ಬಿಸಿಯೂಟ ಅಕ್ಕಿ ವಶ

ಮೊಳಕಾಲ್ಮುರು: ತಾಲೂಕಿನ ಕೋನಾಪುರ ಗ್ರಾಮದ ಸಣ್ಣಮಾರಣ್ಣ ಎಂಬವರಿಗೆ ಸೇರಿದ ಜಮೀನಿನ ಪಾಲಿಹೌಸ್‌ ಗೋದಾಮಿನಲ್ಲಿಅಕ್ರಮವಾಗಿ ಶೇಖರಿಸಿಟ್ಟಿದ್ದ ಬಿಸಿಯೂಟದ ಸುಮಾರು 55 ಟನ್‌ ಅಕ್ಕಿಯನ್ನು ಸೋಮವಾರ ರಾಂಪುರ ಪೊಲೀಸರು ವಶಪಡಿಸಿಕೊಂಡಿದ್ದು, ಐವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ.
ಖಚಿತ ಮಾಹಿತಿ ಮೇರೆಗೆ ರಾಂಪುರ ಪಿಎಸ್‌ಐ ಗುಡ್ಡಪ್ಪ ದಾಳಿ ನಡೆಸಿ ಈ ಅಕ್ಕಿ ವಶಪಡಿಸಿಕೊಂಡಿದ್ದಾರೆ. ಪ್ರತಿ ಚೀಲದ ಮೇಲೂ ಅಕ್ಷರ ದಾಸೋಹ ಯೋಜನೆ ಕರ್ನಾಟಕ ಸರಕಾರ ಎಂದು ಬರೆಯಲಾಗಿದೆ. 'ಚಿತ್ರದುರ್ಗ ಜಿಲ್ಲೆಗೆ ಈ ಚೀಲದ ಅಕ್ಕಿ ಸರಬರಾಜಾಗುವುದಿಲ್ಲ. ಇದು ಅನ್ಯ ಜಿಲ್ಲೆಗೆ ಸೇರಿದ್ದ ಅಕ್ಕಿ ಇರಬಹುದು' ಎಂದು ತಾಲೂಕು ಆಹಾರಶಾಖೆ ಶಿರಸ್ತೇದಾರ ಉದಯಕುಮಾರ್‌ ಸ್ಪಷ್ಟಪಡಿಸಿದರು. ಈ ಸಂಬಂಧ ಡಿ.ಚಿದಾನಂದಪ್ಪ, ಸಣ್ಣ ಮಾರಣ್ಣ, ಬೊಮ್ಮದೇವರಹಳ್ಳಿ ಈರಣ್ಣ ಹಾಗೂ ಹಿರೇಹಾಳ್‌ ಸಮೀಪದ ಜಾಜರ್‌ಕಲ್‌ನ ರಾಜಣ್ಣ, ರಾಮಾಂಜಿನಿ ಸೇರಿದಂತೆ ಒಟ್ಟು ಐವರ ವಿರುದ್ಧ ದೂರು ದಾಖಲಿಸಿಕೊಳ್ಳಲಾಗಿದೆ.