ಈಶಾನ್ಯ ಭಾರತ ವಿದ್ಯಾರ್ಥಿ ಮೇಲೆ ಹಲ್ಲೆ: ಮೊಬೈಲ್‌ ದರೋಡೆ

ಬೆಂಗಳೂರು : ಈಶಾನ್ಯ ಭಾರತ ಮೂಲದ ಕಾಲೇಜು ವಿದ್ಯಾರ್ಥಿ ಮೇಲೆ ಹಾಡಹಗಲೇ ಹಲ್ಲೆ ಮಾಡಿದ ದುಷ್ಕರ್ಮಿಗಳು ಮೊಬೈಲ್‌ ಫೋನ್‌ ದೋಚಿದ್ದಾರೆ.

ಸೇಂಟ್‌ ಜೋಸೆಫ್ಸ್‌ ಕಾಲೇಜಿನಲ್ಲಿ ಪದವಿ ವ್ಯಾಸಂಗ ಮಾಡುತ್ತಿರುವ ಮಣಿಪುರ ಮೂಲದ ಸೀಲೆನ್‌ತಾಂಗ್‌ ಕೋಮ್‌ (20) ಹಲ್ಲೆಗೊಳಗಾದವರು. ಜ.3ರಂದು ಬೆಳಗ್ಗೆ 8.45ರ ಸುಮಾರಿಗೆ ಆಸ್ಟಿನ್‌ಟೌನ್‌ ಬಸ್‌ ನಿಲ್ದಾಣದಲ್ಲಿ ಘಟನೆ ನಡೆದಿದೆ.

ಘಟನೆ ಕುರಿತು ಮಾತನಾಡಿದ ಕೋಮ್‌ ಸಹೋದರ ಸಂಬಂಧಿ, ''ಬಸ್‌ ನಿಲ್ದಾಣದ ಎದುರಿನಲ್ಲೇ ಕೋಮ್‌ ಮೇಲೆ ಹಲ್ಲೆ ನಡೆದಿದ್ದು, ಯಾರೊಬ್ಬರೂ ನೆರವಿಗೆ ಧಾವಿಸಿಲ್ಲ. ಬಲ ಕಿವಿಗೆ ಬಲವಾಗಿ ಹೊಡೆದ ಕಾರಣ 2 ದಿನ ಸರಿಯಾಗಿ ಕಿವಿ ಕೇಳಿಸಿಲ್ಲ. ಹೊರ ರಾಜ್ಯದಿಂದ ಬಂದ ನಾವು ಇಂತಹ ಘಟನೆ ನಿರೀಕ್ಷಿಸಿರಲಿಲ್ಲ. ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಆರೋಪಿಗಳನ್ನು ಬಂಧಿಸುವುದಾಗಿ ತಿಳಿಸಿದ್ದಾರೆ'' ಎಂದರು.

''ಗಾಯಾಳು ವಿದ್ಯಾರ್ಥಿಗೆ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಗಿದ್ದು, ಗಂಭೀರವಾದ ಗಾಯಗಳು ಆಗಿಲ್ಲ. ಹಲ್ಲೆ ಆರೋಪಿಗಳನ್ನು ಶೀಘ್ರದಲ್ಲೇ ಬಂಧಿಸಲಾಗುವುದು'' ಎಂದು ಅಶೋಕ ನಗರ ಪೊಲೀಸರು ತಿಳಿಸಿದ್ದಾರೆ.