ಟೆಸ್ಟ್‌ ಡ್ರೈವ್‌ ವೇಳೆ ಅಪಘಾತ: ಉದ್ಯಮಿ ಸಾವು

ಬೆಂಗಳೂರು: ಹೊಸ ಕಾರು ಕೊಳ್ಳುವ ಸಂಭ್ರಮದಲ್ಲಿ ಟೆಸ್ಟ್‌ ಡ್ರೈವ್‌ಗೆ ತೆರಳಿದ್ದ ವೇಳೆ ಸಂಭವಿಸಿದ ಅಪಘಾತದಲ್ಲಿ ಉದ್ಯಮಿ ಮೃತಪಟ್ಟಿದ್ದು, ನಾಲ್ವರು ಗಾಯಗೊಂಡಿದ್ದಾರೆ.

ಬ್ಯಾಟರಾಯನಪುರ ಸಂಚಾರ ಠಾಣೆ ವ್ಯಾಪ್ತಿಯ ನೈಸ್‌ ರಸ್ತೆಯ ಹೊಸಕೆರೆಹಳ್ಳಿ ಟೋಲ್‌ ಸಮೀಪ ಮಂಗಳವಾರ ಮಧ್ಯಾಹ್ನ ಅಪಘಾತ ಸಂಭವಿಸಿದೆ. ಗಿರಿನಗರ ನಿವಾಸಿ ಸಾಗರ್‌ (31) ಮೃತಪಟ್ಟವರು. ಅವರ ಪತ್ನಿ ಸಂಧ್ಯಾ (28), ಪುತ್ರ ಸಮರ್ಥ್‌ (6), ಸ್ನೇಹಿತ ಗೌತಮ್‌ ಹಾಗೂ ಮಾರ್ಕ್‌ ಲ್ಯಾಂಡ್‌ ಶೋರೂಮಿನ ಸಿಬ್ಬಂದಿ ಶಿವಕುಮಾರ್‌ ಗಾಯಗೊಂಡಿದ್ದಾರೆ.

ಹೊಸ ಕಾರು ಖರೀದಿಸಲು ಕುಟುಂಬ ಸಮೇತರಾಗಿ ಹೊಸೂರು ರಸ್ತೆಯ ರೂಪೇನ ಅಗ್ರಹಾರದಲ್ಲಿರುವ 'ಮಾರ್ಕ್‌ ಲ್ಯಾಂಡ್‌' ಶೋರೂಮಿಗೆ ತೆರಳಿದ್ದರು. ಎಸ್‌ಯುವಿ ರೇಂಜ್‌ ರೋವರ್‌ ಕಾರನ್ನು ಖರೀದಿಸುವ ಆಸಕ್ತಿ ಹೊಂದಿದ್ದರು. ಡೆಮೋ ಕಾರಿನ ಟೆಸ್ಟ್‌ ಡ್ರೈವ್‌ ಮಾಡಲು ಶೋ ರೂಮಿನ ಸಿಬ್ಬಂದಿ ಜತೆ ಮಂಗಳವಾರ ಮದ್ಯಾಹ್ನ ನೈಸ್‌ ರಸ್ತೆಗೆ ಬಂದಿದ್ದರು. ಟೆಸ್ಟ್‌ ಡ್ರೈವ್‌ ವೇಳೆ ಸಾಗರ್‌ ಅವರು ಕಾರಿನ ಮೇಲೆ ನಿಯಂತ್ರಣ ಕಳೆದುಕೊಂಡಿದ್ದಾರೆ. ಅತಿ ವೇಗದಲ್ಲಿ ರಸ್ತೆ ವಿಭಜಕಕ್ಕೆ ಡಿಕ್ಕಿ ಹೊಡೆದು, 30 ಅಡಿ ಆಳದ ಗುಂಡಿಗೆ ಬಿದ್ದು ಅನಾಹುತ ಸಂಭವಿಸಿದೆ ಎಂದು ಸಂಚಾರ ಪೊಲೀಸರು ತಿಳಿಸಿದ್ದಾರೆ.

ಕಾರಿನ ಹಿಂಬದಿ ಸೀಟಿನಲ್ಲಿ ಪತ್ನಿ, ಪುತ್ರ ಹಾಗೂ ಸಾಗರ್‌ ಗೆಳೆಯ ಕುಳಿತಿದ್ದರು. ಮುಂಬದಿ ಸೀಟಿನಲ್ಲಿ ಸಾಗರ್‌ ಜತೆಗೆ ಶೋರೂಂ ಸಿಬ್ಬಂದಿ ಕುಳಿತಿದ್ದರು. ಕಾರು ಅಪ್ಪಳಿಸಿ ಬಿದ್ದ ರಭಸಕ್ಕೆ ಸಾಗರ್‌ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ. ಗಾಯಗೊಂಡ ಉಳಿದವರನ್ನು ಬಿಜಿಎಸ್‌ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗಾಯಾಳುಗಳು ಪ್ರಾಣಾಪಾಯದಿಂದ ಪಾರಾಗಿರುವುದಾಗಿ ವೈದ್ಯರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.