ಮದುವೆ ಫೋಟೋಗೆ ಅಕ್ಕನ ಮಗನ ಕೆಟ್ಟ ಕಮೆಂಟ್‌

ಬೆಂಗಳೂರು: ಫೇಸ್‌ಬುಕ್‌ಗೆ ಹಾಕಿದ್ದ ಮದುವೆ ಫೋಟೋಗೆ ವಧುವಿನ ಅಕ್ಕನ ಮಗನೇ ಅಶ್ಲೀಲವಾಗಿ ಕಮೆಂಟ್‌ ಮಾಡಿ, ಇಡೀ ಕುಟುಂಬವನ್ನೇ ಮುಜುಗರಕ್ಕೆ ಒಳಪಡಿಸಿದ ಪ್ರಕರಣ ನಡೆದಿದೆ. ಪ್ರಕರಣದಲ್ಲಿ ಸೈಬರ್‌ ಕ್ರೈಂ ಪೊಲೀಸರು ಆರೋಪಿಯನ್ನು ಬಂಧಿಸಿ, ನವವಿವಾಹಿತೆಯ ಹಲವು ದಿನಗಳ ಆತಂಕದ ದಿನಗಳನ್ನು ದೂರ ಮಾಡಿದ್ದಾರೆ.

ಖಾಸಗಿ ಕಂಪನಿಯಲ್ಲಿ ಕೆಲಸ ಮಾಡುತ್ತಿರುವ 28 ವರ್ಷದ ಯುವತಿ ಏಪ್ರಿಲ್‌ನಲ್ಲಿ ಮದುವೆಯಾಗಿದ್ದರು. ಅವರ ಪತಿಯೂ ಖಾಸಗಿ ಕಂಪನಿ ಉದ್ಯೋಗಿ. ಮದುವೆ ಬಳಿಕ ಸಂಭ್ರಮದ ಫೋಟೋಗಳನ್ನು ಯುವತಿ ಫೇಸ್‌ಬುಕ್‌ಗೆ ಅಪ್‌ಲೋಡ್‌ ಮಾಡಿದ್ದರು. ಅಲ್ಲದೆ, ಅವುಗಳನ್ನು ಪತಿ ಮತ್ತು ಪತಿಯ ಸಂಬಂಧಿಗಳಿಗೂ ಟ್ಯಾಗ್‌ ಮಾಡಿದ್ದರು. ಈ ಫೋಟೋಗೆ ಲಿಖಿತ್‌ ರೆಡ್ಡಿ, ರಾಹುಲ್‌ ಡಿಜೆ, ತನೀಶ್‌ ತನೀರ್‌ ಎಂಬ ಹೆಸರಿನ ಮೂವರು ಅಶ್ಲೀಲ ಕಮೆಂಟ್‌ಗಳನ್ನು ಮಾಡಲು ಆರಂಭಿಸಿದ್ದರು. ''ನೀನಿನ್ನೂ ಎಷ್ಟು ಹುಡುಗರ ಜತೆ ಆಟ ಆಡ್ತೀಯಾ. ನಿನ್ನ ಕುಟುಂಬವೇ ಇಂಥದ್ದು, ನಿನಗೆಷ್ಟು ಮಂದಿ ಬೇಕು'' ಎನ್ನುವ ಕಾಮೆಂಟ್‌ಗಳನ್ನು ಹಾಕುತ್ತಿದ್ದರು.

ಈ ಕಾಮೆಂಟ್‌ಗಳನ್ನು ಪತಿ ಹಾಗೂ ಅವರ ಕುಟುಂಬಸ್ಥರೆಲ್ಲರೂ ನೋಡಿ, ತೀವ್ರ ಮುಜುಗರಕ್ಕೆ ಒಳಗಾಗಿದ್ದರು. ಆದರೆ, ಇದೊಂದು ಕಿಡಿಗೇಡಿಗಳ ಕೃತ್ಯ ಎಂಬುದನ್ನು ಅರ್ಥ ಮಾಡಿಕೊಂಡ ಪತಿ, ಕಾಮೆಂಟ್‌ಗಳ ಸ್ಕ್ರೀನ್‌ ಶಾಟ್‌ ತೆಗೆದಿಟ್ಟು, ಸ್ಟೇಟಸ್‌ ಡಿಲೀಟ್‌ ಮಾಡುವಂತೆ ಸೂಚಿಸಿದ್ದರು. ಅದರಂತೆ ಮಾಡಿದ ಯುವತಿ, ಹಲಸೂರು ಠಾಣೆಯಲ್ಲಿ ದೂರು ದಾಖಲಿಸಿದ್ದರು.

ತನಿಖೆ ಆರಂಭಿಸಿದ ಪೊಲೀಸರಿಗೆ ಕಾಮೆಂಟ್‌ ಮಾಡಿದ್ದ ಮೂರು ಪ್ರೊಪೈಲ್‌ ಒಂದೇ ಐಪಿ ಅಡ್ರೆಸ್‌ನಿಂದ ಮಾಡಿರುವುದು ಎಂಬುದು ಗೊತ್ತಾಗಿದೆ. ಅಲ್ಲದೆ, ಮೂರೂ ಪ್ರೊಫೈಲ್‌ಗಳು ಒಂದೇ ನಂಬರಿನಿಂದ ಸಿದ್ಧಗೊಂಡಿತ್ತು. ಹೀಗಾಗಿ ಒಬ್ಬನೇ ಕೃತ್ಯ ಎಸಗಿರುವುದು ಎಂಬುದು ಗೊತ್ತಾಗಿ, ಆತನನ್ನು ಬಂಧಿಸಿದ್ದಾರೆ. ಆದರೆ, ಈ ವೇಳೆ ಕುಟುಂಬಸ್ಥರಿಗೆ ಮತ್ತೊಂದು ಶಾಕ್‌ ಕಾದಿತ್ತು. ಯಾಕೆಂದರೆ ಅಶ್ಲೀಲ ಕಾಮೆಂಟ್‌ ಮಾಡಿದ ವ್ಯಕ್ತಿ, ಯುವತಿಯ ಅಕ್ಕನ ಮಗನೇ ಆಗಿದ್ದ.

ಕೌಟುಂಬಿಕ ಕಲಹದ ದ್ವೇಷದಲ್ಲಿ ಆರೋಪಿ, ತಪ್ಪು ಮಾಡಿದ್ದ . ಆತನ್ನು ಬಂಧಿಸಿ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.