ಸ್ಮಶಾನ ಒತ್ತುವರಿ ತೆರವಿಗೆ ಪ್ರತಿಭಟನೆ

ಹೊಳಲ್ಕೆರೆ : ತಾಲೂಕಿನ ಮುತ್ತುಗದೂರು, ಗುಂಡಿಮಡು ಗ್ರಾಮದ ಪರಿಶಿಷ್ಟ ಜಾತಿಯ ಮೀಸಲು ಸ್ಮಶಾನ ಒತ್ತುವರಿ ಖಂಡಿಸಿ ಪಟ್ಟಣದಲ್ಲಿ ದಲಿತ ಸಂಘರ್ಷ ಸಮಿತಿಯಿಂದ ಪ್ರತಿಭಟನೆ ನಡೆಸಿ ಬುಧವಾರ ತಹಸೀಲ್ದಾರ್‌ಗೆ ಮನವಿ ಸಲ್ಲಿಸಿದರು.

ಜಿಲ್ಲಾ ಸಂಚಾಲಕ ಕೆಂಗುಂಟೆ ಜಯಪ್ಪ, ತಾಲೂಕು ಸಂಚಾಲಕ ನವೀನ್‌ ಜೈ ಭೀಮ್‌ ಮದ್ದೇರು ನೇತೃತ್ವದಲ್ಲಿ ಪ್ರತಿಭಟನಾ ಮೆರವಣಿಗೆ ನಡೆಸಿ ಪ್ರತಿಭಟನಾಕಾರರು ಸ್ಥಳೀಯ, ತಾಲೂಕು ಆಡಳಿತ ವಿರುದ್ಧ ಘೊಷಣೆ ಕೂಗಿದರು.

ಜಿಲ್ಲಾ ಸಂಚಾಲಕ ಕೆಂಗುಂಟೆ ಜಯಪ್ಪ ಮಾತನಾಡಿ, ಮುತ್ತುಗದೂರು ಹಾಗೂ ಗುಂಡಿಮಡು ಗ್ರಾಮಗಳಲ್ಲಿ ದಲಿತ ಸಮುದಾಯದ ಮೀಸಲು ಸ್ಮಶಾನ ಜಾಗವನ್ನು ಅನೇಕ ವರ್ಷಗಳಿಂದ ಬಳಕೆ ಮಾಡುತ್ತಿದೆ. ಆದರೆ, ಇತ್ತೀಚೆಗೆ ಈ ಜಾಗವನ್ನು ಕೆಲ ಸವರ್ಣಿಯರು ಒತ್ತುವರಿ ಮಾಡಿದ್ದು, ಈ ಬಗ್ಗೆ ಅಧಿಕಾರಿಗಳಿಗೆ ಮನವಿ ಸಲ್ಲಿಸಿದ್ದರೂ ಯಾವುದೇ ಪ್ರಯೋಜನವಾಗಿಲ್ಲ. ಆದ್ದರಿಂದ ಕೂಡಲೇ ಸ್ಮಶಾನ ಜಾಗ ತೆರವುಗೊಳಿಸಬೇಕು ಎಂದು ಒತ್ತಾಯಿಸಿದರು.

ವರ್ಷದ ಹಿಂದೆಯೂ ಬಗರ್‌ ಹುಕುಂ ಸಾಗುವಳಿ ಜಮೀನಿಗೆ ಸಂಬಂಧಿಸಿದ ಎಷ್ಟೋ ಜನ ಬಡ ರೈತರಿಗೆ ಸಾಗುವಳಿ ಪತ್ರ ನೀಡದೆ ಅಧಿಕಾರಿಗಳು ನಿರ್ಲಕ್ಷ್ಯ ಮಾಡುತ್ತಿದ್ದಾರೆ. ಅಲ್ಲದೆ ಈಗಾಗಲೆ ಸಾಗುವಳಿ ಪತ್ರವಿರುವ ರೈತರ ಜಮೀನುಗಳನ್ನು ಪಹಣಿಗಳನ್ನು ಅಪ್ಡೇಟ್‌ ಮಾಡದೆ ಸಂಬಂಧಿಸಿದ ಅಧಿಕಾರಿಗಳು ಬೇಜವಾಬ್ದಾರಿ ತೋರಿರುತ್ತಾರೆ. ಶಿಘ್ರದಲ್ಲೇ ಈ ಸಮಸ್ಯೆಗಳು ಬಗೆಹರಿಯದೆ ಇದ್ದರೆ ಮುಂದಿನ ದಿನಗಳಲ್ಲಿ ಉಗ್ರ ಹೋರಾಟ ನಡೆಸಲಾಗುವುದು ಎಂದು ಎಚ್ಚರಿಸಿದರು.

ಸಮಿತಿಯ ಜಿಲ್ಲಾ ಸಂಚಾಲಕರಾದ ಶಿವಣ್ಣ, ಪಿ.ಎನ್‌.ಮಂಜುನಾಥ, ಗುರು, ಮಂಜಪ್ಪ, ಮಂಜು, ಸಮಿತಿ ಪದಾಧಿಕಾರಿಗಳು ಉಪಸ್ಥಿತರಿದ್ದರು.