ಗುಡುಗು ಸಹಿತ ಸುರಿದ ಮಳೆರಾಯ

ಚಿತ್ರದುರ್ಗ : ಕೋಟೆನಾಡು ಚಿತ್ರದುರ್ಗದಲ್ಲಿ ಮಂಗಳವಾರ ಸಂಜೆ ಕೆಲ ಕಾಲ ಗುಡುಗು ಸಹಿತ ಜೋರಾದ ಮಳೆ ಸುರಿಯಿತು.

ಸಂಜೆ ನಾಲ್ಕೂವರೆಗೆ ಆರಂಭವಾದ ಮಳೆ ಅರ್ಧ ತಾಸಿಗೂ ಹೆಚ್ಚು ಕಾಲ ಧಾರಾಕಾರವಾಗಿ ಸುರಿಯಿತು. ಇದರಿಂದ ಕಾದ ಕಾವಲಿಯಂತಾಗಿದ್ದ ಇಳೆಯನ್ನು ತಂಪಾಗಿಸಿತು.

ಹಿಂದೆಂದಿಗಿಂತ ಈ ವರ್ಷ ಅಧಿಕ ತಾಪಮಾನದಿಂದ ಕೂಡಿತ್ತು. ಬಿಸಿಲಿನ ಝಳಕ್ಕೆ ಜನ ತತ್ತರಿಸಿದ್ದರು. ಮಂಗಳವಾರ ಸುರಿದ ಮಳೆಯಿಂದ ತಂಪಿನ ವಾತಾವರಣ ಸೃಷ್ಟಿಯಾಯಿತು.

ಧಾರಾಕಾರವಾಗಿ ಸುರಿದ ಮಳೆಯಿಂದ ನೀರು ಹರಿಯಿತು. ಕೆಲವು ಕಡೆಗಳಲ್ಲಿ ಚರಂಡಿಗಳು ತುಂಬಿ ಹರಿದವು. ಕೆಲಕಾಲ ಸಂಚಾರ ಅಸ್ತವ್ಯಸ್ತಗೊಂಡಿತು. ಮೂಲೆ ಸೇರಿ ಧೂಳು ಹಿಡಿದಿದ್ದ ಛತ್ರಿಗಳು ಹೊರಬಂದವು.

ಕಳೆದ ಎರಡು ದಿನಗಳ ಕಾಲ ಸಂಜೆ ವೇಳೆಯಲ್ಲಿ ಮೋಡ ಕವಿದ ವಾತಾವರಣ ಇದ್ದರೂ ಮಳೆ ಆಗಿರಲಿಲ್ಲ, ಸೋಮವಾರ ಎರಡು ಹನಿ ಬಿದ್ದಿದ್ದವು. ಆದರೆ ಜೋರಾದ ಮಳೆ ಬರುವ ನಿರೀಕ್ಷೆ ಹುಸಿಯಾಗಿತ್ತು. ಆದರೆ ಮಂಗಳವಾರ ಜೋರಾದ ಮಳೆ ಸುರಿದು ವಾತಾವರಣದಲ್ಲಿ ತುಸು ಬದಲಾವಣೆ ಉಂಟು ಮಾಡಿದೆ.