ಅಕ್ಕನ ಸ್ಕೂಲ್‌ ಬಸ್‌ ಹರಿದು ಮಗು ಸಾವು

ಚೆನ್ನೈ: ಶಾಲೆಗೆ ಹೊರಟಿದ್ದ ಅಕ್ಕನಿಗೆ ಬಾಯ್‌ ಹೇಳಲು ಬಂದಿದ್ದ ಎರಡೂವರೆ ವರ್ಷದ ಮಗುವಿನ ಮೇಲೆ ಸ್ಕೂಲ್‌ ಬಸ್ ಹರಿದ ಘಟನೆ ಮೆಡವಕ್ಕಂನಲ್ಲಿ ನಡೆದಿದೆ.

ಶಾಲೆ ಬಸ್‌ ಹತ್ತಲು ಮನೆ ಮುಂದೆ ನಿಂತಿದ್ದ ಅಕ್ಕನ ಜತೆ ಇದ್ದ ಮಗು ಸಮೀಕ್ಷಾ, ಬಸ್‌ ಚಕ್ರಕ್ಕೆ ಸಿಲುಕಿ ಮೃತಪಟ್ಟಿದೆ.

'ಎಂದಿನಂತೆ ಮಂಗಳವಾರ ಬೆಳಗ್ಗೆ 8.50ಕ್ಕೆ ಮನೆ ಮುಂದೆ ಬಸ್‌ ಬಂದಿತ್ತು. ದೊಡ್ಡಮಗಳನ್ನು ಬಸ್‌ ಹತ್ತಿಸಲು ಹೊರಗೆ ಬಂದೆ. ಸಾಮಾನ್ಯವಾಗಿ ಗೇಟ್‌ ಹಾಕಿ ಹೊರಬರುತ್ತಿದ್ದೆ. ಆ ದಿನ ಮರೆತು ಹೊರಗೆ ಬಂದಿದ್ದೆ. ಮಗು ಹೊರಗೆ ಇರುವುದನ್ನು ಗಮನಿಸಿರಲಿಲ್ಲ. ಬಸ್‌ ಮುಂದೆ ಸಾಗಿದಾಗ ಮಗು ಚಕ್ರದಡಿ ಸಿಲುಕಿತು,'ಎಂದು ಮಗುವಿನ ತಾಯಿ ಈಶ್ವರಿ ಹೇಳಿದ್ದಾರೆ.

ಕೂಡಲೇ ಮಗುವನ್ನು ಆಸ್ಪತ್ರೆಗೆ ಕರೆದೊಯ್ಯಲಾದರೂ, ಆ ವೇಳೆಗಾಗಲೇ ಮಗು ಕೊನೆಯುಸಿರೆಳೆದಿತ್ತು.

ಹಿಡಿದು ಥಳಿಸಲು ಯತ್ನಿಸಿದ ಸ್ಥಳೀಯರಿಂದ ಬಿಡಿಸಿಕೊಂಡ ಬಸ್‌ ಚಾಲಕ ಸ್ಥಳದಿಂದ ಪರಾರಿಯಾಗಿದ್ದಾನೆ. ಘಟನೆ ನಂತರ ಪ್ರಕರಣ ದಾಖಲಿಸಿರುವ ಪೊಲೀಸರು ವಾಹನವನ್ನು ವಶಪಡಿಸಿಕೊಂಡು ಚಾಲಕನ ಪತ್ತೆಗೆ ಕಾರ್ಯಾಚರಣೆ ಆರಂಭಿಸಿದ್ದಾರೆ.