ಹೊಸದು ಲೋಳಲೊಟ್ಟೆ ಹಳೇ ತಳಿ ಗಟ್ಟಿ!

ಚಳ್ಳಕೆರೆ : ಬಡವರ ಬಾದಾಮಿ ಎಂದೇ ಖ್ಯಾತಿ ಗಳಿಸಿರುವ ಶೇಂಗಾ ಹೊಸ ತಳಿ ಹೆಚ್ಚುವರಿ ಇಳುವರಿ ನೀಡುವಲ್ಲಿ ವಿಫಲವಾಗಿದ್ದು, ಹಳೇ ತಳಿಯೇ ರೈತರ ಪಾಲಿನ ಗೋಲ್ಡ್‌ ಆಗಿ ಹೊರಹೊಮ್ಮಿದೆ!

ಹೌದು, ಕಳೆದ ಆರು ದಶಕದಷ್ಟು ಹಳೆಯದಾದ ಶೇಂಗಾ ತಳಿ ಟಿಎಂವಿ-2 ಬದಲಿಸಿ, ಹೆಚ್ಚಿನ ಇಳುವರಿಗಾಗಿ ಜಿ-2-52 ಹೊಸ ತಳಿ ಈ ಬಾರಿ ಪರಿಚಯಿಸಲಾಗಿತ್ತು. ಪ್ರಾಯೋಗಿಕವಾಗಿ 18 ಕಡೆ ಬಿತ್ತನೆ ಕೂಡ ಮಾಡಲಾಗಿತ್ತು. ಆದರೆ ನಿರೀಕ್ಷೆಯಷ್ಟು ಇಳುವರಿ ನೀಡುವಲ್ಲಿ ವಿಫಲವಾಗಿದೆ.

ಶೇಂಗಾ ಫೇಮಸ್‌

ಜಿಲ್ಲೆಯಲ್ಲಿ ಬಡವರ ಬಾದಾಮಿ ಶೇಂಗಾವೇ ಪ್ರಮುಖ ವಾಣಿಜ್ಯ ಬೆಳೆ. ಇದರಿಂದಲೇ ಚಳ್ಳಕೆರೆ ಆಯಿಲ್‌ ಸಿಟಿ ಎಂಬ ಖ್ಯಾತಿ ಗಳಿಸಿತ್ತು. ಜಿಲ್ಲೆಯಲ್ಲಿ ಮುಂಗಾರು ಬಿತ್ತನೆ ಗುರಿ ಸುಮಾರು 3.5 ಲಕ್ಷ ಹೆಕ್ಷೇರ್‌ ಪ್ರದೇಶದಲ್ಲಿ ಶೇಂಗಾ 145 ಲಕ್ಷ ಹೆಕ್ಟೇರ್‌ ಬಿತ್ತನೆಯ ಗುರಿ ಪಡೆದಿದೆ. ಈ ಬೆಳೆ ಶೇ.40ಕ್ಕಿಂತ ಹೆಚ್ಚು ಭೂ ಭಾಗ ಆವರಿಸಿಕೊಂಡಿದೆ. ಚಳ್ಳಕೆರೆ 85 ಸಾವಿರ ಹೆ., ಹಿರಿಯೂರು 25 ಸಾವಿರ ಹೆ., ಮೊಳಕಾಲ್ಮುರು 22 ಸಾವಿರ ಹೆ., ಚಿತ್ರದುರ್ಗ 6 ಸಾವಿರ ಹೆ., ಹೊಸದುರ್ಗ ನಾಲ್ಕು ಸಾವಿರ ಹೆ., ಹೊಳಲ್ಕೆರೆ ಎರಡು ಸಾವಿರ ಹೆ,. ಉಳಿದ ಪ್ರದೇಶದಲ್ಲಿ ತೊಗರಿ, ಮುಸುಕಿನ ಜೋಳ, ಹತ್ತಿ, ರಾಗಿ, ಸಿರಿ ಧಾನ್ಯ ಇತರ ಬೆಳೆಗಳನ್ನು ಬಿತ್ತನೆ ಮಾಡಲಾಗುತ್ತಿದೆ.

ಕೆಲ ವರ್ಷಗಳಿಂದ ಮಳೆ ವೈಪರೀತ್ಯದಿಂದ ಶೇಂಗಾ ಇಳುವರಿಯಲ್ಲಿ ಕುಂಠಿತ, ರೋಗಗಳ ಕಾಟ ಜಾಸ್ತಿಯಾಗಿತ್ತು. ಹೀಗಾಗಿ ಕೃಷಿ ಇಲಾಖೆ ಹೆಚ್ಚು ಇಳುವರಿ,ರೋಗ ನಿರೋಧಕಶಕ್ತಿ ಹೊಂದಿದೆ ಎಂದು ಜಿ-2-52 ಹೊಸ ತಳಿ ಪ್ರಾಯೋಗಿಕವಾಗಿ ಪರಿಚಯಿಸಿತ್ತು. ಆದರೆ ನಿರೀಕ್ಷೆಯಷ್ಟು ಫಲ ಸಿಕ್ಕಿಲ್ಲ.

60 ವರ್ಷದಿಂದ ಏಕೈಕ ತಳಿ!

ಹತ್ತು ವರ್ಷಕ್ಕೊಮ್ಮೆ ತಳಿಗಳನ್ನು ಬದಲಿಸಿ ಹೆಚ್ಚು ಇಳುವರಿ ನೀಡುವ ಹೊಸ ತಳಿಗಳನ್ನು ಕೃಷಿ ವಿವಿಯಿಂದ ಸಂಶೋಧನೆ ನಡೆಸಿ ರೈತರಿಗೆ ಪರಿಚಯಿಸಬೇಕಿತ್ತು. ಆದರೆ 60 ವರ್ಷದಿಂದಲೂ ಶೇಂಗಾ ತಳಿ ಬದಲಾಯಿಸಲು ಈವರೆಗೂ ಸಾಧ್ಯವಾಗಿಲ್ಲ. ಧಾರವಾಡ ಕೃಷಿ ವಿವಿ ಸಂಶೋಧನೆ ಮಾಡಿದ ಜಿ-2-52 ಹೊಸ ತಳಿಯನ್ನು ಪ್ರಾಯೋಗಿಕವಾಗಿ ಬಿತ್ತನೆಗೆ ಈ ಬಾರಿ 18 ರೈತರಿಗೆ ಕೃಷಿ ಇಲಾಖೆ ನೀಡಿತ್ತು. ಆದರೆ, ಹೊಸ ತಳಿ, ಹಳೇ ತಳಿಯನ್ನು ಹಿಂದಿಕ್ಕಲೂ ಸಾಧ್ಯವಾಗಿಲ್ಲ.

ಹಳೇ ತಳಿಯೇ ಬೆಸ್ಟ್‌

ಹೊಸ ತಳಿ ಶೇಂಗಾ ಗಿಡದಲ್ಲಿ 8ರಿಂದ 12 ಕಾಯಿಗಳಿದ್ದರೆ, ಹಳೆಯ ತಳಿ ಗಿಡದಲ್ಲಿ 10ರಿಂದ 14ವರೆಗೆ ಕಾಯಿಗಳಿವೆ. ಬೀಜಗಳು ಗಟ್ಟಿಯಾಗಿದ್ದು, ರುಚಿಕರವಾಗಿದೆ. ಆದರೆ ಹೊಸ ತಳಿ ಶೇಂಗಾ ಶೇ.50 ಜೊಳ್ಳು ಮತ್ತು ಬೀಜ ದಪ್ಪಿಲ್ಲ. ರುಚಿ ಸಪ್ಪೆಯಾಗಿದೆ. ಇನ್ನು ಹೆಗ್ಗೆರೆ ಗ್ರಾಮದ ಶರಣಪ್ಪ ಎಂಬ ರೈತ ಬೆಂಗಳೂರಿನ ಜಿಕೆವಿಕೆಯಿಂದ ತಂದ ಐಸಿಜಿವಿ-91114 ತಳಿಯೂ ಗಿಡಯೊಂದಕ್ಕೆ 8ರಿಂದ 12 ಕಾಯಿ ಹಿಡಿದಿದೆ. ಕಾಯಿಯೂ ದಪ್ಪವಿದೆ. ಆದರೆ, ಶೇ.25ರಷ್ಟು ಜೊಳ್ಳು, ಸಾಧಾರಣ ರುಚಿ ಹೊಂದಿದೆ.

ಹಳೇ ತಳಿಗೆ ಹೋಲಿಸಿದರೆ, ಉಭಯ ಹೊಸ ತಳಿಗಳು ರೋಗ, ನಿರೋಧಕ ಜತೆಗೆ ಕಟಾವಿನ ಸಮಯದಲ್ಲಿ ಎಲೆಗಳು ಹಸಿರಾಗಿರುತ್ತವೆ. ಹಳೇ ತಳಿ ನಿರೋಧಕತೆ ಇರುವುದಿಲ್ಲ. ಎಲೆ ಚುಕ್ಕೆ ರೋಗದಿಂದಾಗಿ ಒಣಗಿರುತ್ತದೆ. ಬಯಲು ಸೀಮೆಯಲ್ಲಿ ಮಳೆ ಕಡಿಮೆ ಬಿಸಿಲು ಜಾಸ್ತಿ ಹೀಗಾಗಿ ಹಳೇ ತಳಿಯ ಶೇಂಗಾ ಗಿಡಗಳು ಬೇಗ ಒಣಗುತ್ತಿದ್ದವು. ಇದಕ್ಕೆ ಬ್ರೇಕ್‌ ಹಾಕಲು ಹೊಸ ತಳಿ ಸಫಲವಾಗುವಂತೆ ಕಂಡರೂ ಇಳುವರಿಯಲ್ಲೇ ಫೇಲ್‌ ಆಗಿದೆ. ಹೀಗಾಗಿ ಹಳೇ ತಳಿಯನ್ನೇ ಮುಂದುವರೆಸಬೇಕೋ ಇಲ್ಲವೇ ಮೂರು ತಳಿಗಳನ್ನು ಮತ್ತಷ್ಟು ಸಂಶೋಧನಗೊಳಪಡಿಸಿ ಬೆಸ್ಟ್‌ ಆದ ಮತ್ತೊಂದು ಶೇಂಗಾ ಹೊಸ ತಳಿಯನ್ನು ಕೃಷಿ ವಿವಿ ಪರಿಚಯಿಸುವ ಸ್ಥಿತಿ ಇದೆ.

ಕೊಟ್‌.. 1

10 ವರ್ಷಕೊಮ್ಮೆ ಶೇಂಗಾ ತಳಿ ಬದಲಿಸಬೇಕಿತ್ತು. ಹೀಗಾಗಿ ಧಾರವಾಡ ಕೃಷಿ ವಿವಿಯಿಂದ ಜಿ-2-52 ಹೊಸ ತಳಿ ಪರಿಚಯಿಸಿ ಪ್ರಾಯೋಗಿಕವಾಗಿ 18 ರೈತರಿಗೆ ಬಿತ್ತನೆಗೆ ನೀಡಲಾಗಿತ್ತು. ಆದರೆ ಹಳೇ ತಳಿಗಿಂತ ಕಡಿಮೆ ಇಳುವರಿ ಬಂದಿರುವುದಲ್ಲದೆ ಕಾಯಿಯೂ ಜೊಳ್ಳಿದೆ. ಮತ್ತೆ ವಿವಿಯಿಂದ ತಳಿ ಶುದ್ಧೀಕರಣ ಆಗಬೇಕಿದ್ದು, ಈ ಬಗ್ಗೆ ವರದಿ ನೀಡಲಾಗುವುದು.

-ಸುಜಾತಾ ಕೃಷಿ ಉಪನಿರ್ದೇಶಕಿ, ಚಳ್ಳಕೆರೆ ವಿಭಾಗ.

ಪ್ರಾಯೋಗಿಕವಾಗಿ ಹೊಸ ತಳಿಯನ್ನು ಕಡಿಮೆ ರೈತರಿಗೆ ಬಿತ್ತನೆಗೆ ನೀಡಬೇಕಿತ್ತು. ಇಲ್ಲವೇ ಹಿರಿಯೂರಿನ ಬಬ್ಬೂರು ಕೃಷಿ ಫಾರಂನಲ್ಲಿ ಇಲಾಖೆ ಮೊದಲು ಪ್ರಯೋಗ ನಡೆಸಬೇಕಿತ್ತು. ಹೊಸ ತಳಿ ರೈತರ ಜಮೀನುಗಳಲ್ಲಿ ಪ್ರಯೋಗಿಸಿದ್ದರಿಂದ ಇಳುವರಿಯಿಲ್ಲದೆ ನಷ್ಟ ಅನುಭವಿಸುವಂತಾಗಿದೆ. ಪರಿಹಾರ ನೀಡಬೇಕು. ಸಂಬಂಧಪಟ್ಟವರ ವಿರುದ್ಧ ಕಾನೂನು ಹೋರಾಟ ನಡೆಸಲಾಗುವುದು.

-ಹನುಮಣ್ಣ, ರೈತ ಹೆಗ್ಗೆರೆ.