ಗಾಳಿ-ಮಳೆಗೆ ಮನೆ ಸಹಿತ ವಾಹನ ಜಖಂ

ಮೂಡಿಗೆರೆ: ಪಟ್ಟಣದಲ್ಲಿ ಸೋಮವಾರ ಸಂಜೆ ಸುರಿದ ಗಾಳಿ ಮಳೆಗೆ ಪಟ್ಟಣದ ಛತ್ರಮೈದಾನದ ಸಮೀಪ 6 ಬಾಡಿಗೆ ಮನೆಗಳ ಮೇಲ್ಛಾವಣಿಯ ಆಸ್ಪರ್‌ ಶೀಟ್‌ ಕುಸಿದು ಬಿದ್ದು, ಓರ್ವ ಮಹಿಳೆಗೆ ಗಂಭೀರ ಗಾಯವಾಗಿದೆ.

ಪಟ್ಟಣದ ಛತ್ರ ಮೈದಾನದ ಸಮೀಪ ಎಸ್‌.ಪಿ.ರಾಜು ಎಂಬುವರ ಬಾಡಿಗೆ ಮನೆಯಲ್ಲಿ ಮಲ್ಲೇಶ್‌, ಶಿವಪ್ರಕಾಶ್‌, ಪಾರ್ವತಮ್ಮ, ಶಿವರಾಜ್‌ ನಾಯಕ್‌, ಗೀತಾ, ಪ್ರಭಾಕರ್‌ ಎಂಬುವರು ವಾಸವಿದ್ದರು. ಸೋಮವಾರ ಸುರಿದ ಮಳೆ, ಗಾಳಿಯಿಂದ ಆರು ಮನೆಯ ಮೇಚ್ಛಾವಣಿ ನೆಲಕ್ಕುರುಳಿದೆ. ಮನೆಯೊಳಗಿದ್ದ ಎಲ್‌ಇಡಿ ಟಿವಿ, ಮಿಕ್ಸಿ, ಫ್ರಿಜ್‌, ಡಿಶ್‌ ಸೇರಿದಂತೆ ಲಕ್ಷಾಂತರ ಮೌಲ್ಯದ ಗೃಹೋಪಯೋಗಿ ವಸ್ತುಗಳು ಪುಡಿಯಾಗಿವೆ.

ಮಲ್ಲೇಶ್‌ ಎಂಬುವರ ಅತ್ತೆ ಕ್ರಿಶ್ಟಿನಾ (60) ಎಂಬುವರ ತಲೆ ಮೇಲೆ ಮೇಲ್ಛಾವಣಿಯ ಶೀಟ್‌ ಬಿದ್ದು ಗಂಭೀರ ಗಾಯವಾಗಿದೆ. ಕ್ರಿಶ್ಟಿನಾ ಅವರನ್ನು ಮೂಡಿಗೆರೆ ಎಂಜಿಎಂ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಸ್ಥಳಕ್ಕೆ ಗ್ರಾಮ ಲೆಕ್ಕಿಗ ಪ್ರದೀಪ್‌ ಕುಮಾರ ಭೇಟಿ ನೀಡಿ ಪರಿಶೀಲನೆ ನಡೆಸಿ ಹಾನಿ ಪ್ರಮಾಣದ ಬಗ್ಗೆ ವರದಿ ಸಲ್ಲಿಸುವುದಾಗಿ ತಿಳಿಸಿದರು.

ಅರಣ್ಯ ಇಲಾಖೆ ವಾಹನ ಜಖಂ: ಪಟ್ಟಣದಲ್ಲಿ ಸೋಮವಾರ ಸುರಿದ ಮಳೆ, ಗಾಳಿಯಿಂದ ತಾಲೂಕು ಕಚೇರಿ ಎದುರು ಚುನಾವಣೆ ಕಾರ್ಯ ನಿಮಿತ್ತ ನಿಲ್ಲಿಸಿದ್ದ ಅರಣ್ಯ ಇಲಾಖೆ ವಾಹನದ ಮೇಲೆ ಮರದ ರೆಂಬೆ ಬಿದ್ದು ವಾಹನ ಜಖಂಗೊಂಡಿದೆ.