ಅಲಯನ್ಸ್ ವಿವಿ ಮಾಜಿ ಕುಲಪತಿ ಅಯ್ಯಪ್ಪ ದೊರೆ ಹತ್ಯೆ ಪ್ರಕರಣ; ಮತ್ತೆ 7 ಜನರ ಬಂಧನ

ಬೆಂಗಳೂರು: ಅಲಯನ್ಸ್ ವಿವಿ ವಿಶ್ರಾಂತ ಕುಲಪತಿ ಅಯ್ಯಪ್ಪ ದೊರೆ ಕೊಲೆ ಪ್ರಕರಣದಲ್ಲಿ ಇನ್ನೂ ಏಳು ಜನ ಆರೋಪಿಗಳನ್ನು ಉತ್ತರ ವಿಭಾಗ ಪೊಲೀಸರು ಬಂಧಿಸಿದ್ದಾರೆ.
ಜಯಮಹಲ್ ನಿವಾಸಿ ಕಾಂತರಾಜು, ಜೆ.ಸಿ ನಗರದ ಸುನೀಲ್ ರಾವ್, ಆರ್.ಟಿ ನಗರದ ಫಯಾಜ್ , ವಿನಯ್ ಹಾಗೂ ಈ ಆರೋಪಿಗಳು ತಲೆಮರೆಸಿಕೊಳ್ಳಲು ಆಶ್ರಯ ನೀಡಿದ ಅರುಣ್ ಕುಮಾರ್, ರಿಜ್ವಾನಾ ಮತ್ತು ಸಲ್ಮಾ ಎಂಬುವರನ್ನು ಬಂಧಿಸಲಾಗಿದೆ.

ಇದರೊಂದಿಗೆ ಪ್ರಕರಣದಲ್ಲಿ ಬಂಧಿತ ಆರೋಪಿಗಳ ಸಂಖ್ಯೆ ಹತ್ತಕ್ಕೇರಿದೆ.

ಲಯನ್ಸ್ ವಿವಿ ಕುಲಪತಿ ಸುಧೀರ್ ಅಂಗೂರ್ ಮತ್ತು ಸುಧೀರ್ ಸಹಾಯಕನಾಗಿರುವ ವಿವಿ ಉದ್ಯೋಗಿ ಸೂರಜ್ ಸಿಂಗ್ ಎಂಬುವರನ್ನು ಕೊಲೆ ನಡೆದ 24 ತಾಸುಗಳಲ್ಲಿ ಬಂಧಿಸಲಾಗಿತ್ತು. ನಂತರ ಮತ್ತೊಬ್ಬ ಆರೋಪಿ ಗಣೇಶ್ ಎಂಬಾತನ ಮೇಲೆ ಗುಂಡು ಹಾರಿಸಿ ಬಂಧಿಸಲಾಗಿದೆ.

ವಾಯುವಿಹಾರಕ್ಕೆ ಹೋದಾಗ ಹತ್ಯೆ

ಅ.15ರಂದು ರಾತ್ರಿ ಅಯ್ಯಪ್ಪ ಅವರನ್ನು ಎಚ್ಎಂಟಿ ಮೈದಾನದಲ್ಲಿ ಮಾರಕಾಸ್ತ್ರಗಳಿಂದ ಕೊಚ್ಚಿ‌ ಕೊಲೆ‌ ಮಾಡಲಾಗಿತ್ತು.

ಅಲಯನ್ಸ್‌ ವಿವಿಯ ವಿಶ್ರಾಂತ ಉಪ ಕುಲಪತಿ ಅಯ್ಯಪ್ಪ ದೊರೆ (53) ಅವರನ್ನು ಬರ್ಬರವಾಗಿ ಕೊಲೆ ಮಾಡಿದ್ದು ಸುಮಾರು 2 ಸಾವಿರ ಕೋಟಿ ರೂ. ಬೆಲೆಬಾಳುವ ಅಲಯನ್ಸ್‌ ವಿವಿಯ ಮೇಲೆ ಸಂಪೂರ್ಣ ಹಿಡಿತ ಸಾಧಿಸುವುದಕ್ಕಾಗಿ ಎನ್ನುವುದು ಬಯಲಾಗಿದೆ.

ಸಹೋದರರಾಗಿರುವ ಸುಧೀರ್‌ ಅಂಗೂರ್‌ ಮತ್ತು ಮಧುಕರ್‌ ಅಂಗೂರ್‌ ಸೇರಿ 2010ರಲ್ಲಿ ಅಲಯನ್ಸ್‌ ವಿವಿ ಸ್ಥಾಪಿಸಿದ್ದರು. ಅದಕ್ಕೆ ಅಯಪ್ಪ ದೊರೆ ಸಂಸ್ಥಾಪಕ ಉಪ ಕುಲಪತಿಯಾಗಿದ್ದರು.