ಗಿಫ್ಟ್‌ ಹೆಸರಲ್ಲಿ 3.44 ಲಕ್ಷ ವಂಚನೆ

ಬೆಂಗಳೂರು: ಜಾಲತಾಣಗಳು, ಟೆಲಿಫೋನ್‌ನಲ್ಲಿ ಅಪರಿಚಿತರೊಂದಿಗೆ ವ್ಯವಹರಿಸಿ ಮೋಸ ಹೋಗಿ ಹಣ ಕಳೆದುಕೊಳ್ಳುವ ಪ್ರಕರಣಗಳು ಮುಂದುವರಿದಿದ್ದು, 30 ವರ್ಷದ ಮಹಿಳೆಯೊಬ್ಬರು ಗಿಫ್ಟ್‌ ಆಸೆಗೆ ಬಿದ್ದು 3.44 ಲಕ್ಷ ರೂ. ಕಳೆದುಕೊಂಡಿದ್ದಾರೆ.

ಕಾಂತಿ (ಹೆಸರು ಬದಲಿಸಲಾಗಿದೆ) ಎಂಬುವರಿಗೆ ಫೋನ್‌ ಕರೆ ಮಾಡಿದ್ದ ಅಪರಿಚಿತನೊಬ್ಬ ಸ್ನೇಹಿತೆಯ ಸ್ನೇಹಿತ ಎಂದು ಪರಿಚಯಿಸಿಕೊಂಡು ವಂಚಿಸಿರುವುದಾಗಿ ದೂರಲಾಗಿದೆ. ಪರಿಚಯ ಮುಂದುವರಿದು ಪರಸ್ಪರ ಚಾಟಿಂಗ್‌ ಮಾಡಲು ಆರಂಭಿಸಿದ್ದೆವು. ಹೀಗಿರುವಾಗ, ಡಿಸೆಂಬರ್‌ ತಿಂಗಳಲ್ಲಿ ಸ್ನೇಹದ ಪ್ರತೀಕವಾಗಿ ನಿಮಗೆ ಉಡುಗೊರೆ ಕಳುಹಿಸಿದ್ದೇನೆ. ಅದನ್ನು ದಯವಿಟ್ಟು ಸ್ವೀಕರಿಸಿ ಎಂದು ಹೇಳಿದ್ದ. ಕೆಲವೇ ದಿನಗಳಲ್ಲಿ ತಾನಿಯಾ ಗೋವರ್‌ ಎಂಬ ಹೆಸರಿನ ಮಹಿಳೆ ಕರೆ ಮಾಡಿ, ನಿಮಗೊಂದು ಪಾರ್ಸೆಲ್‌ ಬಂದಿದೆ. ಅದರಲ್ಲಿ 40 ಸಾವಿರ ಪೌಂಡ್ಸ್‌ (ಸುಮಾರು 37 ಲಕ್ಷ ರೂ.) ಇದೆ. ಕೊರಿಯರ್‌ ಮೂಲಕ ಪಾರ್ಸೆಲ್‌ ಅನ್ನು ನಿಮ್ಮ ಮನೆಗೆ ಕಳುಹಿಸಬೇಕಾದರೆ 28,500 ರೂ. ಶುಲ್ಕ ಕಟ್ಟಬೇಕು ಎಂದು ಹೇಳಿ, ಬ್ಯಾಂಕ್‌ ಖಾತೆ ವಿವರ ನೀಡಿದ್ದಳು. ದೊಡ್ಡ ಮೊತ್ತದ ಹಣ ಸಿಗಲಿದೆ ಎಂದು ಕಾಂತಿ ಹಣ ಕಟ್ಟಿದ್ದರು. ಬೇರೆ ಬೇರೆ ಶುಲ್ಕಗಳ ನೆಪದಲ್ಲಿ ಒಟ್ಟು 2 ಬ್ಯಾಂಕ್‌ ಖಾತೆಗಳಿಗೆ ಹಂತ ಹಂತವಾಗಿ 3.44 ಲಕ್ಷ ರೂ. ವರ್ಗಾವಣೆ ಮಾಡಿಸಿಕೊಳ್ಳಲಾಗಿದೆ. ಬಳಿಕ ಪೋನ್‌ ಮಾಡಿದ್ದವರೆಲ್ಲರೂ ಸ್ವಿಚ್‌ಆಫ್‌ ಮಾಡಿದ್ದಾರೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಅಶೋಕ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.