ಶೃಂಗೇರಿಯಲ್ಲಿ ಎರಡನೇ ದಿನವೂ ಸುರಿದ ರೇವತಿ ಮಳೆ

ಶೃಂಗೇರಿ : ತಾಲೂಕಿನಾದ್ಯಾಂತ ರೇವತಿ ಮಳೆ ಎರಡನೇ ದಿನವೂ ಆಗಮಿಸಿದ್ದು,ಗುಡುಗು,ಸಿಡಿಲು ಹಾಗೂ ರಭಸವಾದ ಗಾಳಿ ನಡುವೆ ಸಾಮಾನ್ಯ ಮಳೆಯಾಗಿದೆ.

ಶನಿವಾರ ಮಧ್ಯಾಹ್ನ ನಂತರ ಮೋಡ ಕವಿದು,ಒಮ್ಮೆಲೆ ಆರಂಭವಾದ ಮಳೆ ಅಲ್ಪ ಸಮಯ ಮಾತ್ರ ಸುರಿಯಿತು.ಶುಕ್ರವಾರ ಹಾಗೂ ಶನಿವಾರ ಒಟ್ಟು 4 ಮಿಮೀ ಮಳೆ ದಾಖಲಾಗಿದೆ. ಶೃಂಗೇರಿ ತೆಕ್ಕೂರು ರಸ್ತೆಯ ಅಗ್ನಿಶಾಮಕ ಕಚೇರಿ ಸಮೀಪದ ಭಾರಿ ಗಾತ್ರದ ಮರಕ್ಕೆ ಸಿಡಿಲು ಬಡಿದು ಬೆಂಕಿ ಹೊತ್ತಿಕೊಂಡಿತ್ತು.ಯಾವುದೇ ಅನಾಹುತ ಸಂಭವಿಸಿಲ್ಲ.ಪಟ್ಟಣದ ಸಂತೆ ಮಾರುಕಟ್ಟೆ ಬಳಿ ಆಟೊ ನಿಲ್ದಾಣಕ್ಕೆ ನೀರು ನುಗ್ಗಿದ್ದು,ಸಂಚಾರ ಅಸ್ತವ್ಯಸ್ತವಾಗಿತ್ತು.ಈ ವರ್ಷ ರಸ್ತೆ ಅಗಲಿಕರಣವಾಗಿದ್ದು,ಆಟೊ ನಿಲ್ದಾಣ ತಗ್ಗಾಗಿದ್ದು,ಮಳೆಯ ನೀರು ಹರಿಯದೇ ಆಟೊ ನಿಲ್ಧಾಣವನ್ನು ಸುತ್ತುವರಿದಿತ್ತು.ತಾಲೂಕಿನ ಗ್ರಾಮೀಣ ಭಾಗದಲ್ಲೂ ಬಹುತೇಕ ಕಡೆ ಸಾಮಾನ್ಯ ಮಳೆಯಾಗಿದೆ.