ಹಣ ಗಳಿಕೆಯಿಂದ ನೆಮ್ಮದಿ ಸಿಗದು: ಸಾಣೇಹಳ್ಳಿ ಶ್ರೀಗಳು

ಹೊಸದುರ್ಗ : ಸಮಾಜಮುಖಿ ಚಿಂತನೆಗಳತ್ತ ವ್ಯಕ್ತಿಗತ ಬದಲಾವಣೆಯಾದಾಗ ಸಮಾಜವು ಸುಧಾರಣೆಯಾಗುತ್ತದೆ ಎಂದು ಸಾಣೇಹಳ್ಳಿ ಮಠದ ಡಾ. ಪಂಡಿತಾರಾಧ್ಯ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.

ಮುಂಬೈ ನಗರದಲ್ಲಿ ಥಾನೆ ಕಲಾಸೇವಾಕೇಂದ್ರ ಆಯೋಜಿಸಿದ್ದ ಕನ್ನಡ ರಾಜ್ಯೋತ್ಸವ ಸಮಾರಂಭದ ಸಾನ್ನಿಧ್ಯ ವಹಿಸಿ ಮಾತನಾಡಿದರು.

ಇವತ್ತಿನ ಜನರು ನಾಲ್ಕು ತಲೆಮಾರುಗಳಿಗೆ ಸಾಕಾಗುವಷ್ಟು ಆಸ್ತಿ ಸಂಪಾದನೆ ಮಾಡಿರುತ್ತಾರೆ. ಎಷ್ಟೋ ಜನರಿಗೆ ಹಣದ ಮುಂದೆ ಸಾಹಿತ್ಯ, ಸಂಗೀತ, ಕಲೆ ಗೌಣವಾಗಿ ಬಿಟ್ಟಿರುತ್ತದೆ. ಮನುಷ್ಯನಿಗೆ ಹಣ ಇದ್ದರೇ ಸಾಲದು, ಜತೆಯಲ್ಲಿ ಬಂಧು ಬಳಗ, ಕುಟುಂಬ ಇರಬೇಕು. ನಾಲ್ಕು ಜನರ ವಿಶ್ವಾಸ ಗಳಿಸಿಕೊಳ್ಳಬೇಕು. ವಿಶ್ವಾಸ, ಪ್ರೀತಿ ಸಂಪಾದನೆ ಮಾಡಲಿಕ್ಕೆ ಸಾಹಿತ್ಯ, ಸಂಗೀತ, ಕಲೆಯ ಒಲವು ಬೇಕು. ಕೇವಲ ಹಣಗಳಿಕೆಯಿಂದ ನೆಮ್ಮದಿ ಸಿಗುವುದಿಲ್ಲ ಎಂದರು.

ಡಿಸೆಂಬರ್‌ 31ರಂದು ಶ್ರೀಮಠದಲ್ಲಿ 'ವರ್ಷದ ಹರ್ಷ' ಎನ್ನುವ ಕಾರ್ಯಕ್ರಮ ಆಯೋಜಿಸಲಾಗುತ್ತದೆ. ಸಂಜೆ 6ಗಂಟೆಗೆ ಪ್ರಾರಂಭವಾಗುವ ಕಾರ್ಯಕ್ರಮದಲ್ಲಿ ಕಲೆ, ಸಾಹಿತ್ಯ, ಸಂಗೀತ, ಮಕ್ಕಳ ನೃತ್ಯ, ಉಪನ್ಯಾಸ ಮತ್ತಿತರ ಚಟುವಟಿಕೆಗಳಿರುತ್ತವೆ. ನಂತರ ನಾಟಕ ಅಥವಾ ಸಾಂಸ್ಕೃತಿಕ ಕಾರ್ಯಕ್ರಮ ನಡೆಯಲಿದೆ ಎಂದರು.

ಶ್ರೀನಿವಾಸ ಜಿ ಕಪ್ಪಣ್ಣ, ಭರತ್‌ಕುಮಾರ್‌, ರುದ್ರಣ್ಣ, ರಾಜಣ್ಣ ಮಾತನಾಡಿದರು. ವೇದಿಕೆಯ ಮೇಲೆ ಈ ಬಾರಿಗೆ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಕವಿ ಚಂದ್ರಶೇಖರ ತಾಳ್ಯ, ಕನ್ನಡ ಸಂಘದ ಪದಾಧಿಕಾರಿಗಳು ಉಪಸ್ಥಿತರಿದ್ದರು.