ಬಯಲಾಂಜನೇಯಗೆ ವೀಳ್ಯದೆಲೆ, ತಗ್ಗಿನ ಹನುಮಪ್ಪಗೆ ಬೆಣ್ಣೆ ಅಲಂಕಾರ

ಚಿತ್ರದುರ್ಗ : ಶ್ರಾವಣ ಶನಿವಾರದ ಅಂಗವಾಗಿ ಬಹುತೇಕ ಎಲ್ಲಾ ಆಂಜನೇಯ ದೇವಸ್ಥಾನಗಳಲ್ಲಿ ವಿಶೇಷ ಅಲಂಕಾರ ಮಾಡಿ ಪೂಜೆ ಸಲ್ಲಿಸಲಾಯಿತು.

ಹೊಳಲ್ಕೆರೆ ರಸ್ತೆ ಐದನೇ ಮೈಲಿಯ ಶ್ರೀಬಯಲಾಂಜನೇಯ ಸ್ವಾಮಿಗೆ ವೀಳ್ಯದೆಲೆ ಹಾಗೂ ಹಳದಿ, ಬಿಳಿ, ಕೆಂಪು ಸೇವಂತಿಗೆ ಸೇರಿದಂತೆ ಬಗೆ ಬಗೆಯ ಪುಷ್ಪಗಳಿಂದ ಅಲಂಕಾರ ಮಾಡಿ ವಿಶೇಷ ಪೂಜೆ ನೆರವೇರಿಸಿದರು. ಬಳಿಕ ಭಕ್ತಾದಿಗಳಿಗೆ ಅನ್ನಸಂತರ್ಪಣೆ ವ್ಯವಸ್ಥೆ ಮಾಡಲಾಗಿತ್ತು.

ತಗ್ಗಿನ ಹನುಮಪ್ಪನಿಗೆ ಬೆಣ್ಣೆ ಅಲಂಕಾರ

ಚಿತ್ರದುರ್ಗ ನಗರದ ಬುರುಜನಹಟ್ಟಿಯ ತಗ್ಗಿನ ಹನುಮಪ್ಪನಿಗೆ ಮೊದಲ ಶ್ರಾವಣದ ನಿಮಿತ್ತ ಬೆಣ್ಣೆ ಅಲಂಕಾರ ಮಾಡಿದ್ದು ಕಣ್ಮನ ಸೆಳೆಯುತ್ತಿತ್ತು.

ವೀಳ್ಯದೆಲೆ, ಕನಕಾಂಬರ, ಸೇವಂತಿಗೆ, ಗೊರಟೆ ಹೂವು ಸೇರಿದಂತೆ ನಾನಾ ಬಗೆಯ ಹೂವುಗಳಿಂದ ಹನುಮಪ್ಪನಿಗೆ ವಿಶೇಷ ಅಲಂಕಾರ ಮಾಡಲಾಗಿತ್ತು. ಬೆಳಗ್ಗೆಯಿಂದ ಸಂಜೆವರೆಗೂ ಸುತ್ತಲಿನ ಭಕ್ತರು ಹೂವು, ಹಣ್ಣು, ಕಾಯಿ ಅರ್ಪಿಸಿ ಭಕ್ತಿ ಸಮರ್ಪಿಸಿದರು.

ನಾನಾ ದೇವಸ್ಥಾನಗಳಲ್ಲಿ ವಿಶೇಷ ಪೂಜೆ

ನಗರದ ಆನೆಬಾಗಿಲ ಸಮೀಪ ಇರುವ ಪ್ರಸನ್ನ ಆಂಜನೇಯ, ಸುವೃಷ್ಟಿ ಆಂಜನೇಯ, ಬುರುಜನಹಟ್ಟಿ ರಸ್ತೆಯಲ್ಲಿನ ಕೋಟೆ ಆಂಜನೇಯ, ತಮಟಕಲ್ಲಿನ ಆಂಜನೇಯ, ಜೆಸಿಆರ್‌ ಬಡಾವಣೆಯ ಆಂಜನೇಯ ಸ್ವಾಮಿ, ಸ್ಟೇಡಿಯಂ ರಸ್ತೆಯಲ್ಲಿನ ವೀರಾಂಜನೇಯ ಸೇರಿದಂತೆ ಮತ್ತಿತರ ದೇವಸ್ಥಾನಗಳಲ್ಲಿ ವಿಶೇಷ ಅಲಂಕಾರದೊಂದಿಗೆ ಪೂಜೆ ಸಲ್ಲಿಸಲಾಯಿತು.