ಕರ್ನಾಟಕ ಎಕ್ಸ್‌ಪ್ರೆಸ್‌ ರೈಲಿನಿಂದ 1.56 ಕೋಟಿ ರೂ. ಮೌಲ್ಯದ ವಿದೇಶಿ ಸಿಗರೇಟ್‌ ಜಪ್ತಿ

ಬೆಂಗಳೂರು: ರೈಲು ಮೂಲಕ ದಿಲ್ಲಿಯಿಂದ ಬೆಂಗಳೂರಿಗೆ ತರಲಾಗಿದ್ದ 1.56 ಕೋಟಿ ರೂ. ಮೌಲ್ಯದ ವಿದೇಶಿ ಸಿಗರೇಟುಗಳನ್ನು ಕೇಂದ್ರ ಸೀಮಾ ಸುಂಕ ಅಧಿಕಾರಿಗಳು ಜಪ್ತಿ ಮಾಡಿದ್ದಾರೆ.

ನ.12ರಂದು ರಾತ್ರಿ 8ರ ಸುಮಾರಿಗೆ ಕರ್ನಾಟಕ ಎಕ್ಸ್‌ಪ್ರೆಸ್‌ ರೈಲು ನಗರ ರೈಲು ನಿಲ್ದಾಣಕ್ಕೆ ಬಂದಿತ್ತು. ಅದರ ಲಗೇಜ್‌ ಬೋಗಿಯಲ್ಲಿ ವಿನ್‌ ಎಂದು ಬರೆಯಲಾಗಿದ್ದ 26 ಅನುಮಾನಾಸ್ಪದ ಪಾರ್ಸೆಲ್‌ಗಳು ಪತ್ತೆಯಾದವು. ಒಳಗೆ ವಿನ್‌ ಬ್ರ್ಯಾಂಡ್‌ ಹೆಸರಿನ 78 ಕಾರ್ಟನ್‌ ಬಾಕ್ಸ್‌ಗಳಲ್ಲಿಸಿಗರೇಟ್‌ ಪ್ಯಾಕ್‌ಗಳಿದ್ದವು. ಪರಿಶೀಲಿಸಿದಾಗ ಒಟ್ಟು 1.56 ಕೋಟಿ ರೂ. ಮೌಲ್ಯದ 7.80 ಲಕ್ಷ ಸಿಗರೇಟುಗಳು ಇರುವುದು ಕಂಡು ಬಂದಿದೆ.

ಜಪ್ತಿ ಮಾಡಿರುವ ಸಿಗರೇಟು ಪ್ಯಾಕೆಟ್‌ಗಳ ಮೇಲೆ ಎಚ್ಚರಿಕೆಯ ಯಾವುದೇ ಚಿತ್ರ ಮತ್ತು ಬರಹ ಇಲ್ಲ. ಭಾರತದಲ್ಲಿ ಮಾರಾಟವಾಗುವ ಸಿಗರೇಟ್‌ಗಳ ಮೇಲೆ ಕಡ್ಡಾಯವಾಗಿ ಎಚ್ಚರಿಕೆಯ ಸಂದೇಶಗಳು ಇರಲೇಬೇಕು. ಅಲ್ಲದೆ, ಅವುಗಳನ್ನು ಅಕ್ರಮವಾಗಿ ಭಾರತಕ್ಕೆ ತರಲಾಗಿದೆ. ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರಿಸಲಾಗಿದೆ. ಕರ್ನಾಟಕ ವಲಯಕ್ಕೆ ಪ್ರವೇಶಿಸುವ ಎಲ್ಲ ರೈಲುಗಳ ಪಾರ್ಸೆಲ್‌ಗಳ ಮೇಲೆ ಕಣ್ಣಿಟ್ಟಿರುವುದಾಗಿ ಸೀಮಾ ಸುಂಕ ಅಧಿಕಾರಿಗಳು ತಿಳಿಸಿದ್ದಾರೆ.