ಲೈಂಗಿಕ ದೌರ್ಜನ್ಯ: ಆರೋಪಿಗೆ ಜೀವಾವಧಿ ಶಿಕ್ಷೆ

ಚಿತ್ರದುರ್ಗ : ಬಾಲಕಿಯನ್ನು ಮದುವೆಯಾಗಿ, ಆಕೆಯ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಆರೋಪಿಗೆ ಜೀವಾವಧಿ ಶಿಕ್ಷೆ, 1.11 ಲಕ್ಷ ರೂ. ದಂಡ ವಿಧಿಸಿ 2ನೇ ಅಪರ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ಡಿ.ವೀರಣ್ಣ ಅವರು ಸೋಮವಾರ ತೀರ್ಪು ನೀಡಿದ್ದಾರೆ.

ಮೊಳಕಾಲ್ಮುರು ತಾಲೂಕಿನ ಕೊಂಡ್ಲಹಳ್ಳಿ ಗ್ರಾಮದ ವಾಸಿ, ರಾಜು ಬಿನ್‌ ಗೋವಿಂದಪ್ಪ ಶಿಕ್ಷೆಗೊಳಗಾದ ಆರೋಪಿ. 2017ರ ಸೆಪ್ಟಂಬರ್‌ 6ರ ಬೆಳಗ್ಗೆ 10.30ರ ವೇಳೆ ವಿದ್ಯಾರ್ಥಿ ವೇತನ ಪಡೆಯುವುದಕ್ಕಾಗಿ ಅರ್ಜಿ ಸಲ್ಲಿಸಲು ಅದೇ ಗ್ರಾಮದ ಸ್ಟುಡಿಯೋಗೆ ಫೋಟೊ ತೆಗೆಸಿಕೊಂಡು ಬರಲು ಹೋಗಿದ್ದಾಗ, ಆರೋಪಿ ರಾಜು ಆಕೆಯನ್ನು ಅಪ್ಪಿಕೊಂಡು, ಪ್ರಾಣ ಬೆದರಿಕೆ ಹಾಕಿ, ಹೆದರಿಸಿದ್ದ. ಜತೆಗೆ ಆಕೆಯನ್ನು ಧರ್ಮಸ್ಥಳಕ್ಕೆ ಕರೆದುಕೊಂಡು ಹೋಗಿ, ಅಲ್ಲಿನ ವಸತಿ ಗೃಹದ ಒಂದು ರೂಮಿನಲ್ಲಿ ಬಲವಂತವಾಗಿ ತಾಳಿಕಟ್ಟಿ, ಲೈಂಗಿಕ ದೌರ್ಜನ್ಯ ವೆಸಗಿದ್ದ. 2017 ಸೆಪ್ಟಂಬರ್‌ 8 ರಂದು ಆಕೆಯನ್ನು ಊರಿಗೆ ವಾಪಸ್‌ ಕರೆತಂದಿದ್ದ. ಈ ವಿಷಯವನ್ನು ಯಾರಿಗಾದರೂ ಹೇಳಿದರೆ 'ನಿನ್ನ ಮತ್ತು ನಿಮ್ಮ ಮನೆಯವರ ಪ್ರಾಣ ತೆಗೆಯುತ್ತೇನೆ' ಎಂದು ಪ್ರಾಣ ಬೆದರಿಕೆ ಹಾಕಿದ್ದ. ಮೊಳಕಾಲ್ಮುರು ಠಾಣೆ ಪೊಲೀಸರು ಪೋಕ್ಸೊ ಕಾಯ್ದೆ ಅಡಿ ಪ್ರಕರಣ ದಾಖಲಿಸಿ, ತನಿಖೆ ಕೈಗೊಂಡು ಆರೋಪಿ ವಿರುದ್ಧ ನ್ಯಾಯಾಲಯಕ್ಕೆ ದೋಷಾರೋಪಣಾ ಪಟ್ಟಿ ಸಲ್ಲಿಸಿದ್ದರು. ಸರಕಾರದ ಪರವಾಗಿ ವಿಶೇಷ ಸರಕಾರಿ ಅಭಿಯೋಜಕ ಎನ್‌.ಬೀರಲಿಂಗಪ್ಪ ವಾದ ಮಂಡಿಸಿದ್ದರು.