ಪೊಲೀಸರಿಂದ ಕಣ್ವ ಸಂಸ್ಥೆಯ ದಾಖಲೆ ಸಂಗ್ರಹ: ಆರ್‌ಬಿಐ, ಸಹಕಾರ ಇಲಾಖೆ, ಚಾರ್ಟರ್ಡ್‌ ಅಕೌಂಟೆಂಟ್‌ಗಳ ನೆರವಿಗೆ ಪತ್ರ

ಬೆಂಗಳೂರು: ಕಣ್ವ ಸಂಸ್ಥೆಯಿಂದ ಹೂಡಿಕೆದಾರರಿಗೆ ಹಣ ಮತ್ತು ಬಡ್ಡಿ ಮರಳಿಸದೆ ವಂಚನೆ ಮಾಡಿದ ಆರೋಪ ಪ್ರಕರಣ ಸಂಬಂಧ ತನಿಖೆ ನಡೆಸುತ್ತಿರುವ ಬಸವೇಶ್ವರ ನಗರ ಪೊಲೀಸರು, ಸಂಸ್ಥೆಯ ದಾಖಲೆಗಳನ್ನು ಸಂಗ್ರಹಿಸುತ್ತಿದ್ದಾರೆ.

ಎಫ್‌ಡಿ ರೂಪದಲ್ಲಿ ಲಕ್ಷಾಂತರ ರೂ. ಹೂಡಿಕೆ ಮಾಡಿಸಿಕೊಂಡು ಮೆಚ್ಯುರಿಟಿ ಬಳಿಕ ಭರವಸೆ ಕೊಟ್ಟಂತೆ ಅಸಲು, ಬಡ್ಡಿಯನ್ನು ಮರಳಿಸಿಲ್ಲ ಎಂದು ಆರೋಪಿ ಗೋಪಾಲ್‌ ಸೇರಿದಂತೆ ಮೂವರು ಹೂಡಿಕೆದಾರರು ಬಸವೇಶ್ವರ ನಗರ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ಕಣ್ವ ಕಂಪನಿ ಮೇಲೆ ಕಾನೂನು ಕ್ರಮ; ಬ್ಲೇಡ್‌ ಕಂಪನಿಗಳೊಂದಿಗೆ ವ್ಯವಹಾರ ಬೇಡ: ಆರ್‌. ಅಶೋಕ್

ಹೂಡಿಕೆದಾರರು ದೊಡ್ಡ ಸಂಖ್ಯೆಯಲ್ಲಿದ್ದಾರೆ. ಆದರೆ, ಎಷ್ಟು ಜನರಿಗೆ ವಂಚನೆಯಾಗಿದೆ. ಸಂಸ್ಥೆಯ ವಹಿವಾಟುಗಳು, ಆಸ್ತಿ ಕುರಿತು ಪರಿಶೀಲನೆ ನಡೆಸಬೇಕು. ಆರ್ಥಿಕ ವಿಷಯವಾಗಿರುವ ಕಾರಣ ಸ್ವಲ್ಪ ಸಮಯ ಹಿಡಿಯುತ್ತದೆ. ಈ ಸಂಬಂಧ ಆರ್‌ಬಿಐ, ಸಹಕಾರ ಇಲಾಖೆ, ಚಾರ್ಟರ್ಡ್‌ ಅಕೌಂಟೆಂಟ್‌ಗಳ ನೆರವನ್ನು ಪಡೆಯಲಾಗುತ್ತಿದೆ. ಸಂಬಂಧಪಟ್ಟ ಇಲಾಖೆಗಳೊಂದಿಗೆ ಪತ್ರ ವ್ಯವಹಾರ ನಡೆಸಲಾಗುತ್ತಿದೆ. ದಾಖಲೆಗಳನ್ನು ಸಂಗ್ರಹಿಸಿ ಪರಿಶೀಲನೆ ಮಾಡಿದ ನಂತರವೇ ಸ್ಪಷ್ಟ ಚಿತ್ರಣ ಸಿಗಲಿದೆ ಎಂದು ಹಿರಿಯ ಪೊಲೀಸ್‌ ಅಧಿಕಾರಿ ತಿಳಿಸಿದರು.

ಸೋಮವಾರ ನಂಜುಂಡಯ್ಯ ವಶಕ್ಕೆ

ಕಣ್ವ ಸಮೂಹ ಸಂಸ್ಥೆಯ ಮಾಲೀಕರಾದ ನಂಜುಂಡಯ್ಯ ಅವರನ್ನು ಸೋಮವಾರ ವಶಕ್ಕೆ ಪಡೆಯಲಾಗುವುದು ಎಂದು ಅಧಿಕಾರಿ ತಿಳಿಸಿದರು. ಶುಕ್ರವಾರ ನಂಜುಂಡಯ್ಯ ಅವರನ್ನು ಬಂಧಿಸಿ ನ್ಯಾಯಾಧೀಶರ ಮನೆಗೆ ಹಾಜರುಪಡಿಸಲಾಗಿತ್ತು. ಬಳಿಕ ನ್ಯಾಯಾಂಗ ವಶಕ್ಕೆ ಒಪ್ಪಿಸಲಾಗಿದೆ. ಹೀಗಾಗಿ, ನ್ಯಾಯಾಲಯಕ್ಕೆ ಕಸ್ಟಡಿ ಕೋರಿ ಅರ್ಜಿ ಸಲ್ಲಿಸಿ ವಶಕ್ಕೆ ಪಡೆದು ವಿಚಾರಣೆಗೆ ಒಳಪಡಿಸಲಾಗುವುದು ಎಂದು ಅಧಿಕಾರಿ ಹೇಳಿದರು.