ಎಟಿಎಂನಲ್ಲಿ ಸ್ಕಿಮ್ಮಿಂಗ್ ಯಂತ್ರ ಪತ್ತೆ ಹಚ್ಚಿದ ಗ್ರಾಹಕ

ಹೊಸದುರ್ಗ: ಪಟ್ಟಣದ ಕೆನರಾ ಬ್ಯಾಂಕ್‌ ಎಟಿಎಂ ಮಿಷನ್‌ಗೆ ರಹಸ್ಯವಾಗಿ ಸ್ಕಿಮ್ಮಿಂಗ್‌ ಯಂತ್ರ ಹಾಗೂ ಕ್ಯಾಮೆರಾ ಅಳವಡಿಸಿರುವ ವಿಷಯ ಹಣ ಡ್ರಾ ಮಾಡಲು ಹೋಗಿದ್ದ ಗ್ರಾಹಕರಿಂದ ಬೆಳಕಿಗೆ ಬಂದಿದೆ.

ಬೆಸ್ಕಾಂನಲ್ಲಿ ಜ್ಯೂನಿಯರ್‌ ಅಸಿಸ್ಟೆಂಟ್‌ ಆಗಿ ಕರ್ತವ್ಯ ನಿರ್ವಹಿಸುತ್ತಿರುವ ಶ್ರೀಹರಿ ಕೆನರಾ ಬ್ಯಾಂಕ್‌ ಎಟಿಎಂಗೆ ಹಣ ಡ್ರಾ ಮಾಡಲು ಹೋದಾಗ ಎಟಿಎಂ ಮಿಷನ್‌ನಲ್ಲಿ ಹೆಚ್ಚಿನ ಡಿವೈಸ್‌ ಇರುವುದು ಕಂಡು ಬಂದಿದೆ. ಇದರಿಂದ ಕೆನರಾ ಬ್ಯಾಂಕ್‌ನ ಹೆಲ್ಪ್‌ ಲೈನ್‌ ಮತ್ತು ಹೊಸದುರ್ಗದ ಬ್ಯಾಂಕ್‌ ಸಿಬ್ಬಂದಿಗೆ ಕಾಲ್‌ ಮಾಡಿದಾಗ ಸಂಪರ್ಕ ಸಿಗಲಿಲ್ಲ. ಸೂಕ್ಷ್ಮವಾಗಿ ಪರೀಕ್ಷಿಸಿದಾಗ ಅದರಲ್ಲಿ ಕ್ಯಾಮೆರಾ ಇರುವುದು ಪತ್ತೆಯಾಗಿದೆ. ಮಿಷನ್‌ಗೆ ಅಳವಡಿಸಿದ್ದ ಹೆಚ್ಚುವರಿ ಡಿವೈಸ್‌ಗಳನ್ನು ಅನ್‌ ಇನ್ಸ್‌ ಟಾಲ್‌ ಮಾಡಿ ಪೊಲೀಸ್‌ ಠಾಣೆಗೆ ಒಪ್ಪಿಸಿರುವೆ ಎಂದು ಶ್ರೀಹರಿ ತಿಳಿಸಿದ್ದಾರೆ.

ಕೆನರಾ ಬ್ಯಾಂಕ್‌ ಎಟಿಎಂ ಯಂತ್ರದ ಪಕ್ಕದಲ್ಲಿಯೇ ಎಸ್‌ಬಿಐ ಬ್ಯಾಂಕ್‌ ಮತ್ತು ಎಟಿಎಂ ಮಿಷನ್‌ ಇದ್ದು, ಈ ಯಂತ್ರಕ್ಕೂ ಏನಾದರೂ ರಹಸ್ಯ ಕ್ಯಾಮೆರಾ ಅಳವಡಿಸಿದ್ದಾರಾ ಎಂಬ ಅನುಮಾನವನ್ನು ಗ್ರಾಹಕರು ವ್ಯಕ್ತಪಡಿಸಿದರು.

ಎಟಿಎಂ ಸೆಂಟರ್‌ನ್ನು ಸ್ಕಿಮ್ಮಿಂಗ್‌ ಯಂತ್ರ ಮೂಲಕ ಹ್ಯಾಕ್‌ ಮಾಡಿ ಹಣ ದೋಚುವ ಯತ್ನ ನಡೆದಿದೆ. ಈ ಯಂತ್ರಗಳ ಸಹಾಯದಿಂದ ಗ್ರಾಹಕರ ಕಾರ್ಡ್‌ ನಂಬರ್‌ ಸಹಿತ ರಹಸ್ಯ ಸಂಖ್ಯೆಗಳನ್ನು ಸ್ಕ್ಯಾನ್‌ ಮಾಡಲಾಗುತ್ತದೆ. ನಂತರ ನಕಲಿ ಕಾರ್ಡ್‌ ತಯಾರಿಸಿ ಬೇರೆ ಬೇರೆ ಪ್ರದೇಶಗಳಲ್ಲಿ ನಕಲಿ ಕಾರ್ಡ್‌ ಬಳಸಿ ಗ್ರಾಹಕರ ಹಣವನ್ನು ಡ್ರಾ ಮಾಡಲಾಗುತ್ತದೆ. ಇಷ್ಟು ದಿನ ಮಹಾನಗರಗಳಲ್ಲಿ ನಡೆಯುತ್ತಿದ್ದ ಇಂಥ ದುಷ್ಕೃತ್ಯಗಳು ಈಗ ತಾಲೂಕು ವ್ಯಾಪ್ತಿಗೆ ವಿಸ್ತರಿಸುತ್ತಿವೆ.

ಎಟಿಎಂ ಮಿಷನ್‌ಗೆ ಅಳವಡಿಸಿಲಾಗಿದ್ದ ಕ್ಯಾಮೆರಾ ಮತ್ತು ಇತರೆ ಉಪಕರಣಗಳನ್ನು ಗ್ರಾಹಕರೊಬ್ಬರು ಠಾಣೆಗೆ ಒಪ್ಪಿಸಿದ್ದಾರೆ. ಕೆನರಾ ಬ್ಯಾಂಕ್‌ ವ್ಯವಸ್ಥಾಪಕರಿಂದ ದೂರು ಪಡೆದು ತನಿಖೆ ನಡೆಸಲಾಗುವುದು.
ಪೈಜುಲ್ಲಾ, ಸಿಪಿಐ, ಹೊಸದುರ್ಗ