಕಳಸ ತಾಲೂಕಿನಲ್ಲಿ ಯಾರೊಬ್ಬರೂ ಪಶು ವೈದ್ಯಾಧಿಕಾರಿಗಳು ಇಲ್ಲದೆ ಇರುವ ಪರಿಣಾಮ ಭಾನುವಾರ ಮರಣೋತ್ತರ ಪರೀಕ್ಷೆ ನಡೆಸಲು ಸಾಧ್ಯವಾಗಲಿಲ್ಲ.ಸೋಮವಾರ ದಿನ ಬೇರೆಲ್ಲಿಂದವಾದರೂ ಪಶು ವೈದ್ಯರನ್ನು ಕರೆಸಿ ಮರಣೋತ್ತರ ಪರೀಕ್ಷೆ ನಡೆಸಬೇಕಾಗಿದೆ. ಹೀಗಾಗಿ ಕಾಡುಕೋಣದ ಮೃತದೇಹವನ್ನು ದಿನವಿಡೀ ರಸ್ತೆಯಲ್ಲಿಟ್ಟು ಕಾಯಬೇಕಾದ ಸ್ಥಿತಿ ಅರಣ್ಯ ಇಲಾಖೆಯದ್ದಾಯಿತು.