3 ವರ್ಷಗಳ ಹಿಂದಿನ ಮನೆಗಳ್ಳತನ ಕೇಸ್‌ ಪತ್ತೆ, ಆರೋಪಿ ಬಂಧನ

ವಿಕ ಸುದ್ದಿಲೋಕ ಬೆಂಗಳೂರು

ಮೂರು ವರ್ಷಗಳ ಹಿಂದೆ ಮನೆ ಬೀಗ ಮುರಿದು ಕಳ್ಳತನ ಮಾಡಿದ್ದ ಆರೋಪಿಯನ್ನು ಬಂಧಿಸಿರುವ ಹೆಬ್ಬಾಳ ಪೊಲೀಸರು, 1 ಕಾರು ಮತ್ತು 30 ಗ್ರಾಂ ಚಿನ್ನಾಭರಣ ವಶಪಡಿಸಿಕೊಂಡಿದ್ದಾರೆ.

ತಮಿಳುನಾಡಿನ ಹೊಸೂರು ಮೂಲದ ಆದಿಲ್‌ (23) ಬಂಧಿತ ಆರೋಪಿ. ಹೆಬ್ಬಾಳದ ಕನಕನಗರದಲ್ಲಿರುವ ಇಫ್ತಿಕಾರ್‌ ಅಹಮ್ಮದ್‌ ಎಂಬುವರ ಮನೆಯಲ್ಲಿ ಈತ ಕಳ್ಳತನ ಮಾಡಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಇಫ್ತಿಕಾರ್‌ ಅವರು ಕುಟುಂಬ ಸಮೇತ ರಂಜಾನ್‌ ಹಬ್ಬ ಆಚರಣೆಗಾಗಿ ಹರಿದ್ವಾರಕ್ಕೆ 2016ರ ಜು.6ರಂದು ಹೋಗಿದ್ದರು. ವಾಪಸ್‌ ಜು.21ರಂದು ಬಂದು ನೋಡಿದಾಗ ಮನೆ ಮುಂದೆ ನಿಲ್ಲಿಸಿದ್ದ ಕಾರು ಇರಲಿಲ್ಲ. ಬಾಗಿಲು ತೆಗೆದು ಮನೆಯೊಳಗೆ ನೋಡಿದಾಗ ಚಿನ್ನಾಭರಣ, ಲ್ಯಾಪ್‌ಟಾಪ್‌, ಕ್ಯಾಮೆರಾ ಮತ್ತು ಕಾರಿನ ಕೀಲಿ ಕೂಡ ಇರಲಿಲ್ಲ. ಈ ಸಂಬಂಧ ಅವರು ಹೆಬ್ಬಾಳ ಠಾಣೆಗೆ ದೂರು ನೀಡಿದ್ದರು.

ನಿಂತಿದ್ದ ಕಾರಿನಿಂದ ಪತ್ತೆ

ಕಳ್ಳತನ ಮಾಡಿಕೊಂಡು ಹೋಗಿದ್ದ ಕಾರನ್ನು ಆರೋಪಿ ಆದಿಲ್‌, ತನ್ನ ಮನೆ ಮುಂದೆ ನಿಲ್ಲಿಸಿಕೊಂಡಿದ್ದ. ಕಳೆದ ಮೂರು ವರ್ಷಗಳಿಂದ ಬಳಕೆ ಮಾಡುತ್ತಿರಲಿಲ್ಲ. ಈ ಕುರಿತು ಹೆಬ್ಬಾಳ ಪೊಲೀಸರಿಗೆ ಖಚಿತ ಮೂಲಗಳಿಂದ ಮಾಹಿತಿ ಲಭಿಸಿತ್ತು. ಆರೋಪಿ ಮನೆಗೆ ತೆರಳಿದ ಪೊಲೀಸರು, ವಶಕ್ಕೆ ಪಡೆದು ವಿಚಾರಣೆ ನಡೆಸಿದಾಗ ಮೂರು ವರ್ಷಗಳ ಹಿಂದಿನ ಕಳ್ಳತನ ಪ್ರಕರಣ ಬೆಳಕಿಗೆ ಬಂದಿದೆ. ವಶಪಡಿಸಿಕೊಂಡಿರುವ ವಸ್ತುಗಳ ಮೌಲ್ಯ ಸುಮಾರು 9 ಲಕ್ಷ ರೂ. ಎಂದು ಪೊಲೀಸರು ತಿಳಿಸಿದ್ದಾರೆ.