ಭದ್ರಾ ಮೇಲ್ದಂಡೆ ತ್ವರಿತ ಕಾಮಗಾರಿಗೆ ಸೂಚನೆ

ಚಿತ್ರದುರ್ಗ: ಭದ್ರಾ ಮೇಲ್ದಂಡೆ ಯೋಜನೆ ಪೂರ್ಣಗೊಳ್ಳುವವರೆಗೆ ಅಧಿಕಾರಿಗಳು ನಿದ್ರಿಸಲು ಬಿಡುವುದಿಲ್ಲ. ಯೋಜನೆಯ ಕಾಮಗಾರಿ ಸ್ಥಿತಿಗತಿ ಪೂರ್ಣವಾಗಿ ಅರಿಯುವ ಉದ್ದೇಶದಿಂದಲೇ ತರೀಕೆರೆ, ಅಜ್ಜಂಪುರಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದೇನೆ ಎಂದು ಜಿಲ್ಲಾ ಉಸ್ತುವಾರಿ ಸಚಿವ ವೆಂಕಟರವಣಪ್ಪ ಹೇಳಿದರು.

ನಗರದ ಪತ್ರಕರ್ತರ ಭವನದಲ್ಲಿ ಬುಧವಾರ ಸುದ್ದಿಗೋಷ್ಟಿಯಲ್ಲಿ ಮಾತನಾಡಿ,'ನಾಲೆಗಾಗಿ ನಿರ್ಮಿಸುತ್ತಿರುವ ಸುರಂಗಮಾರ್ಗದಲ್ಲಿ ಖುದ್ದು ನಾನೇ ಹೋಗಿ ವೀಕ್ಷಿಸಿದ್ದೇನೆ. ಇನ್ನು 80 ಮೀಟರ್‌ ಸುರಂಗ ಮಾರ್ಗದ ಕೆಲಸ ಮಾತ್ರ ಬಾಕಿ ಇದೆ. ಆದಷ್ಟು ತ್ವರಿತಗತಿಯಲ್ಲಿ ಕಾಮಗಾರಿ ಪೂರ್ಣಗೊಳಿಸಲು ಅಧಿಕಾರಿಗಳಿಗೆ ಸೂಚನೆ ನೀಡಿದ್ದೇನೆ' ಎಂದರು.

ಡಿಸೆಂಬರ್‌ ವೇಳಗೆ ಭದ್ರಾ ನೀರು ಬರದಿದ್ದಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವರು ರಾಜೀನಾಮೆ ನೀಡುತ್ತಾರಾ? ಎಂದು ಬಿಜೆಪಿ ಮುಖಂಡರು ಪ್ರಶ್ನಿಸಿರುವ ಕುರಿತು ಗಮನಸೆಳೆದಾಗ 'ಭದ್ರಾ ನೀರು ತರುವುದರ ಕುರಿತು ನಾನು ಹೇಳುತ್ತಿರುವುದು ಸುಳ್ಳೋ ನಿಜವೋ ಎಂಬುದು ವರ್ಷದ ಕೊನೆಗೆ ತಿಳಿಯಲಿದೆ. ಈ ಕುರಿತು ಬಿಜೆಪಿಯವರೇ ನೇರವಾಗಿ ನನ್ನನ್ನು ಪ್ರಶ್ನಿಸಲಿ, ಉತ್ತರಿಸುತ್ತೇನೆ ಎಂದು ಸಚಿವರು, ಚುನಾವಣೆಯ ನೀತಿಸಂಹಿತೆ ಇದ್ದುದರಿಂದ ಯಾವ ಜನಪ್ರತಿನಿಧಿಗಳಿಗೂ ಆಹ್ವಾನ ನೀಡಿರಲಿಲ್ಲ' ಎಂದು ಪ್ರತಿಕ್ರಿಯೆ ನೀಡಿದರು.

ಅಭಿವೃದ್ಧಿಗೆ ಪಕ್ಷ ಬೇಧ ಬೇಡ: ಜಿಲ್ಲೆಯ ಅಭಿವೃದ್ಧಿಯ ದೃಷ್ಟಿಯಿಂದ ಬಿಜೆಪಿ ಶಾಸಕರನ್ನೂ ವಿಶ್ವಾಸಕ್ಕೆ ತೆಗೆದುಕೊಳ್ಳಲಾಗುವುದು. ಯಾವುದೇ ಕಾರಣಕ್ಕೂ ಪಕ್ಷಬೇಧ ಮಾಡುವುದಿಲ್ಲ. ಒಗ್ಗೂಡಿ ಕೆಲಸ ಮಾಡುತ್ತೇವೆ. ಸ್ಥಳೀಯ ಸಂಸ್ಥೆಗಳ ಚುಣಾವಣೆ ಮುಗಿದ ಬಳಿಕ ಕೆಡಿಪಿ ಸಭೆ ನಡೆಸಲಾಗುವುದು. ಜಿಲ್ಲಾಡಳಿತಕ್ಕೂ ಚುರುಕು ಮುಟ್ಟಿಸಲಾಗುವುದು ಎಂದರು.

ಸಂಸದ ಬಿ.ಎನ್‌.ಚಂದ್ರಪ್ಪ, ಜಿಪಂ ಅಧ್ಯಕ್ಷೆ ಸೌಭಾಗ್ಯ ಬಸವರಾಜನ್‌, ಜಿಪಂ ಸದಸ್ಯರಾದ ನರಸಿಂಹ, ನಾಗೇಂದ್ರನಾಯ್ಕ್‌, ಶಿವಮೂರ್ತಿ, ಕೆ.ಟಿ.ಗುರುಮೂರ್ತಿ ಮತ್ತಿತರರು ಇದ್ದರು.