ಕಾಟಮಹಲಿಂಗೇಶ್ವರ-ಮಾಳಮ್ಮದೇವಿಗೆ ಬೆಳಾರತಿ

ಹಿರಿಯೂರು : ಕಡೇಶ್ರಾವಣ ಸೋಮವಾರದ ಅಂಗವಾಗಿ ತಾಲೂಕಿನ ಚಿಲ್ಲಹಳ್ಳಿ ಗ್ರಾಮದ ಶ್ರೀಕಾಟಮಹಲಿಂಗೇಶ್ವರಸ್ವಾಮಿಗೆ ಸೋಮವಾರ ಹಾಗೂ ಶ್ರೀ ಮಾಳಮ್ಮದೇವಿಗೆ ಮಂಗಳವಾರ ಬೆಳಾರತಿ (ಬೇಳೆಕಾಳುಗಳ ಮೊಳಕೆಯಿಂದ ಮಾಡಿದ ಆರತಿ) ಸೇವೆ ಸಲ್ಲಿಸಲಾಯಿತು.

ಅಪ್ಪಟ ದೇಸೀ ವಿಧಾನದಲ್ಲಿ ಆಚರಿಸುವ ಅನ್ನದಾತರ ಪೂಜೆ ವಿಧಾನ. ಆರತಿ ಮಾಡುವಾಗ ಸಾಮಾನ್ಯವಾಗಿ ತಂಬಿಟ್ಟಿನಿಂದ ಆರತಿ ಕಟ್ಟುವುದು ವಾಡಿಕೆ. ಆದರೆ ಶ್ರೀಕಾಟಮಹಲಿಂಗೇಶ್ವರ ಸ್ವಾಮಿಗೆ ಬೇಳೆಕಾಳುಗಳ ಮೊಳಕೆಯಿಂದ ಆರತಿ ಸೇವೆಯೇ ಆಗಬೇಕು.

ಸೋಮವಾರ ಹದಿನಾರು ಕಿಮೀ ಅಂತರದ ಕೂಡ್ಲಹಳ್ಳಿ ಗ್ರಾಮದ ಶ್ರೀ ಸಂಗಮನಾಥಸ್ವಾಮಿ ಸನ್ನಿಧಿಯಲ್ಲಿ ವೇದಾವತಿ ನದಿ-ಸುವರ್ಣಮುಖಿ ನದಿಗಳ ಸಂಗಮ ಸ್ಥಳದಲ್ಲಿ ಕಾಟಮಹಲಿಂಗೇಶ್ವರ ಸ್ವಾಮಿಯ ಉತ್ಸವ ಮೂರ್ತಿಗೆ ಗಂಗಾಪೂಜೆ ನೆರವೇರಿಸಲಾಯಿತು. ಸಂಜೆ ಚಿಲ್ಲಹಳ್ಳಿಯಲ್ಲಿ ಸುಮಂಗಲಿಯರು ಬೆಳಾರತಿ ಸೇವೆ ಸಲ್ಲಿಸಿದ ನಂತರ ಪುರುಷರು ಮಣೇವು ಸೇವೆ ನೆರವೇರಿಸಿದರು. ಮಂಗಳವಾರ ಶ್ರೀ ಮಾಳಮ್ಮದೇವಿಗೆ ಬೆಳಾರತಿ ಸೇವೆ ನೆರವೇರಿತು. ಸಂಜೆ ಗ್ರಾಮದ ಎಲ್ಲಾ ಜಾತಿ ಧರ್ಮದವರು ಸೇರಿ ದೇವಸ್ಥಾನದ ಆವರಣದಲ್ಲಿ ಅನ್ನ ಸಂತರ್ಪಣೆ ವ್ಯವಸ್ಥೆ ಕಲ್ಪಿಸಿದ್ದರು.

ಶ್ರಾವಣ ಸೋಮವಾರದ ಅಂಗವಾಗಿ ಗ್ರಾಮದಲ್ಲಿ ತಳಿರು ತೋರಣ, ವಿದ್ಯುತ್‌ ದೀಪಾಲಂಕಾರ ಮಾಡಲಾಗಿತ್ತು.