ವೈರಲ್‌ಫೀವರ್‌ಗೆ ಮಲಗಿದ ಗೌಡನಹಳ್ಳಿ

ಚಿಕ್ಕಮಗಳೂರು : ತಾಲೂಕಿನ ಗೌಡನಹಳ್ಳಿಯಲ್ಲಿ ಜ್ವರ ಬಾಧೆ ವ್ಯಾಪಕವಾಗಿದ್ದು ಇಬ್ಬರು ಬಾಲಕರಿಗೆ ಡೆಂಗೆ, ಬಾಲಕಿ ಸೇರಿ ಇಬ್ಬರಿಗೆ ಚಿಕುನ್‌ಗುನ್ಯಾ ಪತ್ತೆಯಾಗಿದ್ದು ಚಿಕಿತ್ಸೆ ಪಡೆದು ಗುಣಮುಖರಾಗುತ್ತಿದ್ದಾರೆ.

ಅಂಬಳೆ ಕೈಗಾರಿಕಾ ವಸಾಹತು ಪ್ರದೇಶಕ್ಕೆ ಹೊಂದಿಕೊಂಡಂತಿರುವ ಗೌಡನಹಳ್ಳಿ ಗ್ರಾಮದಲ್ಲಿ ನೂರಾರು ಮಂದಿ ಚಳಿಜ್ವರ, ಕೀಲುನೋವು, ತಲೆನೋವಿನಿಂದ ಬಳಲುತ್ತಿದ್ದಾರೆ. ಅದರಲ್ಲಿ ಬಹುತೇಕರಿಗೆ ವೈರಲ್‌ಫೀವರ್‌ ಎಂದು ವೈದ್ಯರು ತಿಳಿಸಿದ್ದು ಜಿಲ್ಲಾಸ್ಪತ್ರೆಗೆ ದಾಖಲಾಗಿದ್ದ ಪ್ರಸನ್ನಕುಮಾರ್‌ (13) ಮತ್ತು ಹೇಮಾವತಿ (12)ಅವರಿಗೆ ಡೆಂಗೆ ಸಾಬೀತಾಗಿದೆ. ಗ್ರಾಮದ ಲೀಲಾವತಿ(20), ಭೂಮಿಕಾ(5) ಚಿಕೂನ್‌ ಗುನ್ಯಾಕ್ಕೆ ತುತ್ತಾಗಿರುವುದು ಪತ್ತೆಯಾಗಿದೆ ಎಂದು ವೈದ್ಯಕೀಯ ಕ್ಯಾಂಪ್‌ ಗೆ ಭೇಟಿ ನೀಡಿದ್ದ ಬಿಜೆಪಿ ಮುಖಂಡರು ಮತ್ತು ಪ್ರಕರ್ತರ ತಂಡಕ್ಕೆ ಎಎನ್‌ಎಂ ಮೀನಾಕ್ಷಮ್ಮ ತಿಳಿಸಿದರು.

ಅಂಬಳೆ ಗ್ರಾಮಪಂಚಾಯಿತಿ ವ್ಯಾಪ್ತಿಯ ಗೌಡನಹಳ್ಳಿಯಲ್ಲಿ 280ಮನೆಗಳಿದ್ದು ಅದರಲ್ಲಿ 60ಕ್ಕೂ ಹೆಚ್ಚು ಪರಿಶಿಷ್ಟ ಜಾತಿವರ್ಗದವರ ಮನೆಗಳಿವೆ. ಮೂರುತಿಂಗಳಿಂದ ಗ್ರಾಮದಲ್ಲಿ ರೋಗ ವ್ಯಾಪಿಸಿದ್ದು ಜಿ.ಪಂ., ತಾ.ಪಂ., ಗ್ರಾ.ಪಂ., ಆರೋಗ್ಯ ಇಲಾಖೆ ಪ್ರತಿನಿಧಿಗಳು ಭೇಟಿ ನೀಡಿ ಪರಿಶೀಲಿಸಿದ್ದರೂ ತಹಬದಿಗೆ ಬಂದಿಲ್ಲ ಎಂದು ಗ್ರಾಮಪಂಚಾಯಿತಿ ಸದಸ್ಯೆ ದಮಯಂತಿ ಪುತ್ರ ಸುರೇಶ್‌ ಅವಲತ್ತುಕೊಂಡರು.

ಗೌಡನಹಳಿ ಶಿಬಿರಕ್ಕೆ ಬಂದಿದ್ದ 85ರ ಸಣ್ಣಮ್ಮ 15ದಿನದಿಂದ ಕಾಲುನೋವಿನಿಂದ ಊದಿದ್ದೂ ಜ್ವರ ಚಳಿ ಕಡಿಮೆಯಾಗಿಲ್ಲ ಎಂದರೆ, 9ರ ಬಾಲಕಿ ಜ್ಯೋತಿ ಜ್ವರ¨ತಾಪ ತಲೆನೋವು ಬೇನೆಯಿಂದ ಬಳಲುತ್ತಿರುವುದಾಗಿ ಹೇಳಿದರು.

ಕಾಲೋನಿಯ ಗಾರೆಕೆಲಸಗಾರ ಕುಟುಂಬದ ಮೀನಾಕ್ಷಿ ಅವರ ಮೂರುಮಕ್ಕಳು, ಪತಿ, ತಮ್ಮ ಸೇರಿದಂತೆ ಐದೂಮಂದಿ ರೋಗದಿಂದ ಬಳಲಿದವರೆ. ಪಕ್ಕದ ಮನೆಯ ಹರ್ಷಿತಾ(20) ಸಹ ಚಿಕಿತ್ಸೆ ಪಡೆದವರೆ. ಇಲ್ಲಿ ಬಹುತೇಕ ಎಲ್ಲರ ಮನೆಯಲ್ಲೂ ಒಂದಕ್ಕಿಂತ ಹೆಚ್ಚುಮಂದಿ ರೋಗಪೀಡಿತರಾಗಿದ್ದು ಚಿಕಿತ್ಸೆಯ ನಂತರವೂ ಸಹ ಪೂರ್ಣಗುಣಮುಖರಾಗಿಲ್ಲ. ಮುಖಂಡರಾದ ದೀಪಕ್‌ ದೊಡ್ಡಯ್ಯ, ವೆಂಕಟೇಶ್‌ ಮತ್ತಿತರರು ಹಾಜರಿದ್ದರು.