ಸಂಚಾರ ನಿಯಮ ಉಲ್ಲಂಘನೆಯಲ್ಲಿ ಸೆಂಚುರಿ ಬಾರಿಸಿದ ಬೈಕ್‌ ಸವಾರನಿಗೆ 10 ಸಾವಿರ ದಂಡ

ಬೆಂಗಳೂರು: ಈತನಿಗೆ ಸಿಗ್ನಲ್‌ ಜಂಪ್‌ ಮಾಡುವುದು, ಹೆಲ್ಮೆಟ್‌ ಇಲ್ಲದೇ ಬೈಕ್‌ ಓಡಿಸುವುದು, ನೋ ಪಾರ್ಕಿಂಗ್‌ ಜಾಗದಲ್ಲಿ ನಿಲ್ಲಿಸುವುದು ಖಯಾಲಿಯಾಗಿತ್ತು. ಒಂದು ವರ್ಷದಿಂದ ಸಂಚಾರ ನಿಯಮ ಉಲ್ಲಂಘನೆಯಲ್ಲಿ ಸೆಂಚುರಿ ಬಾರಿಸಿದ್ದ. ಈತನ ಸಾಧನೆ ಮೆಚ್ಚಿ ಸಂಚಾರ ಪೊಲೀಸರು ಬರೋಬ್ಬರಿ 10 ಸಾವಿರ ದಂಡ ಹಾಕಿದ್ದಾರೆ !

ಈ ಸುದ್ದಿ ಓದಿ: ಸಂಚಾರ ನಿಯಮ ಉಲ್ಲಂಘನೆ ದುಬಾರಿ ದಂಡಕ್ಕೆ ರಾಜ್ಯ ಸರಕಾರ ಬ್ರೇಕ್‌, ದಂಡ ಮೊತ್ತ ಇಳಿಕೆ

ಜಾಲಹಳ್ಳಿ ನಿವಾಸಿ ಮೊಹಮ್ಮದ್‌ ಶಬ್ಬೀರ್‌ ಸಂಚಾರ ನಿಯಮ ಪಾಲನೆ ಮಾಡುತ್ತಿರಲಿಲ್ಲ. ರೆಡ್‌ಲೈಟ್‌ ಇದ್ದರೂ ಸಿಗ್ನಲ್‌ ಜಂಪ್‌ ಮಾಡಿ ಬೈಕ್‌ ನುಗ್ಗಿಸಿಕೊಂಡು ಹೋಗುತ್ತಿದ್ದ. ಏಕಮುಖ ರಸ್ತೆಯಲ್ಲಿ ವಿರುದ್ಧವಾಗಿ ಚಲಿಸುತ್ತಿದ್ದ. ಈ ಎಲ್ಲ ತಪ್ಪಿಗೆ ಈಗ ದಂಡ ಕಟ್ಟಿದ್ದಾನೆ. ತನ್ನ ವಿರುದ್ಧ ಇದುವರೆಗೂ ದಾಖಲಾಗಿದ್ದ 104 ಕೇಸುಗಳಿಗೆ ಒಟ್ಟು 10 ಸಾವಿರ ರೂಪಾಯಿ ದಂಡವನ್ನು ಪಾವತಿಸಿರುವುದಲ್ಲದೆ ಸಂಚಾರ ವಿಭಾಗದ ಅಧಿಕಾರಿಗಳ ಜತೆಗೆ ಮಾರುದ್ದದ ತನ್ನ ದಂಡದ ಪಟ್ಟಿಯನ್ನು ಹಿಡಿದು ಕ್ಯಾಮರಾಗೆ ಫೋಸು ಕೂಡ ಕೊಟ್ಟಿದ್ದಾನೆ.

ಇದನ್ನೂ ಓದಿ: ನಿಯಮ ಉಲ್ಲಂಘಿಸಿದ ಟ್ರಾಫಿಕ್‌ ಇನ್ಸ್‌ಪೆಕ್ಟರ್‌ಗೆ ದುಪ್ಪಟ್ಟು ದಂಡ: 24 ತಾಸಿನಲ್ಲಿ 22.50 ಲಕ್ಷ ರೂ. ದಂಡ ವಸೂಲಿ

ಹೆಲ್ಮೆಟ್‌ ರಹಿತ ಚಾಲನೆ, ಸಿಗ್ನಲ್‌ ಜಂಪ್‌, ಮೊಬೈಲ್‌ ಬಳಕೆ ರೀತಿಯ ನಿಯಮ ಉಲ್ಲಂಘನೆಗಳಿಗಾಗಿ ಕಳೆದ ಒಂದು ವರ್ಷದಲ್ಲಿ ಶಬ್ಬೀರ್‌ ವಿರುದ್ಧ ಒಟ್ಟು 104 ಕೇಸುಗಳು ದಾಖಲಾಗಿದ್ದವು. ಆದರೂ ಸಂಚಾರ ವಿಭಾಗದ ಪೊಲೀಸರು ಇದುವರೆಗೂ ಈತನನ್ನು ಹಿಡಿದು ಕಾನೂನಿಗೆ ಒಪ್ಪಿಸುವುದಾಗಲೀ, ದಂಡ ವಸೂಲಿ ಮಾಡುವುದಾಗಲೀ ಮಾಡಿರಲಿಲ್ಲ. ಕೇಸುಗಳನ್ನು ಹಾಕುವುದರಲ್ಲೇ ಸುಮ್ಮನಾಗಿದ್ದರು. ಇತ್ತೀಚೆಗೆ ಶಬ್ಬೀರ್‌ ತಾನಾಗಿಯೇ ಪೊಲೀಸರಿಗೆ ಸಿಕ್ಕಿ ಬಿದ್ದು ದಂಡದ ಮೊತ್ತವನ್ನು ಪಾವತಿಸಿದ್ದಾನೆ.