ಆಟೊ ಚಾಲಕರ ವಿರುದ್ಧ 1,294 ಕೇಸ್‌ ದಾಖಲು

ಬೆಂಗಳೂರು: ಬಾಡಿಗೆಗೆ ಬರಲು ನಿರಾಕರಣೆ, ಹೆಚ್ಚಿನ ಬಾಡಿಗೆಗೆ ಬೇಡಿಕೆ, ಮೀಟರ್‌ ಹಾಕದೇ ಇರುವ ಆಟೊ ಚಾಲಕರ ವಿರುದ್ಧ ಪ್ರಯಾಣಿಕರ ಸೋಗಿನಲ್ಲಿ ವಿಶೇಷ ಕಾರ್ಯಾಚರಣೆ ನಡೆಸಿದ ಸಂಚಾರ ಪೊಲೀಸರು, 1,294 ಕೇಸ್‌ಗಳನ್ನು ದಾಖಲಿಸಿದ್ದಾರೆ.

ಪಶ್ಚಿಮ ಮತ್ತು ಉತ್ತರ ಸಂಚಾರ ವಿಭಾಗಗಳಲ್ಲಿ ಬುಧವಾರ ಬೆಳಗ್ಗೆಯಿಂದಲೇ ವಿಶೇಷ ಕಾರ್ಯಾಚರಣೆ ನಡೆಸಲಾಗಿದೆ. ಇನ್ಸ್‌ಪೆಕ್ಟರ್‌ಗಳು, ಎಸ್ಸೈಗಳು ಸೇರಿದಂತೆ ಸಂಚಾರ ವಿಭಾಗದ ಹಲವು ಸಿಬ್ಬಂದಿ ವಿಶೇಷ ಕಾರ್ಯಾಚರಣೆಯಲ್ಲಿ ಪಾಲ್ಗೊಂಡಿದ್ದರು.

ಉಪ್ಪಾರಪೇಟೆ, ಚಿಕ್ಕಪೇಟೆ, ಸಿಟಿ ಮಾರುಕಟ್ಟೆ, ವಿಜಯನಗರ, ಮಾಗಡಿ ರಸ್ತೆ, ಬ್ಯಾಟರಾಯನಪುರ, ಕಾಮಾಕ್ಷಿಪಾಳ್ಯ, ಮಲ್ಲೇಶ್ವರ, ರಾಜಾಜಿನಗರ, ಯಶವಂತಪುರ, ಪೀಣ್ಯ, ಜಾಲಹಳ್ಳಿಯ ಪ್ರಮುಖ ಜನದಟ್ಟಣೆ ಮಾರುಕಟ್ಟೆ ಪ್ರದೇಶಗಳು, ರೈಲು ನಿಲ್ದಾಣ, ಬಸ್‌ ನಿಲ್ದಾಣ, ಮೆಟ್ರೋ ನಿಲ್ದಾಣ, ದೂರದ ಊರುಗಳಿಂದ ಬರುವ ಬಸ್‌ಗಳು ನಿಲ್ಲುವ ಸ್ಥಳಗಳ ಬಳಿ ಪ್ರಯಾಣಿಕರ ಸೋಗಿನಲ್ಲಿ ನಿಂತು ಆಟೋ ಹತ್ತಿದ ಪೊಲೀಸರು, ನಿಯಮಾನುಸಾರ ಬಾಡಿಗೆಗೆ ಬಾರದ ಚಾಲಕರ ವಿರುದ್ಧ ಕೇಸ್‌ ದಾಖಲಿಸಿದ್ದಾರೆ.

''ಚಾಲಕನ ವಿವರದ ಫಲಕ ಇಲ್ಲದೇ ಇರುವುದು, ಸಮವಸ್ತ್ರ ಧರಿಸದಿರುವುದು, ಮೀಟರ್‌ ಹಾಕದೇ ಇರುವುದು, ಹೆಚ್ಚಿನ ಬಾಡಿಗೆ ಕೇಳಿರುವುದಕ್ಕೆ ಸಂಬಂಧಿಸಿದಂತೆ ಕೇಸ್‌ ಹಾಕಿದ್ದೇವೆ. ಈ ರೀತಿಯ ಕಾರ್ಯಾಚರಣೆಯು ಆಗಾಗ ದಿಢೀರ್‌ ಎಂದು ಮುಂದುವರೆಸುತ್ತೇವೆ'' ಎಂದು ಉತ್ತರ ಸಂಚಾರ ವಿಭಾಗದ ಡಿಸಿಪಿ ಸಾರಾ ಫಾತಿಮಾ ತಿಳಿಸಿದರು.