ಡ್ರಗ್ಸ್‌ ಸೇವಿಸಿ ಕಾಟ ಕೊಡಬೇಡಿ ಎಂದಿದ್ದಕ್ಕೆ ಚಾಕು ಇರಿತ

ಬೆಂಗಳೂರು : ಮಾದಕ ವಸ್ತುವಿನ ಚಟಕ್ಕೆ ಬಿದ್ದು ಏರಿಯಾದಲ್ಲಿ ಮಹಿಳೆಯರಿಗೆ ಕಾಟ ಕೊಡಬೇಡಿ ಎಂದು ಬುದ್ಧಿವಾದ ಹೇಳಿದವರಿಗೇ ಚಾಕುವಿನಿಂದ ಇರಿದು ಪರಾರಿ ಆಗಿದ್ದ ಆರು ಮಂದಿಯ ಗ್ಯಾಂಗನ್ನು ಬೆಳ್ಳಂದೂರು ಠಾಣೆ ಪೊಲೀಸರು ಬಂಧಿಸಿದ್ದಾರೆ.

ಕಸವನಹಳ್ಳಿ ಮುಖ್ಯರಸ್ತೆಯ ನಿವಾಸಿಯಾದ ಅರ್ಜುನ್‌ (33) ಮತ್ತು ಇವರ ಸ್ನೇಹಿತ ಕಾಲೇಜು ವಿದ್ಯಾರ್ಥಿ ಚಂದ್ರು ಚಾಕು ಇರಿತಕ್ಕೆ ಒಳಗಾದವರು. ಚಾಕು ಇರಿದ ಆರೋಪದ ಮೇಲೆ ಅದೇ ಏರಿಯಾದ ಸೆಲ್ವರಾಜ್‌, ಅರುಣ್‌, ದಿನೇಶ್‌, ಆನಂದ್‌, ಅವಿನಾಶ್‌, ಲೆಹರ್‌ ಅವರನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಬಂಧಿತ ಆರೋಪಿಗಳು ಕಸವನಹಳ್ಳಿ ಪಕ್ಕದ ಸ್ಲಂ ನಿವಾಸಿಗಳಾಗಿದ್ದು ಇವರೆಲ್ಲರೂ ಏರಿಯಾದಲ್ಲಿ ಓಡಾಡುವ ಮಹಿಳೆಯರಿಗೆ ನಾನಾ ರೀತಿಯ ಕಿರುಕುಳ ನೀಡುತ್ತಿದ್ದರು. ಈ ಬಗ್ಗೆ ಮೇಲಿಂದ ಮೇಲೆ ದೂರುಗಳು ಕೇಳಿ ಬಂದಿದ್ದರಿಂದ ಅರ್ಜುನ್‌ ಅವರು ಆರೋಪಿಗಳಿಗೆ ಬೀದಿಯಲ್ಲೇ ಬುದ್ಧಿ ಹೇಳಿದ್ದರು. ವರ್ತನೆ ಬದಲಿಸಿಕೊಳ್ಳದಿದ್ದರೆ ಪೊಲೀಸರಿಗೆ ದೂರು ನೀಡುವುದಾಗಿಯೂ ಎಚ್ಚರಿಸಿದ್ದರು. ಇದೇ ಸೇಡು ಇಟ್ಟುಕೊಂಡು ಆರೋಪಿಗಳು ಹೊಂಚು ಹಾಕಿ ಚಾಕು ಇರಿದಿದ್ದಾರೆ. ಇರಿತಕ್ಕೆ ಒಳಗಾದ ಇಬ್ಬರೂ ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದು, ಚೇತರಿಸಿಕೊಳ್ಳುತ್ತಿದ್ದಾರೆ.