ನಕಲಿ ದಾಖಲೆ ಸೃಷ್ಟಿಸಿ ಸೇವೆ ಸಲ್ಲಿಸುತ್ತಿದ್ದ ನಕಲಿ ವೈದ್ಯನ ಬಂಧನ

ಚಿತ್ರದುರ್ಗ: ಡಾ. ವಿಕಾಸ್‌ ಪಾಟೀಲ್‌ ಎಂಬ ಅಸಲಿ ವೈದ್ಯ ಪದವೀಧರನ ಹೆಸರಲ್ಲಿ ನಕಲಿ ದಾಖಲೆ ಸೃಷ್ಟಿಸಿ ವೈದ್ಯನಾಗಿ ಸೇವೆ ಸಲ್ಲಿಸುತ್ತಿದ್ದಾತ ಚಿತ್ರದುರ್ಗ ನಗರ ಠಾಣೆಯ ಪೊಲೀಸರ ಅತಿಥಿಯಾಗಿದ್ದಾನೆ.

ಸೋಮವಾರ ತಾಲೂಕಿನ ಸಿರಿಗೆರೆಯಲ್ಲಿ ಈತನನ್ನು ವಶಕ್ಕೆ ಪಡೆದಿರುವ ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ. ಗದಗ ಜಿಲ್ಲೆ ಶಿರಹಟ್ಟಿ ತಾಲೂಕಿನ ಬನ್ನಿಕೊಪ್ಪ ಗ್ರಾಮದ ಈತ ಬಿಎಸ್ಸಿ ನರ್ಸಿಂಗ್‌ ಪದವಿ ಪಡೆದಿದ್ದಾನೆ ಎನ್ನಲಾಗಿದ್ದು, ಡಾ.ವಿಕಾಸ್‌ ಪಾಟೀಲ್‌ ಎಂಬ ಹೆಸರಿನ ವೈದ್ಯಕೀಯ ಪದವೀಧರನ ದಾಖಲೆ ನಕಲು ಮಾಡಿ ಆರೋಗ್ಯ ಇಲಾಖೆಯಲ್ಲಿ ಹೊರಗುತ್ತಿಗೆ ಆಧಾರದ ಮೇಲೆ ವೈದ್ಯನಾಗಿ ಸೇವೆಗೆ ಸೇರಿದ್ದ ಎನ್ನಲಾಗಿದೆ.

ಡಾ.ವಿಕಾಸ್‌ ಪಾಟೀಲ್‌ ತಂದೆ ತಮ್ಮ ಮಗನ ಹೆಸರಿನಲ್ಲಿ ನಕಲಿ ದಾಖಲೆ ಸೃಷ್ಟಿಸಿ ಸೇವೆ ಸಲ್ಲಿಸುತ್ತಿರುವಾತನ ವಿರುದ್ಧ ಕ್ರಮ ಕೈಗೊಳ್ಳಬೇಕೆಂದು ದೂರು ನೀಡಿದ್ದರು. ಅಲ್ಲಿಂದ ನಾಪತ್ತೆಯಾಗಿದ್ದ ಈತ ಚಿತ್ರದುರ್ಗ ತಾಲೂಕಿನ ಸಿರಿಗೆರೆ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ವೈದ್ಯನಾಗಿ ಕಳೆದೊಂದು ತಿಂಗಳ ಕೆಳಗೆ ಸೇರಿದ್ದ.

ಸೋಮವಾರ 'ವಿಕ'ದಲ್ಲಿ ಪ್ರಕಟವಾದ ವರದಿ, ಫೋಟೋ ನೋಡಿ ಎಚ್ಚೆತ್ತುಕೊಂಡ ಆರೋಗ್ಯ ಇಲಾಖೆ ಅಧಿಕಾರಿಗಳು ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಈತನನ್ನು ವಶಕ್ಕೆ ಪಡೆದಿರುವ ಪೊಲೀಸರು ಹೆಚ್ಚಿನ ವಿಚಾರಣೆ ನಡೆಸುತ್ತಿದ್ದಾರೆ. ಈತ ಈಗ ನೀಡಿರುವ ವಿವರಗಳ ಸತ್ಯಾಸತ್ಯತೆ ಕುರಿತು ಸಹಾ ಅನುಮಾನಗಳಿರುವುದರಿಂದ ಗದಗ ಜಿಲ್ಲಾ ಡಿಎಚ್‌ಒ ಜತೆಗೆ ಸಂಪರ್ಕಿಸಿ, ಮಾಹಿತಿ ವಿನಿಮಯ ಮಾಡಿಕೊಂಡಿದ್ದಾರೆನ್ನಲಾಗಿದೆ.