ಆಸ್ಪತ್ರೆ ಆವರಣದಲ್ಲಿ ಆಸರೆ ಪಡೆದ ಬಾಣಂತಿ!

ಚಳ್ಳಕೆರೆ(ಚಿತ್ರದುರ್ಗ): ಅತ್ತ ಗಂಡನ ಮನೆ, ಇತ್ತ ತವರು ಮನೆಯಲ್ಲೂ ಆಸರೆ ಸಿಗದೇ ಬಾಣಂತಿ ತನ್ನ ಹಸುಗೂಸಿನೊಂದಿಗೆ ಸರಕಾರಿ ಆಸ್ಪತ್ರೆಯ ಆವರಣದ ಮಾರಮ್ಮದೇವಿ ದೇಗುಲದ ಬಳಿ ಆಶ್ರಯ ಪಡೆದ ಘಟನೆ ನಗರದಲ್ಲಿ ನಡೆದಿದ್ದು, ಇದನ್ನು ಗಮನಿಸಿದ ಸಾರ್ವಜನಿಕರು ತಾಯಿ ಮತ್ತು ಮಗುವನ್ನು ಶನಿವಾರ ಸಂಜೆ ಆಸ್ಪತ್ರೆಗೆ ದಾಖಲಿಸಿ ಮಾನವೀಯತೆ ಮೆರೆದಿದ್ದಾರೆ.

ತಾಲೂಕಿನ ನೆಲಗೇತನಹಟ್ಟಿ ಗ್ರಾಮದ ಶಾರದಮ್ಮ ಈ ಸ್ಥಿತಿಯಲ್ಲಿರುವ ಬಾಣಂತಿ. ಚಿತ್ರದುರ್ಗ ಜಿಲ್ಲಾಸ್ಪತ್ರೆಯಲ್ಲಿ ಡಿ.1ರಂದು ಗಂಡು ಮಗುವಿಗೆ ಜನ್ಮ ನೀಡಿದ್ದಳು. ಗಂಡನ ಮನೆಗೆ ಹೋದಾಗ ಅತ್ತೆ, ಮಾವ ಸೇರಿಸಿಕೊಳ್ಳಲಿಲ್ಲ. ''ಪ್ರೀತಿಸಿ ವಿವಾಹವಾಗಿದ್ದೇ ಇದಕ್ಕೆ ಕಾರಣ. ಸೊಸೆ ಎಂದು ಈವರೆಗೂ ಒಪ್ಪಿಕೊಂಡಿಲ್ಲ ಎಂಬ ಬಗ್ಗೆ ಪೊಲೀಸರಿಗೆ ದೂರು ಕೊಟ್ಟರೂ ಪ್ರಯೋಜನವಾಗಿಲ್ಲ,'' ಎಂಬುದು ಬಾಣಂತಿ ಅಳಲು.