ಪಿಸಿ ಮೇಲೆ ಕಾರು ಹತ್ತಿಸಲು ಯತ್ನ

ಚಿಕ್ಕಮಗಳೂರು : ಸಂಚಾರ ಠಾಣೆ ಪೊಲೀಸರು ನಗರದ ಬೇಲೂರು ರಸ್ತೆಯಲ್ಲಿ ವಾಹನ ತಪಾಸಣೆ ನಡೆಸುತ್ತಿದ್ದ ಸಂದರ್ಭ ಕಾರು ಚಾಲಕನೊಬ್ಬ ಕಾನ್ಸ್‌ಟೇಬಲ್‌ ಮೇಲೆ ಕಾರು ಹತ್ತಿಸಲು ಯತ್ನಿಸಿದ್ದು, ಕಾನ್ಸ್‌ಟೇಬಲ್‌ ಕರುಣ ಅವರ ಎರಡೂ ಕೈ, ಸೊಂಟಕ್ಕೆ ಪೆಟ್ಟು ಬಿದ್ದಿದೆ.

ಕಾರು ಚಾಲಕ ತೇಗೂರು ಗ್ರಾಮದ ಬಿ.ಎಸ್‌.ಆದಿತ್ಯ (ಸ್ವಂತ ಊರು ಆವುತಿ ಹೋಬಳಿ ಬೆರಣಗೋಡು)ನನ್ನು ಪೊಲೀಸರು ಬಂಧಿಸಿ ಕಾರು ವಶಕ್ಕೆ ತೆಗೆದುಕೊಂಡಿದ್ದು, ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ. ಡಿ.7ರಂದು ಘಟನೆ ನಡೆದಿದ್ದು, ಆರೋಪಿಯನ್ನು ಸೋಮವಾರ ಬಂಧಿಸಲಾಗಿದೆ.

ಸಂಚಾರ ಠಾಣೆ ಪಿಎಸೈ ಕೆ.ಆರ್‌.ರಮ್ಯ, ಕಾನ್ಸ್‌ಟೇಬಲ್‌ ಕೆ.ಬಿ.ಕರುಣ ನಗರದ ಬೇಲೂರು ರಸ್ತೆಯ ಎಸ್‌ಟಿಜೆ ಕಾಲೇಜು ಮುಂಭಾಗ ವಾಹನ ತಪಾಸಣೆ ನಡೆಸುತ್ತಿದ್ದರು. ಈ ಸಂದರ್ಭ ಬೇಲೂರು ಕಡೆಯಿಂದ ಅತ್ಯಂತ ವೇಗವಾಗಿ ಬಂದ ಕಾರನ್ನು ನಿಲ್ಲಿಸುವಂತೆ ಕರುಣ ಸೂಚಿಸಿದ್ದರು.

ವಾಹನದ ಚಾಲಕ ಕಾರನ್ನು ನಿಲ್ಲಿಸಿ ತಕ್ಷಣ ಏಕಾಏಕಿ ರಭಸದಿಂದ ಸ್ವಲ್ಪ ದೂರ ತೆಗೆದುಕೊಂಡು ಹೋಗಿ ಪುನಃ ಅದೇ ರಭಸದಲ್ಲಿ ವಾಪಸ್‌ ಬಂದು ಕರುಣ ಅವರ ಮೇಲೆ ಕಾರನ್ನು ಹತ್ತಿಸಲು ಯತ್ನಿಸಿದ್ದ. ಕರುಣ ತಪ್ಪಿಸಿಕೊಳ್ಳಲು ಪ್ರಯತ್ನಿಸಿದ್ದು, ಕಾರು ಗುದ್ದಿ ಎರಡೂ ಕೈ ಮತ್ತು ಸೊಂಟಕ್ಕೆ ಪೆಟ್ಟು ಬಿದ್ದಿದೆ. ಈ ಬಗ್ಗೆ ನಗರ ಪೊಲೀಸ್‌ ಠಾಣೆಯಲ್ಲಿ ದೂರು ದಾಖಲಾಗಿತ್ತು.

ನಗರ ಸರ್ಕಲ್‌ ಇನ್ಸ್‌ಪೆಕ್ಟರ್‌ ಕೆ.ಇ.ನಿರಂಜನ್‌ಕುಮಾರ್‌, ಪಿಎಸೈ ಕೆ.ಆರ್‌.ರಘು, ಸಿಬ್ಬಂದಿ ಲೋಹಿತ್‌ ಸೋಮವಾರ ಚಾಲಕನನ್ನು ಬಂಧಿಸಿ ಕಾರು ವಶಪಡಿಸಿಕೊಂಡಿದ್ದು, ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ.