ಸಾಲಬಾಧೆ: ರೈತ ಆತ್ಮಹತ್ಯೆ

ಹಿರಿಯೂರು : ಸಾಲಕ್ಕೆ ಬೇಸತ್ತು ತಾಲೂಕಿನ ಕರಿಯಾಲ ಗ್ರಾಮದ ರೈತನೊಬ್ಬ ಮನೆಯಲ್ಲಿ ನೇಣು ಬಿಗಿದುಕೊಂಡು ಸಾವಿಗೆ ಶರಣಾದ ಘಟನೆ ಬುಧವಾರ ನಡೆದಿದೆ.

ಗ್ರಾಮದ ಭೂತೇಶ (28) ಆತ್ಮಹತ್ಯೆ ಮಾಡಿಕೊಂಡ ರೈತ. ಐದು ಬಾರಿ ಕೊಳವೆ ಬಾವಿ ಕೊರೆಸುವ ಸಂಬಂಧ ಜನರಿಂದ ಕೈಸಾಲ ಮಾಡಿದ್ದು, ಮಳೆ ಇಲ್ಲದೆ, ಕೊಳವೆ ಬಾವಿಯಲ್ಲೂ ನೀರಿಲ್ಲದೆ ಬಿತ್ತನೆಯಾಗಿದ್ದ ಶೇಂಗಾ ಮತ್ತು ಈರುಳ್ಳಿ ಒಣಗಿದ್ದರಿಂದ ಆತ್ಮಹತ್ಯೆ ಮಾಡಿಕೊಂಡಿರುವುದಾಗಿ ಸಂಬಂಧಿಕರು ಠಾಣೆಗೆ ದೂರು ಸಲ್ಲಿಸಿರುವುದಾಗಿ ಸಿಪಿಐ ಸುದರ್ಶನ್‌ ತಿಳಿಸಿದ್ದಾರೆ.