ಸುಲೇನಹಳ್ಳಿಯಲ್ಲಿ ಜ್ವರ ಭೀತಿ: ಮೂವತ್ತಕ್ಕೂ ಹೆಚ್ಚು ಕುಟುಂಬಗಳು ಕಂಗಾಲು!

ಮೊಳಕಾಲ್ಮುರು: ತಾಲೂಕಿನ ಹಾನಗಲ್‌ ಗ್ರಾಪಂ ವ್ಯಾಪ್ತಿಯ ಸುಲೇನಹಳ್ಳಿಯಲ್ಲಿ ಕಳೆದ ನಾಲ್ಕೈದು ದಿನಗಳಿಂದಲೂ ಮೂವತ್ತಕ್ಕೂ ಹೆಚ್ಚು ಕುಟುಂಬದಲ್ಲಿ ಜ್ವರದ ಭೀತಿ ಹೆಚ್ಚಾಗಿ ಗ್ರಾಮಸ್ಥರು ಆತಂಕಕ್ಕೆ ಒಳಗಾಗಿದ್ದಾರೆ. ಗ್ರಾಮದಲ್ಲಿ 130ಕ್ಕೂ ಹೆಚ್ಚು ಕುಟುಂಬಗಳಿವೆ. ಇದರಲ್ಲಿ ಈಗಾಗಲೇ ಮೂವತ್ತಕ್ಕೂ ಹೆಚ್ಚು ಕುಟುಂಬದವರು ಜ್ವರದಿಂದ ನರಳಿ ಆರೋಗ್ಯ ಕೇಂದ್ರಗಳತ್ತ ಚಿಕಿತ್ಸೆಗಾಗಿ ಮುಖ ಮಾಡುತ್ತಿದ್ದಾರೆ.

ಇಲ್ಲಿನ ಜನರಲ್ಲಿ ಮೊದಲ ದಿನ ಏಕಾಏಕಿ ಜ್ವರ ಕಾಣಿಸಿಕೊಂಡು, ಮಾರನೇ ದಿನ ಕೈ ಕಾಲುಗಳ ಕೀಲುಗಳಲ್ಲಿ ನೋವು ಕಂಡು ನಿತ್ರಾಣವಾಗಿ ಕಾಲು ಊತ ಬಂದು ಮೈ, ಕೈ ನಡುಗಲು ಆರಂಭವಾಗುತ್ತಿದೆ. ಕೆಲವರು ಇದನ್ನು ಚಿಕನ್‌ ಗುನ್ಯ ಎಂದರೆ ಇನ್ನೂ ಕೆಲವರು ವೈರಲ್‌ ಫೀವರ್‌ ಎನ್ನುತ್ತಿದ್ದಾರೆ. ಅಕ್ಟೋಬರ್‌ 24ರಂದು ಪಟ್ಟಣದ ಸರಕಾರಿ ಸಾರ್ವಜನಿಕ ಆಸ್ಪತ್ರೆಯಲ್ಲಿ 5 ಜನ, 25 ರಂದು 4 ಜನ ಒಳ ರೋಗಿಗಳಾಗಿ ದಾಖಲಾಗಿ ಎರಡು ದಿನ ಚಿಕಿತ್ಸೆ ಪಡೆದಿದ್ದಾರೆ. ಇನ್ನೂ ಕೆಲವರು ಇಂದಿಗೂ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ಗಣನೀಯ ಇಳಿಕೆ ಕಂಡ ಕೊರೊನಾ ಸೋಂಕು: ಮೈಮರೆಯದಿರಿ, ಮತ್ತಷ್ಟು ಎಚ್ಚರವಹಿಸಿ!

ಆಸ್ಪತ್ರೆಗೆ ಜ್ವರ, ಮೈ, ಕೈ ನೋವು ಎಂದು ಬಂದ ಸುಲೇನಹಳ್ಳಿಯ ಎಲ್ಲರಿಗೂ ಕೋವಿಡ್‌ ಟೆಸ್ಟ್‌ ಮಾಡಿಸಲಾಗಿದೆ. ಕೆಲವರ ಲ್ಯಾಬ್‌ ವರದಿ ಇನ್ನೂ ಬರಬೇಕಿದೆ. ಮುನ್ನೆಚ್ಚರಿಕೆ ಕ್ರಮವಾಗಿ ಸಂಬಂಧಿಸಿದ ಗ್ರಾಪಂ ಅಧಿಕಾರಿಗಳಿಗೆ ಇಂದು ಗ್ರಾಮ ಸ್ವಚ್ಚತೆಗೆ ಆದ್ಯತೆ ನೀಡುವಂತೆ ಪತ್ರ ಬರೆಯಲಾಗುವುದು.
ಡಾ.ಅಭಿನವ್‌, ತಾಲೂಕು ಆಡಳಿತ ವೈದ್ಯಾಧಿಕಾರಿ, ಮೊಳಕಾಲ್ಮುರು

ರಾಜ್ಯದಲ್ಲಿ ಕಾಡುತ್ತಿದೆ ಔಷಧ ಕೊರತೆ: ಆಸ್ಪತ್ರೆಗಳಲ್ಲಿ ಗಂಭೀರ ರೋಗಕ್ಕೆ ಸಿಗುತ್ತಿಲ್ಲ ಮದ್ದು!
ಜ್ವರದ ವಿಷಯ ತಿಳಿದ ಕೂಡಲೇ ಸುಲೇನಹಳ್ಳಿಗೆ ಭೇಟಿ ನೀಡಿ, ಕೆಲವು ಕಡೆಗಳಲ್ಲಿ ಚರಂಡಿ ಸ್ವಚ್ಚ ಮಾಡಲಾಗಿದೆ. ಇನ್ನೂ ಕೆಲವು ಕಡೆ ಸ್ವಚ್ಚ ಗೊಳಿಸಬೇಕಿದೆ. ನಾಳೆ ಬೆಳಿಗ್ಗೆ ಈ ಕೆಲಸ ಮಾಡಿಸಲಾಗುವುದು. ಖಾಸಗಿಯವರೊಬ್ಬರ ಜಮೀನು ಸಮಸ್ಯೆಯಿಂದ ಒಂದೆಡೆ ಗಲೀಜು ಸ್ವಚ್ಚ ಮಾಡಲು ಸಾಧ್ಯವಾಗಿಲ್ಲ.
ಮಾರಣ್ಣ, ಪಿಡಿಒ, ಹಾನಗಲ್‌ ಗ್ರಾಪಂ