ಭೂಸ್ವಾಧೀನ ಕಾಯ್ದೆ ತಿದ್ದುಪಡಿಗೆ ವಿರೋಧ

ಚಿತ್ರದುರ್ಗ : ರೈತರ ಪಾಲಿಗೆ ಮಾರಕವಾಗಿರುವ ಭೂಸ್ವಾಧೀನ ಕಾಯ್ದೆ ತಿದ್ದುಪಡಿ ವಿರೋಧಿಸಿ ರೈತ ಸಂಘದ ತಾಲೂಕು ಘಟಕದ ನೇತೃತ್ವದಲ್ಲಿ ಸೋಮವಾರ ತಾಲೂಕಿನ ಗುಡ್ಡದ ರಂಗವ್ವನಹಳ್ಳಿ ರಾಷ್ಟ್ರೀಯ ಹೆದ್ದಾರಿಯಲ್ಲಿ ರಸ್ತೆ ತಡೆ ನಡೆಸಿದ ರೈತರನ್ನು ಪೊಲೀಸರು, ಬಂಧಿಸಿ ನಂತರ ಬಿಡುಗಡೆ ಮಾಡಿದರು.

ಬೆಳಗ್ಗೆ 11.30 ಸುಮಾರಿಗೆ ಹೆದ್ದಾರಿ ತಡೆ ನಡೆಸಿದ ರೈತ ಮುಖಂಡರು ಹಾಗೂ ರೈತರು 45 ನಿಮಿಷಗಳತನಕ ವಾಹನ ಸಂಚಾರಕ್ಕೆ ಅವಕಾಶ ನೀಡದೇ ಪ್ರತಿಭಟನೆ ನಡೆಸಿದರು. ಪ್ರತಿಭಟನೆ ನಡೆಯುತ್ತಿದ್ದ ವೇಳೆ ಹೆದ್ದಾರಿ ಎರಡೂ ಕಡೆ ವಾಹನ ನಿಲುಗಡೆಯಾಗಿ ಸಂಚಾರ ಅಸ್ತವ್ಯಸ್ತವಾಯಿತು.

ರೈತರು ಹೆದ್ದಾರಿ ತಡೆ ಸೀಮಿತ ಅವಧಿಗೆ ನಡೆಸುತ್ತಾರೆಂದು ಭಾವಿಸಿದ್ದ ಪೊಲೀಸರು ಮುಕ್ಕಾಲುಗಂಟೆಯ ನಂತರವೂ ಹೆದ್ದಾರಿ ತಡೆ ಮುಂದುವರಿದಾಗ ಸಂಚಾರ ಸುಗಮಗೊಳಿಸಲು ನೂರಾರು ಪ್ರತಿಭಟನಕಾರರನ್ನು ವಶಕ್ಕೆ ತೆಗೆದುಕೊಂಡು ಹೆದ್ದಾರಿಯನ್ನು ಸಂಚಾರಕ್ಕೆ ಮುಕ್ತಗೊಳಿಸಿದರು.

ಬಂಧಿತ ರೈತರನ್ನು ಜಿಲ್ಲಾ ಸಶಸ್ತ್ರ ಮೀಸಲು ಪಡೆ ಮೈದಾನದಲ್ಲಿ ಒಂದು ಗಂಟೆ ಕಾಲ ವಶದಲ್ಲಿಟ್ಟುಕೊಂಡು ನಂತರ ಬಿಡುಗಡೆ ಮಾಡಿದರು. ಬಂಧನದ ಸಮಯದಲ್ಲಿ ರೈತರು ಸರಕಾರ ರೈತ ವಿರೋಧಿ ನೀತಿಗಳನ್ನು ಪ್ರಶ್ನಿಸಿ, ಘೋಷಣೆ ಕೂಗಿದರು.

ಹೆದ್ದಾರಿ ತಡೆ ಪ್ರತಿಭಟನೆಯ ನೇತೃತ್ವವನ್ನು ರಾಜ್ಯ ಪ್ರಧಾನ ಕಾರ್ಯದರ್ಶಿ ಈಚಘಟ್ಟ ಸಿದ್ಧವೀರಪ್ಪ, ಮುಖಂಡರಾದ ಚಿಕ್ಕಬ್ಬಿಗೆರೆ ನಾಗರಾಜ್‌, ರೆಡ್ಡಿಹಳ್ಳಿ ವೀರಣ್ಣ, ಬೈಲಪ್ಪ, ಎಲ್‌.ಮಲ್ಲಿಕಾರ್ಜುನ, ಎಸ್‌.ಪ್ರವೀಣ್‌, ಮಲ್ಲಿಕಾರ್ಜುನ್‌, ವಿ.ಟಿ.ಸುನೀಲ್‌ ಕುಮಾರ್‌ ಮತ್ತಿತರರು ವಹಿಸಿದ್ದರು.

**

ಬಾಕ್ಸ್‌

ರೈತರ ವಿರೋಧಿ ಧೋರಣೆ

'ಭೂಮಿ ಕಳೆದುಕೊಳ್ಳುವ ರೈತರು ತಮ್ಮ ಜೀವನಾಧಾರವನ್ನೇ ಕಳೆದುಕೊಂಡಿರುತ್ತಾರೆ. ವೈಜ್ಞಾನಿಕ ಪರಿಹಾರ ನೀಡಬೇಕು. ರೈತರ ಇಚ್ಛೆಗೆ ವಿರುದ್ಧವಾಗಿ ಭೂಸ್ವಾಧೀನಪಡಿಸಿ ಕೊಂಡು, ಇಚ್ಛೆ ಬಂದಷ್ಟು ಪರಿಹಾರ ನೀಡುವುದು ರೈತರ ವಿರೋಧಿ ಧೋರಣೆಯಾಗಿದೆ' ಎಂದು ರಾಜ್ಯ ಪ್ರಧಾನ ಕಾರ್ಯದರ್ಶಿ ಈಚಘಟ್ಟ ಸಿದ್ಧವೀರಪ್ಪ ತರಾಟೆಗೆ ತೆಗೆದು ಕೊಂಡರು.

ಸರಕಾರ ಕೂಡಲೇ ಭೂಸ್ವಾಧೀನ ಕಾಯ್ದೆ ತಿದ್ದುಪಡಿಗೆ ಮಾಡಿರುವುದನ್ನು ವಾಪಸ್‌ ಪಡೆಯಬೇಕು. ಜತೆಗೆ ರೈತರಿಂದ ಸ್ವಾಧೀನಪಡಿಸಿಕೊಂಡಿರುವ ಭೂಮಿ ವಾಪಸ್‌ ಕೊಡಬೇಕು ಎಂದು ಆಗ್ರಹಿಸಿದರು.

ಬರಕ್ಕೆ ತತ್ತರಿಸಿ ಹೋಗಿದ್ದ ರೈತರು ಅಲ್ಲಲ್ಲಿ ಮಳೆಯಾಗಿರುವ ಹಿನ್ನೆಲೆಯಲ್ಲಿ ಉಳುಮೆ, ಬಿತ್ತನೆಗೆ ಮುಂದಾಗಿದ್ದಾರೆ. ಆದರೆ, ಸರಕಾರ ಕಳೆದ ವರ್ಷ ರೈತರಿಂದ ಪಾವತಿಸಿಕೊಂಡಿರುವ ವಿಮೆ ಹಾಗೂ ಬೆಳೆ ನಷ್ಟಪರಿಹಾರವನ್ನು ಇದುವರೆಗೂ ನೀಡಿಲ್ಲ. ಈ ಮಾಸಾಂತ್ಯದೊಳಗೆ ಹಣ ಬಿಡುಗಡೆ ಮಾಡಬೇಕು ಎಂದು ಒತ್ತಾಯಿಸಿದರು.