ಮೈನಿಂಗ್‌ ಲಾರಿ ಸಂಚಾರಕ್ಕೆ ವಿರೋಧ

ಚಿತ್ರದುರ್ಗ : ತಾಲೂಕಿನ ಹಿರೇಗುಂಟನೂರಿನಲ್ಲಿ ಮಂಗಳವಾರ ಗ್ರಾಮಸ್ಥರು ಮೈನಿಂಗ್‌ ಲಾರಿ ಸಂಚಾರ ವಿರೋಧಿಸಿ ರಸ್ತೆ ತಡೆ ನಡೆಸಿದರು.

ಕಳೆದ ತಿಂಗಳು ಹಿರೇಗುಂಟನೂರು ಬಳಿ ಮೈನಿಂಗ್‌ ಲಾರಿ ಡಿಕ್ಕಿಯಾಗಿ ಒಂಬತ್ತು ತಿಂಗಳ ಗರ್ಭಿಣಿ ಸಹಿತ ಮೂರು ಜನ ಸ್ಥಳದಲ್ಲೇ ಮೃತಪಟ್ಟ ಪರಿಣಾಮ, ಈ ಭಾಗದಲ್ಲಿ ಮೈನಿಂಗ್‌ ಲಾರಿಗಳನ್ನು ಸಂಪೂರ್ಣ ನಿಷೇಧಿಸವಂತೆ ಆಗ್ರಹಿಸಿ ಜಿಲ್ಲಾಧಿಕಾರಿಗಳ ಕಚೇರಿ ಬಳಿ ಹಿರೇಗುಂಟನೂರು, ಭೀಮಸಮುದ್ರ, ಬೊಮ್ಮನಹಳ್ಳಿ, ಹಳಿಯೂರು ಸೇರಿದಂತೆ ಸುತ್ತಮುತ್ತಲಿನ ಪ್ರದೇಶಗಳ ಜನರು ಪ್ರತಿಭಟನೆ ಹಾಗೂ ಧರಣಿ ನಡೆಸಿದ್ದರು. ಇದರ ಪರಿಣಾಮ ಜಿಲ್ಲಾಧಿಕಾರಿಗಳು ಒಂದು ತಿಂಗಳ ಕಾಲ ಲಾರಿ ಸಂಚಾರಕ್ಕೆ ನಿಷೇಧ ಹೇರಿದ್ದರು. ಒಂದು ತಿಂಗಳ ನಂತರ ಸಭೆ ಸೇರಿ ಮುಂದಿನ ತೀರ್ಮಾನ ಕೈಗೊಳ್ಳುವುದಾಗಿ ತಿಳಿಸಿದರು. ಅಲ್ಲಿಯವರೆಗೆ ಮೈನಿಂಗ್‌ ಲೋಡಿಂಗ್‌ ಪರವಾನಿಗೆ ನೀಡದಂತೆ ಗಣಿ ಮತ್ತು ಭೂ ವಿಜ್ಞಾನ ಇಲಾಖೆಯ ಅಧಿಕಾರಿಗಳಿಗೆ ಆದೇಶ ನೀಡಿದ್ದರು. ಆದರೆ, ಜಿಲ್ಲಾಧಿಕಾರಿಗಳ ಆದೇಶವಿದ್ದರೂ ಕಳೆದ 3-4 ದಿನಗಳಿಂದ ಅಧಿಕಾರಿಗಳು ಮೈನಿಂಗ್‌ ಲಾರಿಗಳ ಲೋಡಿಂಗ್‌ ಪರವಾನಗೆ ನೀಡಿ, ರಸ್ತೆ ಸಂಚಾರಕ್ಕೂ ಅವಕಾಶ ನೀಡಿರುವ ಕ್ರಮ ಖಂಡಿಸಿ ಗ್ರಾಮಸ್ಥರು ಮೈನಿಂಗ್‌ ಲಾರಿ ತಡೆದು ಪ್ರತಿಭಟನೆ ನಡೆಸಿದರು.

ಹಿರೇಗುಂಟನೂರು ತಾಪಂ ಸದಸ್ಯ ಸುರೇಶ್‌, ಭೀಮಸಮುದ್ರ ತಾಪಂ ಸದಸ್ಯ ಸುರೇಶ್‌ ನಾಯ್ಕ್‌, ಹಿರೇಗುಂಟನೂರು ಕೃಷಿ ಪತ್ತಿನ ಸಹಕಾರ ಸಂಘದ ಅಧ್ಯಕ್ಷ ಹೊನ್ನೂರಪ್ಪ, ಹಿರೇಗುಂಟನೂರು ಗ್ರಾಪಂ ಸದಸ್ಯರಾದ ಮಂಜುನಾಥ, ವಸಂತ್‌ ಸೇರಿದಂತೆ ಗ್ರಾಮಸ್ಥರು ಪ್ರತಿಭಟನೆಯಲ್ಲಿದ್ದರು.