ಬೆಂಗಳೂರಿನ 2 ಡಾನ್ಸ್ ಬಾರ್‌‌‌ಗಳ ಮೇಲೆ ದಾಳಿ: 78 ಮಹಿಳೆಯರ ರಕ್ಷಣೆ

ಬೆಂಗಳೂರು: ನಗರದಲ್ಲ ಅಕ್ರಮವಾಗಿ ತಲೆ ಎತ್ತಿದ್ದ ಎರಡು ಡಾನ್ಸ್‌ ಬಾರ್‌ಗಳ ಮೇಲೆ ಶನಿವಾರ ರಾತ್ರಿ ದಾಳಿ ನಡೆಸಿದ ಸಿಸಿಬಿ ಪೊಲೀಸರು, ಮೂವರನ್ನು ಬಂಧಿಸಿ 78 ಯುವತಿಯರನ್ನು ರಕ್ಷಿಸಿದ್ದಾರೆ.

ಅಶೋಕ್‌ನಗರ ಮತ್ತು ಕಲಾಸಿಪಾಳ್ಯ ಪೊಲೀಸ್‌ ಠಾಣೆಗಳ ವ್ಯಾಪ್ತಿಯಲ್ಲಿ ದಾಳಿ ನಡೆದಿದ್ದು, ಬ್ರಿಗೇಡ್‌ ಬಾರ್‌ ಆ್ಯಂಡ್‌ ರೆಸ್ಟೋರೆಂಟ್‌ನ ಮ್ಯಾನೇಜರ್‌ ಅಶೋಕ್‌ ಶೆಟ್ಟಿ (38), ಕ್ಯಾಶಿಯರ್‌ ಸಚಿನ್‌ (24) ಹಾಗೂ ನೈಟ್‌ ಕ್ವೀನ್‌ ರೆಸ್ಟೋರೆಂಟ್‌ನ ಮ್ಯಾನೇಜರ್‌ ಮೋಹನ್‌ ಪಿ ಬಂಧಿತ ಆರೋಪಿಗಳು. ಎರಡೂ ಬಾರ್‌ಗಳಿಗೆ ಗ್ರಾಹಕರಾಗಿ ಬಂದಿದ್ದ ನೂರಕ್ಕೂ ಅಧಿಕ ಮಂದಿಯನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸಲಾಗಿದೆ.

ನಿಯಮಬಾಹಿರವಾಗಿ ಡಾನ್ಸ್‌ ಬಾರ್‌ ನಡೆಸಲಾಗುತ್ತಿದೆ. ಯುವತಿಯರನ್ನು ಡಾನ್ಸ್‌ಗೆ ಬಲವಂತವಾಗಿ ಬಳಸಿಕೊಳ್ಳಲಾಗುತ್ತಿದೆ ಎನ್ನುವ ಮಾಹಿತಿ ಆಧಾರದ ಮೇಲೆ ಸಿಸಿಬಿ ಪೊಲೀಸರು ಎರಡೂ ಕೇಂದ್ರಗಳ ಮೇಲೆ ಏಕ ಕಾಲದಲ್ಲಿ ದಾಳಿ ನಡೆಸಿದ್ದರು. ರಕ್ಷಿಸಲ್ಪಟ್ಟ ಎಲ್ಲ ಮಹಿಳೆಯರೂ ಹೊರ ರಾಜ್ಯದವರಾಗಿದ್ದಾರೆ.

ಬಂಧಿತರಿಂದ ಸುಮಾರು 4 ಲಕ್ಷ ರೂ. ನಗದು, 12 ಕಂಪ್ಯೂಟರ್, 3 ಸೌಂಡ್ ಸಿಸ್ಟಮ್ ಮತ್ತು ಕಂಪ್ಯೂಟರ್‌ನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಅಶೋಕನಗರ ಮತ್ತು ಕಲಾಸಿಪಾಳ್ಯ ಪೊಲೀಸ್‌ ಠಾಣೆಯಲ್ಲಿ ಈ ಕುರಿತು ಪ್ರತ್ಯೇಕ ಪ್ರಕರಣ ದಾಖಲಾಗಿವೆ.